I zoeni e l’ambiente

Capita ancon tròppo de spesso che parlando di Friday for Future çerte persoñe no ne conoscian, e sto chì o â dixe longa in sciô senso de emergensa che se vive, ma into gio de un anno emmo rivoluçionou o mòddo de consciderâ i zoeni, l’ambiente e o futuo, e semmo solo che a-o comenso.

I 27 de settembre passæ à protestâ inte ciasse de tutto o mondo eimo ciù de 8,6 milioin de persoñe, battendo o record da preçedente manifestaçion globâ do 15 de marso.

À distansa de squæxi un anno da-a primma manifestaçion globâ emmo ottegnuo tanto, ma veddemmo ascì cresce tanti ostacoli, no urtimo o resultato da COP25 che, tòsto finia, a l’à fæto vive tra niatri zoeni un mesccio de raggia e deluxon. A sciensa a l’à elevou a-o mascimo l’allerta in termini de rischi climmatichi, che l’umanitæ a constrenze o planeta à affrontâ: l’é stæto açertou che à sto ritmo avanti do 2050 o rescädamento globâ o superià i trei graddi çentigradi, caxonando de alteraçioin fatali de l’ecoscistema e de migraçioin stramesuæ, da armeno un miliardo de persoñe. Comme se no bastesse, se trovemmo inte un quaddro geopolitico in davei pescimo, donde USA, Ciña e India sghindan a conlaboaçion. St’incontro o doveiva poñe e baxi pe affrontâ a crixi climmatica, e incangio o finisce con un generico appello e sensa deçixoin operative.

A scituaçion ambientale e climmatica no son mai stæte pezo. “No n’an capio! A pròscima manifestaçion sbraggiemo ciù fòrte che porriemo! No gh’emmo ciù de tempo!”, crian i nòstri attivisti. I obiettivi, che i paixi se son dæti pe restâ sotta à un aumento de temperatua de 2 graddi, no son ancon à basta; e soluçioin pe cangiâ rotta existan, ma a miopia politica, l’aviditæ econòmica e o desinteresse da soçietæ ne blòccan l’applicaçion.

In Australia i feughi an caxonou 12 vittime, 5 despersci, mezo miliardo de bestie mòrte, ciù de 5 milioin de ettari de biodiverscitæ primmäia pe-o planeta anæti in fumme, dëxeñe de miggiæa de persoñe apreuvo à scappâ; Scott Morrison, o primmo ministro, o l’à finarmente ammisso o ligamme tra sti incendi e i cangi climmatichi, ma o l’à refuou à tutti i mòddi de tornâ in derê in sciâ seu politica à favô de l’industria do carbon. Son ste chì e persoñe a-e quæ se gh’é lasciou o mondo inte man. E, à livello locale, no semmo missi megio. L’Italia defæti a l’é o paise europeo ciù corpio da-i effetti di cangi climmatichi, ma a se mescia tròppo lentamente: into decretto approvou (162/19, dito millepròroghe) manca unn’impostaçion concreta verso o cangio climmatico, coscì comme l’attuale Piano integrato energia e clima (Pniec) o no prevedde manco a decarbonizzaçion avanti do 2050.

Intanto in Liguria, a region fòscia a ciù corpia d’Italia, a prioritæ pe-a Giunta Regionale a l’é quella de taggiâ e serrâ i parchi, mentre o nòstro territöio o vëgne zu; de promeuve o trafego in sce gomma e o crescio de attivitæ portuali sensa un disegno, pe fâ dapeu i blòcchi a-o trafego pe l’inquinamento. Sto modello attuale o no l’é sostegnibile, con sti consummi, con ste tecnologie e con sta popolaçion; o comportamento da politica o no va inta giusta direçion.