Via da Sæa pe mâ
Zena a rischia de restâ feua

Zena l’é sempre stæta, storicamente, unna pòrta di trafeghi cineixi, e no se n’accorzemmo solo oua; cineixi che an ascì a fortuña de aveighe de relaçioin locali consolidæ con unna societæ blasonâ che a l’affonda e seu reixe inte quæxi doî secoli de stöia do shipping italian de successo, con a-a seu guidda un galantòmmo vegia mainea quæ o l’é o Agusto Cosulich, un di pöchi cavalli de rassa, de unna famiggia de antighe origine triestiñe.

L’aumento enòrme di trafegi cineixi inti urtimi 20 anni, o sviluppo sensa fin de un paise che ancheu o conta un miliardo e quattroçento milioni de abitanti, e e previxoin de crescita an constreito e autoritæ cineixi à pianificâ a poscibilitæ de razzonze i mercoei mondiali con volummi crescenti de merçe, seguii da paixi de tutto o mondo determinæ à bilanciâ i volummi import con quelli export. O raddoppio da capaçitæ do canâ de Suez o l’à dæto neuvo asbrio a-a Via Mediterranea pe l’Euröpa, e a-a Via Mediterranea pe-a Ciña; un passo importante, ma che o va integrou con un importante adeguamento de infrastruttue di nòstri pòrti, evitando a sòlita disperscion abrettio di investimenti, ch’a caratterizza in negativo o scistema Italia. Pe questo, pe governâ i procesci e evitâ a barbarie de unna crescita incontrollâ e sbilanciâ, inte tutto o mondo – insemme a-e autoritæ doganali – gh’é un tentativo de indirissâ in mòddo equo o flusso de merçe.

Inte sta revoluçion commerciale Zena pe oua a l’é destinâ a restâ a-i margini, constreita inti spaçi streiti de seu poxiçioin tradiçionali, sensa contâ che i incrementi poscibili son in perçentuale sotta a media mondiale pe caxon da carensa de infrastruttue che son in progetto ò in cantê, ma delongo in fòrte ritardio. “Terzo Valico”, “Nodo di Genova”, urtimo miggio portuale, quadroplicamento da Pavia-Milan, upgrading into nòrd milaneise, son tutte òpere ferroviäie sensa e quæ a competitivitæ do pòrto de Zena a resta inadeguâ. O baçî de utensa do pòrto o l’é confinou à l’erco arpin ò pöco de ciù, co-o rischio de perde trafeghi visto che a Svissera a l’é apreuvo à completâ i tunnel ferroviäi di ALP TRANSIT, che pe-o momento fonçioñan à favô di pòrti do nòrd euröpa.

A no l’é meno importante a question doganale, o sportello unico doganale, l’appròccio doganale da parte de autoritæ, i organichi prepòsti a-i contròlli e l’armonizzaçion con quanto ciù efficacemente in nòrd Euröpa o vëgne fæto con un euggio de riguardo a-i tempi, sensa pe questo sacrificâ o diritto de l’Agenzia delle Dogane e dei Monopoli de fâ o seu mestê, into mòddo ciù corretto e efficace poscibile, à proteçion in davei do commercio mondiale. Inte tutta franchessa beseugna ammette che o pòrto de Trieste o resulta a-o momento avvantaggiou da de infrastruttue ferroviäie ciù idònee, sciben che o scâ giulian o parrieiva lê ascì paralizzou à l’oa de declinâ o seu futuo, da un tesciuo ciù bon à rincianze e recriminâ o passou asburgico che no à miâ avanti.

À Zena s’é fæto un muggio de sciato pe ninte. Se capisce, inte sta fase ascì i parlamenti co-e autoritæ locali e statali son importanti, ma no se poemmo oggettivamente aspëtâ guæi guæi. Unna cösa a l’é segua: i cineixi no regallan ninte, e o seu “brasso curto” o l’é proverbiale quæxi quanto quello ligure. I cineixi son intræ pe urtimi inta compagine ch’a gestià o pòrto de Voæ (Vado Ligure), dòppo i daneixi de Maersk, e veddiemo sa saian boin ò no de interagî co-o tesciuo econòmico e soçiâ locale. Zena, mæ pai, a restià à bocca sciuta, comme da tradiçion secolare, sorviatutto s’a no capià che o superamento do conservatorismo e do mercou serrou son di fattoî indispensabili pe attrâ di investimenti. Da-i cinexi saieiva incangio gradio, e ô diggo sensa timoî reverençiæ, un investimento industriale à Zena inta produçion de batterie de litio pe-e auto elettriche, donde ancheu son i leader mondiali incontrastæ.

Te ô lì un segnale veo che Zena a dovieiva lottâ pe avei, ma à tutte e mainee da chì scin a-o 2026 aviemo incrementi de trafego limitæ; solo dòppo saià poscibile pe-i pòrti liguri che a s’arve a poscibilitæ de aggredî di neuvi trafeghi. Tutte e poie agitæ attorno a-a Via da Sæa pe Zena son scemmaie; no pe questo à livello statale ò europeo no l’é conveniente poñise di problemi politichi e de equilibrio di commercio internaçionæ, ma sta chì a l’é tutta unn’atra stöia. Intanto a Via da Sæa in sarsa zeneise a saià poscibile e proficua solo se i cinexi (e no solo liatri) deçiddian de arvî a borsa, in sciâ fin, con sfatâ a proverbiale nominata de gente pöco attenta à l’indispensabile dialogo co-i territöi.