A paritæ a no l’è caitæ

“Se e dònne fïsan a-o poei, o mondo o saieiva megio, ghe saieiva meno guære”. Ormai semmo abituæ à st’affermaçion, dita de spesso da de dònne de successo pe promeuve a presensa feminiña in politica. Ormai tutti pensemmo ch’o segge un pittin veo, sto poei benefico da cromosòmma XX e e dònne pan ëse anche reconoscenti de ëse reconosciue comme fòrsa paçificatoa. No se capisce perché no sa’arraggian, incangio, no refuan à spâ tratta questa vegia – sciben che vestia de neuvo – steriotipizzaçion do genere feminin: un ritorno a-a dònna moæ, beneffattoa, costöde do fogoâ. E dònne devan intrâ in politica no perché individui preparæ, no perché capaçi, ma sorviatutto e in primis perché boñe. O no l’é svilente? Comme ascordâse l’urtima campagna prescidençiâ – fallimentare – de Hillary Clinton, unna campagna tutta de genere: votæme perché son dònna. O meito, e capaçitæ? Vegnivan dòppo.

E pioniee do pensceo femminista – comme Mary Wollstonecraft, Emma Godma, Elizabeth Cady Stanton – no saieivan contente de sta proçescion do ben a-o feminin. No saieivan contente perché liatre miavan drite a-a paritæ politica, soçiâ e econòmica tra i sesci, a-a convinçion che o sesso biològico o no dovesse ëse un fattô predeterminante ch’o plasme l’identitæ soçiâ ò i diritti sòçio-politichi ò econòmichi da persoña. L’idea a l’ea ciæa: a dònna a l’é un ëse uman a-o pari de un òmmo e in quanto tale a deve vegnî trattâ.

O neuvo feminsmo – quello ch’o parte da-i anni Sciuscianta in avanti (con quarche voxe feua da-o cöro comme Germaine Gree ò Camille Paglia) – o pâ incangio voei dî tutto o conträio: l’identitæ soçiâ e politica a stà tutta into genere, femminin. O primmo feminismo o voeiva dònne fòrti, combattive, boñe à intrâ e à compete co-i òmmi inti mæximi campi; oua s’organizza festival de lettiatua pe sole dònne, se domanda e quöte reusa inti Parlamenti, corsci universcitäi speciali de studdi feminin, premmi escluxivi pe registe, conferense pe business women. Oua pâ che segge e dònne pe-e primme à serrâse inte l’ortixeu mentale do seu genere, diciarandose coscì sconfitte inta corsa à l’egualiansa e a-a paritæ.

“It is justice, not charity, that is wanting in the world” a scrive a Mary Wollstonecraft inte A vindication of Rights of Woman (1792). O pröto-feminismo defæti o se conçentrava in scê reforme legali con di obiettivi ciæi e specifichi. O l’ea un feminismo ch’o se basava in sce di prinçipi inluministichi de giustiçia universâ. Christina Hoff Sommers into seu Who Stole Feminism? a definisce “de genere” o feminismo da giornâ de ancheu. “De genere”, in quante invece che miâ a-e riforme, analizzâ i problemi in mainea compessa e meuia, o basa tutto in sciô sesso. E dònne an difficoltæ in quanto dònne, o mondo o no fonçioña perché a l’é in atto unna guæra maschilista e patriarcale contra o genere feminin.

Emmo perso o gusto pe un feminismo riformista. No emmo beseugno de publiçitæ con meno tette, ma de unna politica de açion. No emmo beseugno de quöte reusa, ma ciù tanti serviçi de ascistensa che permettan a-e famigge de gestî tempo e vitta lavorativa con ciù libertæ. Dovemmo parlâ de lezze, de neuve struttue soçiæ, no de publiçitæ co-e dònne magre che viölan a senscibilitæ feminiña. Dovemmo cianta lì de parlâ de violensa in scê dònne comme se ghe fïse unna guæra contra e dònne, perché se tratta primma de tutto de criminialitæ, e comma tale a deve ëse affrontâ.

Che e dònne se liberan da liatre mæxime, e che se regòrdan de ëse individui, avanti e tutto.