Serviçio Soçiâ Internaçionâ

Inte un momento da nòstra stöia into quæ o sponcion a-o serrâ i confin, a-a seguessa determinâ da di meccanismi de escluxon, a-o taggio da speisa soçiâ, vëgne propòsto comme soluçion e strategia prioritäia, Zena a tenta unn’avertua a-o mondo.

Da-i 13 a-i 18 de mazzo passæ a çittæ a l’à ospitou o summit mondiale do Serviçio Soçiâ Internaçionâ, unn’organizzaçion fondâ do 1924 e ch’a l’òpera inte ciù de 120 Paixi inti diversci continenti, pe aggiuttâ figgeu, famigge e persoñe coinvòlte inte de problematiche soçiæ, de carattere trasnfrontaliero ascì, à livello regionale e globale.

L’organizzaçion a l’òpera in sinergia con Defence for Children Italia e a l’à a sede inta capitale ligure. E doe agençie an inscistio pe realizzâ sta riunion globale à Zena co-a voentæ de ribadî a vocaçion internaçionâ do leugo e, into fratempo, pe regordâ comme l’attençion a-e dinamiche do contesto soçiâ a deve constituî o cheu de qualsiasi politica e modello de sviluppo emançipou e sostegnibile into tempo.

A presensa de di delegæ e di rapresentanti di scistemi de welfare da Euröpa, America, Asia, Afrega e Oceania a l’à vosciuo sollecitâ unna specifica riflescion in sce comme o sviluppo, a cua e o repiggio de qualsiasi territöio devan ëse informæ e accompagnæ da unn’analixi e unn’osservaçion soçiâ pontoali e competenti, coscì da restâ streitamente connesse a-o territöio, a-i beseugni de persoñe che ghe stan e à unn’idea de benestâ ch’a domanda de trovâ prospettive concrete e applicaçioin prattiche.

O cròllo do “ponte Morandi”, a neçescitæ da seu ricontruçion, se propoñan comme unna drammatica metafora pe dimostrâ comme o sviluppo o no pòsse ëse conçepio “in sciâ testa” de persoñe. A-o mæximo mòddo sta presensa internaçionâ a l’à inteiso suggerî comme tutti i cien de crescita de unna çittæ e de unna region devan ëse delongo sostegnui da unn’architettura e da unn’inzegneria soçiâ complessa che, into breve coscì comme into medio e into longo periodo, pòssan prevegnî drammi, sofferense e costi de entitæ scignificativa.

A presensa de di delegæ e di rapresentanti di scistemi de welfare da-i çinque continenti, coscì comme a ræ de relaçioin internaçionæ che o Commun e a region, incontræ offiçialmente into corso da settemaña de travaggi, avian a poscibilitæ de consolidâse into tempo, e an sponciou à consciderâ comme e questioin soçiæ devan ëse affrontæ à traverso de competense qualificæ e di specifichi strumenti, in adottâ de modalitæ “ecològiche”, parteçipative e fondæ in sciô diritto, pe rimette a-o çentro de chesesegge mappa de sviluppo l’individuo e a communitæ.

Oltre a poscibilitæ de connette in tempo reale i serviçi soçiali do nòstro terriöio con di serviçi omòloghi inte chesesegge parte do mondo, o Serviçio Soçiâ Internaçionâ o propoñe à Zena e a-a Liguria l’opportunitæ de emançipâ i seu serviçi e e seu strategie soçiæ à traverso o confronto e a formaçion in sce politiche, prattiche e strumenti elaboræ à livello transnaçionâ in sce l’adoçion, l’affidamento, l’accoliensa, a mediaçion familiâ, a gestion da giustiçia minorile.

À concluxon de l’incontro l’öguio di organizzatoî o l’é quello de avei averto un barcon de opportunitæ in sciô mondo pe contribuî a-a realizzaçion de un modello soçiâ territoiale avansou, incluxivo e averto, comme l’orizzonte che Zena e a Liguria s’attreuvan da sempre à miâ.