Zena e l'arte, quande unna çittæ a perde o fî

Unna çittæ austera e riservâ, allergica à l'idea de "evento", à l'exibiçion de lê e che de spesso a sconfonde a fantaxia co-a stravagansa superflua, a no peu aveighe con l'arte contemporanea un rappòrto façile. A megio preuva a l'é l'assensa totale de un spaçio pubrico strutturou in mainea decorosa e ch'o se mesce inte un circoito armeno naçionâ. O "Museo di Villa Croce", sciben i sfòrsci eròichi da vegia cuatoa Ilaria Bonacossa, ancheu o l'é inte de condiçioin gestionali pietose, e o l'é stæto scenäio de polemiche meschiñe dëgne de piccolo commun dissestou e desfæto pe mafia. Con tutto, comme succede sovente, o pubrico o no l'é atro che l'imbatto amplificou de l'inadeguatessa do circoito privou. E, in effetti, i urtimi schitti scignificativi de unna galleria d'arte verso a contemporaneitæ beseugna riçercâli inti lonten anni '60, a-i tempi da "Galleria Bertesa" e di seu doî fondatoî Francesco Masnata e Nicola Trentalance, i quæ ean riescii à portâ à Zena a Pop Art americaña (1966) e à produe, insemme à Germano Celant, a primma mostra de arte Pövia in Italia (1967). Un primmato de importansa no trascurabile che i zeneixi an comonque consciderou delongo comme distante da liatri. Parlemmo donca de ciù de 50 anni, che into mondo de l'arte l'é comme se fïse preistöia. Da alantô, se se lascia feua a "Martini e Ronchetti" de via Romma, a propòsta de gallerie çittadiñe a l'é diventâ de unna modestia colturale imbarassante, con limitâse areo a-a vendita de di travaggi modesti con fonçioin prinçipalmente decorative. E gallerie da giornâ d'ancheu son coscì di puri leughi de smistamento de grafiche de artisti de ters'ordine, de disegnetti e scarabòcci de scarso valô, de fotografie de paisaggi pe arredâ e stançie confòrmi da borghexia attuale, fòscia a ciù sfinia e ignorante che sta çittæ a l'agge mai produto.

Sensa sconfinâ inte unna soçiologia a-a bellemegio, beseugna convegnî che in realtæ l'upperclass zeneise a no s'é mai in davei interessâ a-o contemporaneo. Za da-o XIX secolo a çittæ a l'ea artisticamente mòrta, e quande intorno a-o 1910 nasceiva o Futurismo, urtima grande corrente italiaña, Zena a l'aiva za passou à Milan o primmato de çittæ moderna. A seu çimma artistica a l'aiva visciua ben primma, inta feliçe contaminaçion di modelli fiamminghi co-a coltua figurativa italiaña. Aloa scì che, into XVI e XVII secolo, o colleçionismo zeneise o l'ea in davei contemporaneo: gh'ea commesse pubriche e privæ pe-i megio artisti europëi e a çittæ a l'ea unna metròpoli ch'a viveiva o presente inta piña consapevolessa da seu pròpia grandessa. L'upperclass de ancheu a pâ ëse mentalmente devastâ da sto passou ingombrante, tanto da no riescî à vive a seu contemporaneitæ, ricarcando e orme – de spesso manco compreise areo – do grande patriçiato çittadin de trexento ò quattroçento anni fa. E coscì, a nòstra borghexia – industriosa, ma sensa coraggio, e ormai datâ inti mòddi e inte l'idea de impreisa – a subisce a morbosa fascinaçion da vegia repubrica, e a vëgne soventi sedotta da l'idea de mettise sorvia o divan un dipinto do Bernardo Stròssi, do Valerio Castello ò do Lusciandro Magnasco, ciutòsto che d'un artista contemporaneo. Quæxi che, pe osmoxi, poessan giovâse liatri ascì do prestigio de grendi famigge do passou. Ghe saieiva da rie pe sto gio mentale grottesco se no ghe fïse in davei urgensa de svòlze un lou educativo pe comprende cöse a segge stæta sta çittæ. Perché sensa unna consapevolessa meuia da stöia no gh'é mòddo de sciortî da-a dimenscion de provinsa crònica inta quæ semmo cheiti da quarche dexennio.

Inte sto senso un travaggio ecceçionâ o l'é apreuo à fâlo, inte un scilençio sciuto e discprinou, o "Museo di Palazzo Spinola" che, insemme à "Palazzo Reale" (i unichi doî musëi statali presenti in çittæ), an inandiou o progetto de constituî unna "Galleria Nazionale della Liguria". Un progetto ambiçioso, fæto de valorizzaçion de quello che o l'é za de propietæ pubrica, e importanti acquixiçioin de capolavori ancheu in man à di privæ.

Seguo, à questo saieiva utile affiancâghe un progetto communale de valorizzaçion e conoscensa do sviluppo urbanistico da çittæ, conçentrandose in sciâ grande assente da divulgaçion corrente: o medioevo, veo e pròpio cheu stòrico da grandessa da Superba. Ma scin à oua i insegnamenti do Ennio Poleggi pâ che no aggian lasciou nisciun segno in scê urtime amministraçioin çittadiñe.