I pòrti da Liguria
Primma fabrica d’Italia in cangio de ninte

O l'é un grande, stramesuou abbrasso, che o dua da di secoli, quello ch’o strenze a çittæ de Zena a-o seu pòrto e viçeversa, unna stöia de amô e òdio ch’a dua da sempre. Amô, perché o pòrto de Zena o l’à delongo construio e fortuñe de sta çittæ, di seu mercanti, di seu banchê, ma ascì de mille profescioin che da-o pòrto son nasciue e se son misse à giorno scin à ancheu, quande ancon tante de queste continuan à existe, sciben che profondamente cangiæ. Òdio, perché tutti i grendiamoî patiscian di momenti de crixi, de vòtte caxonæ da incomprenscioin ò giöxie.

Zena, tanto in giornâ comme alantô, a l’é a çittæ do Pòrto o ciù importante d’Italia, e un di ciù importanti d’Euröpa. Co-o quinto pòsto à livello europeo, o nòstro Pòrto o l’é a-o çentro di interesci di maggioî gruppi internaçionæ do shipping che an deçiso de portâ chì i seu çentri direçionali pe l’Euröpa e o Mediterraneo, di prinçipali operatoî da logistica – segge italiaña, segge mondiale – e de quella di marketplace de l’e-commerce che an comensou à miâ con interesse a-o nòstro territöio comme sede pe ospitâ i seu avveniristichi çentri logistichi. Ma no solo: Zena a l’é o pòrto di ciù importanti cantê nautichi italien, di trafeghi de rinfuse, da nautica da dipòrto, do turismo co-i ferribòtte e e nave da croxea, di serviçi a-e merçe e a-e nave, do travaggio portuale con competense uniche.

Sto grandiscimo patrimònio, che a çittæ a l’avvarda into seu cheu e à l’interno do seu territöio, o rapresenta in giornâ o primmo datô de travaggio da region. Ancon ancheu travaggian into pòrto, tra occupæ diretti e indiretti, ciù de 56mia persoñe, che diventan 120mia se ammiemmo a-i pòsti de travaggio che o pòrto de Zena o genera inte tutto o Nòrd-Òvest italian.

Ecco donca che sto magnifico tesöo, cheu ch’o batte da sempre da nòstra economia e do nòstro territöio, insemme a-i atri scæ da Liguria, o l’é diventou importante pe tutta l’economia italiaña. Co-i seu 2,6 milioin de contegnitoî movimentæ, o pòrto de Zena o l’é ascì o primmo contribuente do Stato italian, con ciù de 4,4 miliardi de euro incasciæ pe l’import e l’export de merçe che, se sommæ a-o trafego da Spezza e de Saña, diventan ciù de 7,7 miliardi: ciù do 66% de quello che o Stato italian o l’incascia tutti i anni pe sto tipo de attivitæ.

Poxiçionou strategicamente à 150 chilòmetri da-o cheu do Nòrd-Òvest italian, che o conta ciù de 16 milioin de consummatoî, e à 300 chilòmetri da-o cheu de l’Euröpa (o pòrto o ciù vexin do Nòrd Euröpa o l’é o doggio ciù distante) che o conta ciù de 300 milioin de consummatoî, o nòstro pòrto l’é ancheu potençialmente a pòrta d’intrâ a-o segondo ciù importante mercou do mondo, quello europeo. Ve ô lì perché ancheu diventa primmäio garantî de ræ de communicaçion, segge straddali che ferroviäie, arvî e nòstre valle à attivitæ e serviçi moderni, che into rispetto de l’ambiente e da natua mettan à giorno o nòstro territöio a-e sfidde do futuo. O desastro do Morandi, primma, e di viaduti e de gallerie, ciù de recente, devan ëse unn’opportunitæ pe mette à giorno e infrastruttue do nòstro territöio inte unna ciave ciù moderna e interconnessa co-o resto de l’Euröpa. E straordenäie competense tecnològiche e inzegneristiche che o nòstro territöio o l’esprimme, tra l’atro, graçie a-i Erzelli e à l’IIT, devan vegnî misse a-o serviçio da unna vixon globâ, ch’a fa da Liguria e de Zena unna çittæ a-o çentro de l’Euröpa, sponciâ e sostegnua inte sto seu asbrio da-a Blue Economy e da-o ITC (transpòrto intermoddâ).

Emmo da dâ entuxiasmo a-i zoeni, emmo da mette à giorno i nòstri modelli universcitäi, addattandoli a-i paradigmi internaçionæ, e dovemmo inandiâ de Academy speçialistiche che includdan inte un unicum formativo, zoeni e impreise. O progresso e o crescio de l’economia devan riflettise in sciô territöio, graçie a-o sviluppo de unna consapevolessa renoelâ do ròllo de l’economia portuale. Coscì comme za in giornâ succede in Fransa, Spagna, Olanda e Polònia, l’Italia ascì a deve scommette in sciâ portualitæ e in sciâ logistica pe garantî che l’economia a cresce, a soçietæ a se sviluppa e l’occupaçion a l’aumenta. Sto crescio o peu partî solo da chì: da Zena, da-a Liguria e da-i nòstri pòrti. Ve ô lì perché, ancheu ciù che mai, tornemmo à strenzise intorno à questi, pe sostegnîli inte sta sfidda impegnativa pe-o futuo.