Imparâ à progettâ o sviluppo

L’urtima in ordine de tempo a l’é stæta l’assessoa Simonetta Cenci. Giusto un anno fa, riferindose a-i interventi previsti inte l’äia de Pré (intanto l’é passou un anno…) a diciarava de inspirâse “à quello che l’é stæto fæto inti anni novanta inta zöna de Sant’agostin, ò pensando ciù in grande, co-o çentro de Barçeloña”. O l’é o famoso modello Barçeloña, che ciclicamente o se riporpoñe inta narraçion da politica zeneise, quande a l’é in çerca de slogan che ghe scròllan a pua d’in dòsso, che ghe daggan unn’äia moderna. À l’ombra di platani da rambla, intanto, o resultato de sto “modello” o l’obbligava do 2015 l’alcaldessa Colau à emanâ di provedimenti pe impedî l’avertua de de neuve struttue riçettive, into tentativo de sarvâ un çentro stòrico soffocou da-i turisti. Di quartê intreghi, comme a Berceloneta, son da anni scenäio de manifestaçioin che rivendican pixoin e condiçioin de vitta normali pe-i rexidenti. Quarcösa o s’é streppou, e no da vëi.

Ma cöse o l’é, ò megio, cöse o l’é stæto o modello Barçeloña? E Zena a l’avieiva mai quarcösa da imprende da-a capitale catalaña?

Diversamente da quello che un o l’é portou à pensâ, o modello Barçeloña o no l’é propiamente un modello de çittæ, ma ciutòsto un metodo pe arrivâ a-a construçion collettiva e soçiâ de unna çittæ; a seu stöia, comme tante atre, a l’é però a stöia de un tradimento, do progrescivo allontanâse da un ideale. I soçiòloghi individuan de fæti quattro fase into coscì dito modello Barçeloña, de quæ a primma, ovviamente, a l’é a ciù stimolante.

Semmo inti anni do post-franchismo e a çittæ a l’affronta a diffiçile tranxiçion da l’economia industriale à quella di serviçi, co-a conseguente riconverscion de aree e spaçi. A çittadinansa a l’é attiva e organizzâ. Nasce coscì, da-e riflescioin de çerti urbanisti e architetti (Borja, Busquets, Bohigas, Subiròs) – che avieivan trovou into scindico soçialista Maragall o referente politico – un metodo de pianificaçion parteçipou, co-o propòxito de tegnî conto da un lato de instanse di movimenti soçiæ, e da l’atro da neçescitæ de stimolo de l’attivitæ econòmica. Se parla de urbanismo çittadin e redistributivo: i interesci privæ son veicolæ à l’interno de unna dimenscion ciù ampia, e deçixoin son scompartie, i prinçipæ attoî da vitta politica, colturale, econòmica e soçiâ s’incontran e raxoñan insemme constantemente.

L’é de quelli anni o progetto, coronou da-o successo, de ospitâ e olimpiade do 1992, ch’o segna a creña co-a segonda fase. I enòrmi travaggi neçessäi a-a manifestaçion, a grande sprescia che sempre a î accompagna, caxoñan un rilassamento into spirito soçiâ do modello, pròpio quande questo slogan o comensava à circolâ internaçionalmente. No manca i critichi, comme o scritô Vazquez montalban, che za aloa diciaran mòrto l’ideale, ma a çittadinansa inta seu grande maggioransa a l’ea pervasa da-o “spirito olimpico”, da l’orgheuggio, e solo dòppo a l’à capio che se o ’92 o l’é stæto l’iniçio da dimenscion internaçionâ da çittæ, da seu attrattiva planetäia, o l’à segnou ascì a fin de unna çerta Barçeloña: ciù pövea, ma ciù sincera. Do resto, unna presensa ànnua de turisti ch’a passa da-i doî milioni scarsci de l’iniçio di ’90 a-i quæxi dexe milioni attuali (o doggio, se contemmo i “pernottamenti”), in ciù di doî milioni e mezo de croxeristi, a lascia un segno ch’o no se scancella. Pe dâ un metro, Zena a l’aveiva 430.000 turisti ànnui (e un milione de pernottamenti) do 1995, che do 2016 ean montæ à 835.000 (1,772 mln de pernottamenti) ciù un milione circa de croxeristi. L’é veo che a çittæ de Barçeloña a l’é ciù grande, ma l’äia do çentro stòrico, donde o turismo o se conçentra, a no ô l’é pöi guæi. I effetti se veddan e se contan: o cangio demografico e into tesciuo commerciale o se perçepisce camminando pe-i carroggi; a reduçion di rexidenti (20.000 in meno, in scî 120.000 da Ciutat Vella do 1992) a sata à l’euggio inti censcimenti.

A sbòrnia olimpica a lascia un Commune pin de poffi e no ciù in graddo de astallâ, de tegnî à fren i interesci privæ, e e neuve grendi operaçioin imobiliari no preveddan e quöte de allòggi soçiæ che ean stæte o fondamento do modello Barçeloña. Ma o nomme o sopravive, ançi, o diventa famoso, comme un feticcio da sventolâ pròpio into momento into quæ a realtæ a no risponde ciù à l’idea. A çittæ a vive aloa unna specce de inluxon, ch’a se sostançià into “Forum universâ de Coltue”, a grande manifestaçion ospitâ do 2004.

“Equidistante da davos e da Porto alegre”, inte l’idea di organizzatoî, o Forum o voeiva ëse a celebraçion do modello Barçeloña elevou à ideale politico: a tersa via che o mondo o çercava. Ma o Forum o se rivela o fallimento, perché l’ideale o l’ea mòrto inti fæti; quarche anno dòppo, scilençiosamente, se ne manda in cantiña o nomme ascì, pe sostituîlo con un ciù a-o passo co-i tempi: marco Barçeloña. Finalmente l’inverscion a l’é realizzâ anche inti termini, e coscì finisce a tersa fase – tanto che a quarta a dua ancon, co-i resultati che accennavimo à l’iniçio. Inte un çerto senso a Colau, diventâ popolare comme attivista anti-sfratti, a l’é figgia de sto tradimento.

Vëgne da domandâse, in sciâ fin, quæ de sti periodi emmo in cheu quande sotta a Lanterna se evoca l’esperiensa catalaña. Probabilmente nisciun: semplicemente se invöca pe Zena ascì quante de poxitivo Berçeloña a l’à ottegnuo inti urtimi trent’anni, da l’ëse un riferimento mondiale comme sede pe-i congresci (tersa çittæ a-o mondo), à l’avei risòlto – e ben – o problema da viabilitæ; da-o dinamismo da seu vitta colturale e notturna, a-o pölo tecnològico, che lì o fonçioña e o l’é o chinto d’Euröpa. Ma questo o no l’é o modello Barçeloña. Son i effetti de unna stöia differente, da quæ i megio tratti peuan ëse mutuæ, à Zena comme da de atre parte, anche sensa slogan. Sempre che se segge boin, sempre se sacce quello do quæ se parla. Anche perché Zena, mascime sotta questa amministraçion, a l’é quanto de ciù lontan da l’idea orginâ do modello Barçeloña. E aloa no l’é o caxo de impîsene a bocca, ma se mai ammiâ à quello che se ghe peu imprende.