“Fâ coltua” à Zena e in Liguria

Comme peu a coltua inandiâ di procesci generativi e transformativi de un territöi? Vivemmo inte un mondo iperconnesso, basou in sciâ lògica do feedback, mediou a-a spedia da di dispoxitivi ciù ò meno efficaci che abilitan di meccanismi inediti de relaçion e de potere. Semmo communitæ fluide governæ da-a capaçitæ de relaçion ò, comme scrive o Ezio Manzini into seu libbro “Politiche del quotidiano” (Edizioni di Comunità, 2018), poemmo definîse “communitæ de scöpo, a quæ raxon d’ëse a l’é quella de òccupâse do pòsto into quæ se trovemmo”. Comme tutte e communitæ contemporanee, semmo unna communitæ averta, legia e internaçionâ.

O mæximo o vâ pe-o pòsto che o produxe, che o no l’existe solo perché “o l’é delongo existio”, comme pe-i pòsti do passou, ma perché quarchidun o l’à fæto intençionalmente quarcösa pe fâlo existe. Dita diversamente, e communitæ internaçionæ produxan di pòsti internaçionæ. Internaçionalitæ, donca.

Che ròllo gh’à i progetti artistichi inte l’açion civica e inta generaçion de impatto colturale, in sciâ dimenscion da çittæ? Audience developper, communitæ manager, urban planner, cultural project manager, service designer, sono solo çerti di “neuvi” travaggi colturali che intercettan o capitale de relaçioin de unna çittæ – tema co-o quæ à fin do 2019 emmo averto Electropark, a-o Paxo. Un progetto e un festival ch’o l’à intrapreiso into tempo l’obiettivo de “attivâ communitæ” inte di pòsti da-o potençiâ no espresso, pe inandiâ de opportunitæ de sviluppo locale, passando da l’ëse solo festival-oggetto do quæ fruî, à festival-instrumento ch’o l’abilita neuve forme de parteçipaçion colturale.

Produe coltua drento à un quartê, fïse anche solo che de relaçioin, ne poñe inte un ròllo de façilitaçion. O sfòrso o l’é quello de riescî à ëse legittimæ sensa fâse perçepî ni alieni, ni do tutto parte do contesto, à pao de chi o stà-loua- consumma tutti i giorni in sce quello territöio.

Legittimaçion, donca, e rapresentansa. Dapeu, se sente parlâ de spesso de capacity manager – termine anglosascion ch’o descrive l’attivitæ de construçion de competense – ò de empowerment – quande se parteçipa à un proçesso de crescita personale ò organizzativa/gestionâ – mascime into settô colturale, impegnou inti urtimi anni à tracciâ unna linia de sviluppo de seu risorse (umañe, tecniche, econòmiche e, aponto, relaçionali) verso a construçion de un mercou (colturale) pægio a-i atri scistemi produttivi de scangio de ben e serviçi. Capaçitæ, donca, e capaçitaçion.

E in Liguria cöse succede? A Pubrica Amministraçion a l’ambisce à portâ internaçionalitæ e a ciamma vege e neuve generaçion à fruî de grendi manifestaçioin “colturali” de ciassa, orientando a seu açion politica verso a creaçion sensa sòsta do consenso, pensceo poxitivo e rigeneraçion veloce. A “Compagnia di San Paolo” a l’investe in sciô territöio e in scî seu çittadin, in scî profescionisti da coltua zeneixi e liguri, accompagnando e organizzaçioin e e instituçioin colturali à fâ ræ e à innovâ e seu prattiche de produçion e valorizzaçion colturale. E impreise privæ che investan in coltua no son pervegnue.

L’é donca evidente, pe-o futuo, a neçescitæ de reciammâ i diversci ròlli di lavoratoî colturali, protagonisti rexistenti e attivisti scilençioxi, bricoleur do neuvo millennio con de vixoin e di obiettivi averti tanto che basta pe vegnî modellæ into tempo. Piggemmose o tempo pe continuâ à construî un patrimònio de savei, de educaçion a-a coltua de neuve generaçioin pe legittimâ o settô colturale inte politiche de çittæ. Se tratta da responsabilitæ (anche) politica – into senso de “polis-çittæ”, da çittadin con atri çittadin e a collettivitæ – de arvî de neuve poscibilitæ de co-creaçion ò de co-gestion, pe valorizzâ e risorse, anche relaçionali, do nòstro territöio.