Nasce “O Stafî”
Libera voxe ligure

Fâ nasce un neuvo giornale o l’è sempre un atto de coraggio. Mascime inte unn’epoca comme questa, donde a çittadinansa a l’è delongo meno attenta, meno portâ à riçercâ i elementi eterogeni e orginæ che servan pe arrivâ à de lettue critiche autònome, che saieivan a base di nòstri scistemi democratichi. Ancon de ciù se o giornale in question o l’è inte unna lengua, comme a zeneise, ch’a l’à patio ciù che atre i effetti di procesci de uniformaçion in atto da-o dòppoguæra, e che a l’à finio pe perde quæxi o diritto de existe inta quella mæxima tæra donde a l’è nasciua.

O Stafî o l’è donca fruto de un atto de coraggio doggio, e inte questo sta a seu urgensa, e l’exigensa de vegnî publicou inta lengua pròpia da Liguria. Continuatô, à livello ideale, di tanti giornali che sciortivan in zeneise do secolo dexineuven, à livello ideològico o se presenta comme un spaçio de libertæ e critica inte un contesto soçiâ e colturale sempre ciù segnou da-o conformismo e da-a perdia de autonomia de raxonamento. Sensa pretende de arrivâ à avei unn’influensa determinante in sce l’opinion publica ligure, se proponemmo da subito de sponciâ perché s’inandie un travaggio importante de redefiniçion de l’imagine che sto Paise o l’à de lê mæximo, perché sto chì o l’è o primmo passo pe qualonque percorso de repiggio. O nòstro giornale, pe dîla inte un mòddo, o l’è un antidoto a-a deprescion ch’a l’attanaggia a Liguria, perché o l’intende portâ o lettô à confrontâse co-a realtæ do paise, coscì comm’a l’è, sensa succao, ma mettendola delongo in relaçion à quella ch’a porrieiva ëse.

No l’è un caxo che e doe paròlle e ciù frequenti inti articoli che compoñan sto numero zero, scriti da autoî diversci pe senscibilitæ e competense, seggian “soçietæ” (e i seu derivæ) e “futuo”. Spontaneamente s’è tracciou a linia de fondo ch’a l’anima o giornale. Un feuggio che, comme deve ëse, o l’à anche unna linia prestabilia, progrescista, ecologista, euroregionalista, attenta a-i effetti negativi do scistema de mercou, ma ascì a-a neçescitæ de sviluppâ e attivitæ che produxan ricchessa, vixiña a-i territöi i ciù marginali, coscì comme a-e manifestaçion da coltua di çentri de çittæ. Da-e pagine do Stafî, numero dòppo numero, emergià coscì unn’idea de Liguria comme progetto averto e differençiou, ben inserio inte dimenscioin internaçionæ che costituiscian l’anima da seu identitæ, e se mai circospetto verso tutto quello che o rapresenta un Stato italian co-o quæ l’è ben repiggiâ fito un rappòrto dialettico e critico. Ma sto chì o no veu dî che no se porrià dâ spaçio ascì à çerte senscibilitæ despægie, perché o senso e a portâ da riflescion che emmo da affrontâ ô domandan. L’indentimento o l’è donca quello de propoñe a-i lettoî di articoli, di contegnui, mai tanto interessanti da portâli à fâ o sfòrso de leze inte unna lengua inta quæ – inta megio de ipòtexi – no son abituæ à leze. In quante a-i argomenti, o Stafî o çerchià de interpretâ, inti limiti do spaçio ch’o l’à a dispoxiçion, e tegnindo conto da temporalitæ de seu sciortie, i grendi temi che interessan a Liguria, segge à l’interno segge à l’esterno. Se no se porrià parlâ de “crònaca”, anando in edicola unna vòtta a-o meise, se parlià però de attualitæ. Questo numero zero, inte sto senso, o l’è za un exempio ciæo de quello che o saià a rivista, quande in autunno a comensià (se arriviemo à 250 abbonæ, comme spiegou ciù avanti e in scî canæ internet) e seu sciortie regolari. A neçescitæ de pensâ à un sviluppo raxonou, pianificou, do territöio, che o l’aiva animou unna grande manifestaçion à Zena i passæ 13 de ottobre, a l’è epressa chì à fianco da-a Camilla Ponzano, co-direttoa do feuggio, con fâ di interessanti paragoin co-o mitològico modello Barçeloña, mensunou tanto de spesso quante abrettio. Sempre in primma pagina o comensa un pesso da anna Vallarino in sciâ question de genere, e in sce comme a vëgne portâ avanti da-i movimenti contemporanei, stante che sto chì o l’è un tema çentrale pe-e nòstre soçietæ. À pagina 2 o Enrico Vigo o spiega quello che tanti no veuan sentîse dî, à propòxito da portualitæ ligure, coscì comme o Anselmo Roveda o racconta i fæti catalen, che pe atre raxoin no se ghe veu dâ a mente ma son egualmente çentrali pe-a riflescion in sciâ direçion de nòstre democraçie. O collettivo de Fridays for Future o scrive da seu esperiensa de attivismo, diffusa inte tutto o mondo, à pagina 3, donde scrivan ascì o Giuseppe Costella, direttô de Defence for Children italia, in sciâ riunion che gh’è tòsto stæta à Zena do Serviçio Soçiâ Internaçionâ, e o Luigi Pesce, in sciô rappòrto che a capitale ligure a l’à (perso) con l’arte. Ancon, a pagina 4, o Emanuele Piccardo o regalla a-o Stafî a primma de seu “recenscioin conlaterali”, donde piggiando sponto da unna mostra, da un libbro, un spettacolo, unna pellicola, o finisce pe parlâ profondamente de niatri, de donde se semmo persci, de donde se poemmo ritrovâ. O resto o se peu scrovî arvindo o giornale.

Unna linia sottî a l’attraversa e seu pagine, e a l’è quella da voentæ de repiggiâ un man o fî de un discorso che questo paise o pâ avei perso da quarche dexennio. Ma che comme mostra ascì, into seu piccin, a nascita do Stafî, o no s’è ancon interrotto.