L’Uruguay o vira à drita e o l’intra into dòppo-Mujica

Paiva che o piccolo Uruguay o dovesse anâ apreuvo à l’Argentiña, donde a-e urtime eleçioin unna coaliçion de fòrse progresciste a l’à scorrio o governo liberista de Mauricio Macri. Ma mentre ben ben de paixi de l’America vëgnan scrollæ da di imponenti movimenti popolari che contestan liberisimo, austeritæ e autoritarismo, i 24 de novembre passæ l’Uruguay o l’à premmiou o candidou da drita Lecalle Pou (50,8%) contra quello do “Frente Ampio” Daniel Martínez (49,2%).

Inti anni passæ o çentroscinistra guiddou da l’ex guerriggê Pepe Mujica e da-o ciù moderou Tabaré Vásquez o l’à tegnuo o paise a-o coverto da-a crixi econòmica e soçiale che a fava l’abisso inti paixi vexin, o l’à asseguou un crescio constante do PIL, di saläi (+55% inte 15 anni) e de penscioin, o l’à riduto l’endexo de povertæ e a disoccupaçion (da-o 40% a-o 9%). O Frente Amplio o l’à pe de ciù approvou de importanti riforme in matëia de diritti çivili: da-a legalizzaçion de unioin omosessuali e da marijuana, a-a depenalizzaçion de l’abòrdo.

I sondaggi davan o candidou progrescista in vantaggio, e do resto o Martínez o l’à guägno o primmo turno; ma a-o ballottaggio a vittöia a l’é anæta à l’esponente d “Partio Naçionâ”, ò “Blanco”, che pe di secoli o s’é spartio o potere co-o Partido Colorado, à l’interno de un regime autoritäio e oligarchico. Tra e raxoin da stòrica sconfitta dòppo 15 anni de governo, a deriva çentrista do Frente che o l’à ciantou lì de maniman o profî riformista do comenso, allontanandose da-a seu base soçiale e affavoindo i investimenti de murtinaçionæ foreste che an penalizzou i lavoratoî e e piccole impreise do pòsto; in de ciù o Daniel Martínez o l’ea un candidou deslavou, che o no l’é riescio à addesciâ l’interesse e l’identificaçion de çerti elettoî, comme l’é successo incangio con Mujica e in parte con Tabaré Vásquez.

L’Uruguay ascì o no l’é donca restou immun da-o crescio da dritaestremma, che pe-a primma vòtta inta stöia recente a l’à fæto irruçion into Parlamento de Montevideo: o “Cabildo Abierto”, tòsto fondou e guiddou da l’ex commandante de l’eserçito Guido Manini, o l’à ottegnuo l’11% di voti, in diventâ o quarto partio. L’é caxon de sciato o fæto che tra i dirigenti ghe segge di personaggi – compreiso o mæximo Manini – compromissi co-a dittatua militare fascista che a l’à insanguinou o paise da-o 1973 a-o 1985, in impoñe o terrô e a persecuçion di discidenti, impindo e cretoin de prexonê politichi e con produe un erto numero de desaparecidos. O Manini o l’ea stæto cessou da-o prescidente apreuvo a-e seu proteste contra a riforma de penscioin militari e e sentense di tribunali contra quarche protagonista da dittatua.

Oua i nostalgichi sostegnian i Blancos (conservatoî) e i Colorados (liberali) provian à crenâ a legislaçion soçiale progrescista. A drita a l’à pontou fòrte in sce l’inseguessa caxonâ da-o crescio di reati ligæ a-o narcotrafego, ma o voto o l’à bocciou a riforma constituçionâ ch’a miava a-a militarizzaçion da poliçia e à l’aumento de peñe: o plebiscito ciammou “Vive sensa poia”, che o se votava o mæximo giorno, o no l’à razzonto o quorum do 50%.