Ambiente: femmo fito!

“Voemmo aggiustâ e cöse, no aspëtâ che ô fasse quarchedun atro”, o dixe o collettivo Friday for Future de Zena

“Se tanti figgeu e figgeue deçiddan de manifestâ dòppo a scheua, imaginæ cöse porrisëscimo fâ tutti insemme, se solo ô voëscimo in davei”. Ste chì son e paròlle de Greta Thunberg, attivista e fondatoa de Fridays For Future, prononçiæ in occaxon da Cop 24 de Katowice de dexembre passou.

Trei meixi apreuvo a primma manifestaçion globâ: i 15 de marso do 2019 eimo di milioni inte 150 paixi de tutto o mondo, pe-a manifestaçion pe l’ambiente a ciù parteçipâ da stöia. À chi ne dixe che tanto l’é inutile, che tanto no poemmo cangiâ ninte, niatri rispondemmo che sto chì l’é solo l’iniçio; e che l’é megio che se reddoggian e maneghe e che ne daggan unna man, incangio de stâ assettæ à giudicâne, mentre provemmo à risòlve o casin che liatri an creou. A veitæ a l’é che de tempo n’emmo za perso à basta, e che quello che rischiemmo in davei l’é de annullâ o nòstro futuo.

Pe questo l’é partio da-i zoeni o movimento de Fridays, perché niatri emmo quello senso de appartenensa ch’o ne liga a-o futuo, faxendone vegnî freido a-o pensceo de vive in sce sto planeta da chì à 30 anni. Pe questo no domandemmo o permisso, ma agimmo.

Tranquilli, o planeta o se repiggià, o l’à superou de catastrofe climmatiche ben ciù devastanti de quella in corso, e saieiva estremamente arrogante pensâ de riescî à destrue un ëse mai tanto perfetto con ciù de 4,54 miliardi de anni. I soli à scroscîghe, à rimettighe, semmo niatri, ëse umen, generaçioin do presente e do futuo. E ancheu son i ciù “piccin” à dovei lottâ, à pretende giustiçia, à parlâ de diritti e de dovei. L’intendimento, diffiçile, o l’é quello de sarvâ o nòtro futuo, e o vòstro ascì, se saiei ancon vivi, e de domandâ che se travagge pe un sviluppo degno de scignificâ sta paròlla.

Comme? Unindone, creando “moltitudine” e generando consapevolessa, levando da mezo bandee e confin mentali, insomma anando apreuvo a-o modello oppòsto à quello che n’an mostrou in scî libbri de stöia. A communicaçion virtuale a l’é nòstra alleâ, a rende poscibile de ræ e de organizzaçioin da Napoli à Beira (Mozambicco), scin à Austin (Texas). Utòpico, fòscia, ma no poemmo tiâse in derê, sempre pe quello senso de appartenensa e pe l’immensa senscibilitæ che a nutre o nòstro coraggio de agî; questa pascion a se peu toccâ, quæxi a se peu respiâ inte l’äia de nòstre manifestaçioin; a primma i passæ meixi de marso, o 24 de mazzo a segonda, e continuiemo scinché aviemo do sciou in goa e i pê rezian i nòstri pasci inte sta longa marcia.

À niatri no n’interessa ëse popolari, à niatri no n’impòrta e aspettative che i media crean; à niatri interessa fâ tremmâ e gambe a-i politichi, creâ consenso basou in sciâ diffuxon de informaçioin. Pretendemmo rispetto pe-o futuo, pretendemmo che a politica a fasse o ben commun (scignificato mæximo da paròlla politica). Pe fâ questo dovemmo parlâ ciæo, no impòrta quante pòsse resultâ scòmodo. I politichi parlan solo de unna crescita sensa fin, in referimento a-a green economy, perché an poia de diventâ impopolari. Parlan solo de anâ avanti co-e mæxime idee erræ che n’an cacciou inte sta scituaçion. À niatri impòrta da giustiçia climmatica e de un planeta vivibile. Con cangiamento climmatico intendemmo quell’intresso de cause e conseguense che no se limitan a-i danni ligæ à l’ambiente, ma ascì à tutte e problematiche soçiæ de un scistema ch’o mette o profitto primma da vitta, inquinando e devastando i territöi e e persoñe, into nomme de un concetto de sviluppo infinio inte un mondo de risorse finie.

Pensemmo globalmente e agimmo localmente. No preghiemo i leader de occupâsene; n’an ignorou in passou e conitinuan ignorandone. Viatri no avei ciù scuse, e niatri gh’emmo pöco tempo. Niatri semmo chì pe fâve savei che o cangiamento o l’é derê à arrivâ, ch’o ve piaxe ò no.

Team Fridays for Future Genova