Atri 12 anni de Luzzati

L’äia inta quæ òperan i Giardini Luzzati pe ciù de çinquant’anni a l’é stæta un muggio de zetto, lasciou da-e bombe da Segonda Guæra Mondiale. Finii i travaggi de riqualificaçion, inti primmi anni do neuvo millennio, a ciassa, sciben a seu veste urbanistica, a l’é parsciua ancon prexonea da connotaçion negativa che a l’à caratterizzouà longo sti pòsti, continuando à ëse preda da microcriminalitæ. I Giardini an attraversou coscì unna fase de inçertessa, durante a quæ l’assoçiaçion ch’a l’aiva guägno o bando promòsso da-o Commun pe-a gestion di spaçi, a no riesciva solo co-e seu fòrse à affrontâ a complescitæ do territöio e à promeuvine unna frequentaçion poxitiva.

Do 2012 o Ce.Sto. o l’à intuio comme inte sto pòsto tormentou ma ricco de stöia se poesse reconstruî un tòcco da neuva identitæ da nòstra çittæ. A scommissa a conscisteiva into provâ à intressâ e prefonde reixe popolari zeneixi di carroggi co-e coltue emergenti, tradiçion e sperimentaçion, renoelando a vocaçion meticcia e accoliente de Zena. Ancheu, dòppo sette anni de intenso travaggio e sperimentaçion, i Giardini Luzzati son un pòsto vivace de aggregaçion, reconosciuo da tutta a çittæ, che o l’à racuggeito interesse e appressamenti in Italia e in Euröpa, da parte de chi se òccupa de rigeneraçion urbaña. Gh’é o campetto da ballon, gh’é o circolo-bar, donde treuvan lou e spaçio i figgeu diversamente abili e i domandanti asilo in formaçion, e inta parte de d’ato da ciassa emmo inandiou un òrto urban; crescian delongo e attivitæ rivòlte à tutte e generaçioin: a ciassa a l’é à dispoxiçion tutto l’anno à favô de assoçiaçioin no profit.

A nòstra ambiçion a l’é quella de dâ vitta inte sta ciassa à di eventi colturali de livello sempre ciù erto, che lascian o segno pe qualitæ e originalitæ, e che seggian fruibili de badda da tutti/e. Da un pâ de anni emmo comensou à fâlo con unna rassegna settemanâ, e Charlas, che a l’à portou a-i Luzzati nommi importanti da scena locale e italiaña, e a l’à fæto discute insemme miggiæa de persoñe. Un fæto scignificativo inte un contesto sòçio-colturale vegnuo delongo ciù pöveo.

I Giardini Luzzati, però, no se pensan solo comme un circolo, e manco solo comme unna ciassa, con tutto che viva e parteçipâ, quanto ciutòsto comme un soggetto animatô de unna ræ territoiale che a l’à l’obiettivo de prescidiâ e rigenerâ unna parte, belliscima e fragile, do Çentro Stòrico. Unna ræ che a coinvòlze da-e realtæ scolastiche a-o variegou mondo de çittadinansa attiva, da-i artisti a-o mondo da coltua e di savei, scin a-i çittadin ciù semplici e ch’an beseugno de arrembo soçiale.

Con sta consapevolessa, e sentindo sta responsabilitæ, emmo affrontou o confronto co-o Commun riguardo o reneuvo da convençion. E chinzemia firme raccuggeite à nòstro sostegno, de sempliçi çittadin e de nommi conosciui ò avvoxæ, n’an dimostrou – e an dimostrou à l’amministraçion communale – che sto tipo de gestion soçiale no solo o doveiva anâ avanti, ma o doveiva cresce, qualificando o seu profî originale e soçiale.

A-a fin a l’à vinto Zena. A l’à vinto unna communitæ, un territöio. An guägno tutti quelli che, vivan dondesesegge, veuan unna çittæ ciù gentile, bella, solidale. Oua no n’arresta che construî insemme o futuo.