“Filling the void”

Zena a vive un periodo stòrico de grande difficoltæ, e a causa a no l’à à vedde solo co-o cròllo do viadotto in sciô Ponçeivia, ma con l’impoveimento colturale da seu classe dirigente, imprenditoriale e politica. Tutte colpevoli de avei pöche idee e confuse. Coscì inte l’erco de l’urtimo ventennio, pe tentâ de risòlve e questioin prinçipali, se ghe affida ciclicamente a-o sæximo do Renzo Piano, comme inte l’urtimo caxo con l’enneximo recupero do fronte levante do pòrto, perché chi o dovieiva o no l’é bon à elaborâ un progetto de sviluppo pluriennale. Inte sto mòddo i politichi, supportæ da-i imprenditoî, domandan à un archiettto de çerne a-o seu pòsto o futuo da çittæ; unna prattica usâ solo pe gestî o consenso.

Ma unna çittæ sensa idee a l’é unna çittæ mòrta, privâ de futuo. O futuo o l’é quello ipotizzou da l’artista american Peter Fend, che dòppo o cròllo do viadotto o l’à imaginou Zena comme pòrto/pòrta de l’Afrega pe mezo da construçion de unna ferrovia che i cineixi son apreuvo à realizzâ pròpio in Afrega. A vixon do Fend a se contrappoñe à quella de l’architetto Yona Friedman, o quæ o l’à riflettuo in sciô ròllo de infrastruttue into progetto Global Biosphere Infrastructure donde o concepisce e infrastruttue nuvia “basæ essençialmente in sce quelle neuve tecnologie che son indipendenti da l’uso diretto da tæra, comme i panelli solæ, e batterie compatte, i contenitoî pe l’ægua ciuvaña, i cloud de informaçioin”. Tutti doî an parteçipou a-a mostra Filling the absence cuâ da-o Andrea Canziani e da-o sottoscrito pe-a galleria Piknsummer, inçentrâ in scê vixoin post-crollo do viadotto.

Ancon unna vòtta i artisti, sorvitutto into caxo do Fend, riëscian à imaginâ megio da politica o futuo da çittæ. Defæti inti passæ meixi de arvî vegniva annonçiou l’accòrdio Italia-Ciña in sciâ neuva Via da Sæa, donde Zena e o seu pòrto provian à dî a seu (veddi pag 2, ndr). L’assensa de futuo a vëgne rimarcâ ascì inte l’incapaçitæ de fâ esperiensa di erroî sensa fermâse à riflette, ma affermando pe bocca di politichi che beseugna fâ fito, sciben che a sprescia a no l’é mai unna boña conseggea.

Inta sta scituaçion de degraddo colturale e soçiâ un ròllo deçixivo ghe l’à sorviatutto l’emittente televixiva Primocanale, portavoxe da politica do governo sensa assummise l’ònere de fornî a-i çittadin ponti de vista critichi, analizzando i fæti con distacco e equitæ. O caxo do cròllo do viadotto o l’é exemplare: nisciuña voxe dissonante a l’é stæta rapresentâ se no quella di sfollæ, da deuviâ strumentalmente pe fâ audience e rimarcâ o finto ròllo “pubrico” – in realtæ speculativo – de Primocanale, into sostegnî façiosamente unna parte politica.

Zena a l’é angonizzante sotta tutti i ponti de vista, ma nisciun o s’â dà, tutto va ben e o l’é mäveggioso; aumenta i disoccupæ in Val Ponçeivia che an patio o contraccorpo do cròllo do viadotto, o progetto do Fronte Levante do pòrto o l’é fermo, i parchi de Nervi son abandonæ sensa nisciuña manutençion coscì comme i atri parchi publichi, o museo Luzzati e o museo de Villa Croce (veddi pag 3, ndr) son serræ, à dimostraçion de l’insenscibilitæ de l’amministraçion Bucci verso a coltua. Ma o fæto grave o l’é l’indifferensa di zeneixi, delongo pronti à mobilitâse, con spiccâ demagogia, in scî grendi temi comme quello di migranti, ma mai pe-i seu e i nòstri temi. No gh’é stæto manifestçioin contro o serrâ de l’unico museo de arte contemporanea ò contra o degraddo di parchi publichi. Incangio ascistemmo a-e sparate do scindico in sciâ seu “vixon” futua da çittæ: da-a gabiñovia pòrto-Fòrte Begæ (comme o Montjuic de Barçeloña) con un grande impatto in sciô paisaggio, e do quæ i benefiçi ghe l’avià solo o gestô de l’impianto; a-a tranvia sorvielevâ in Val Besagno, che â construian into rian alluvionale e magara da chì à vint’anni, stante i tempi co-i quæ an realizzou a metropolitaña. E ancon o concorso de progettaçion pe l’äia sottastante o neuvo viadotto in sciô Ponçeivia donde con un parco, unna pista ciclabile e un distreito tecnològico (quande ancon an da partî i Erzelli…) se risòlve i problemi da Ponçeivia.

Ma va tutto ben.