Tra prexonê politichi e coæ d’independensa

A-i 28 d’arvî 2019, quande in Spagna gh’é stæto e eleçioin pe renovâ o Parlamento, gh’ea ancon neuve prexonê politichi catalen missi drento pe-a question do referendum pe l’indipendensa da Catalogna do primmo de ottobre do 2017. Un referendum convocou da-o Parlamento da Generalitat de Catalunya e da-o sò Governo, elezzuo de mainea democratica da-e e da-i çittadin, e sostegnuo da-a ciù parte da soçietæ catalaña.

A-i 28 d’arvî ean in prexon da 559 giorni o Jordi Sánchez e o Jordi Cuixart (un o l’é o prescidente de l’assemblea nacional Catalana, l’atro o prescidente d’Omnium Cultural; doe assoçiaçioin do catalaniximo militante), i primmi à finî derê a-e bare a-i 16 de ottobre do 2017. A-i 28 d’arvî ean in prexon da 542 giorni ascì o Oriol Junqueras (viçeprescidente do governo catalan) e o Joaquim Forn (conseggê pe l’interno). Da 433 giorni ean in prexon ascì a Dolors Bassa, o Raül Romeva, o Jordi Turull e o Josep Rull (tutti conseggê do mæximo governo); e da 401 giorni a Carme Forcadell (za prescidente do Parlamento catalan). À sta gente beseugna azzonzighe doî atri che son feua sotta sorveliansa (a cauçion a l’é stæta de 100.000 euro) – a Meritxell Borràs e o Carles Mundó (atri doî conseggê do governo) – e sette in exilio – o Carles Puigdemont (za prescidente da Generalitat), o Antoni Comin, o Lluis Puig, a Meritxell Serret, a Clara Ponsatí (anche i atri en tutti conseggê do passou governo), a Anna Gabriel (za deputâ a-o Parlamento regionâ pe-a CUP, Candidatura d’Unitat Popular) e a Marta Rovira (segretäia generâ de ERC, Esquerra Republicana de Catalunya).

Ma femmo quarche passo in derê. Perché neuve persoñe stan à l’ombra, atre doe en feua derê cauçion e ben atre sette son in exilio? En di laddri, di terroristi ò di assascin? No, en professôi universcitai, stòrichi, filòloghi, economisti, psicopedagogisti, filòsofi, educatôi, muxichi... poæ e moæ de famiggia... gente che a l’é esprescion da soçietæ çivile catalaña d’ancheu.

E aloa cöse aivian mai fæto de mâ? Ninte, an solo reclammou comme poscibile l’idea che a Catalogna a poesse vegnî una repubrica indipendente; l’an fæto de mainea democratica e no violenta inte un percorso de ben ben de anni. Se son presentæ a-e eleçioin con quello programma (2015), an fæto un iter instituçionâ con tanto de approvaçion do referendum da parte do Parlamento catalan (2016), donca an convocou a consultaçion pe-o primmo d’ottobre 2017 e dapeu l’an guägna (con ciù de 2 milioin de scì, o 90% e passa di votanti).

Inti giorni ciù cädi do percorso ne an parlou anche i media chì da nitari. Pöi a l’é arrivâ a represcion do Stato spagnòllo e o scilençio in scî media italien e europei. Ancon ancheu quelli politichi catalen restan in prexon ò à l’exilio, sciben che a-i 28 d’arvî do 2019, a-e eleçioin generali spagnolle, o pòpolo catalan o l’agge dito ancon unna vòtta ciæo: lê o veu a repubrica. A-o Parlamento spagnòllo de fæti saian ben 22 i deputæ catalen indipendentisti (do 2016 ean 17); 15 de ERC, ch’o l’é ascì vegnuo à ëse o primmo partio da region (con o 24,73% e ciù de 1 milion di voti), e 7 de Junts per Catalunya, a coaliçion de l’ex prescidente Puigdemont (a-o 12,12% e quæxi mezo milion di voti).

L’asmia a l’é o metodo de piggiâ a poxiçion in mâ pe mezo de l’osservaçion de trei ponti cospicui che se veddan ammiando a còsta.