Liguria, urtimo treno
Serve l’idea pe vinçe

I 18 de zugno passæ tutti i rapresentanti di partii che compoñan o coscì dito Campo Progrescista s’en riunii, pe iniçiativa di fondatoî de sto giornale, in sce unna terrassa de unna casa do çentro stòrico de Zena, insemme à di rapresentanti de assoçiaçioin de l’äia do çentro-scinistra e à quarche intellettuale, pe discute de eleçioin regionali, alantô ancon lontañe. Inte quella riunion, ch’a l’é stæta a primma donde se stabiliva a communitæ de intenti de fòrse che a-e eleçioin do 2015 ean anæte separæ, quarche voxe a l’aiva espresso l’idea che a primma cösa da fâ a l’ea trovâun candidou che o garantisse tutti. St’instansa a no l’à prosperou, e i partii an preferio rimandâ a çernia ascondendose derê a-a clascica – e fòscia ipòcrita – neçescitæ de trovâ avanti de tutto un “accòrdio in scî contegnui”.

L’é passou squæxi eutto meixi da quello 18 de zugno e inte sto tempo l’é successo de tutto: da-a fin de l’esperiensa de governo giano-verde (neigra, cit. Borzani), a-a poscibilitæ – ancon da sançionâ – de unn’alleansa co-o M5S, a-o cangio do segretäio regionâ do PD, che oua o l’é Simone Farello e alantô Vito Vattuone. Ma pe-o resto ninte: tanto che scrivemmo o candidou o no s’é ancon trovou, e “l’accòrdio in scî contegnui” se l’é stæto trovou l’é successo sensa che a soçietæ, ò a-o manco quella parte da soçietæ ch’a s’interessa de ste cöse, a ne sacce ninte. Pòrte serræ, riunioin tanto segrette quanto inutili, tempo perso, coinvolzimento da soçietæ çivile – da quæ se parla delongo abrettio – pesso, e tanta tanta nöia; nommi de poscibili candidæ che en trapellæ a-a stampa quæxi tutti i giorni, ciù pe bruxâli che atro, e i prinçipali esponenti do Campo Progrescista che conduxan de campagne elettorale personale pensando solo a-a seu rieleçion, dando fòscia pe persa a battaggia.

Escì ben che a scituaçion a no porrieiva ëse ciù favorevole: con tutto che a capaçitæ de communicaçion à Toti e sòcci a no ghe manca, a crua realtæ a se manifesta con mai tanta fòrsa che sciña di elettoî imbarlugæ da di feughi d’artifiçio continuæ cian cianin se n’addan: a sanitæ à livelli mai visti, o desastro de infrastruttue che o manifesta a farta de influensa do governo regionâ, l’assensa de un disegno de insemme à livello econòmico e industriale, l’abandon de l’introtæra, a politica colturale reduta a-a promoçion do pesto. A lista a porrieiva continuâ. Quanto ciù façile saieiva stæto cavarcâ e debolesse do toti-leghismo se ghe fïse stæto za un candidou fòrte e scompartio! E incangio, pe oua, a vocaçion a-o suicidio do çentro-scinistra, e sorviatutto do PD, a l’à prevarsciuo in sciâ coæ de zugâsela.

Inte ste settemañe chi vëgne se trovià pe fòrsa o candidou, e probabilmente quande leziei se savià za chi l’é. Fòscia o Fausto Massardo, fòscia o Ferruccio Sansa, tutti doî boin sotta çerti aspetti. Atre opçioin a-o momento no pan credibili, e tutto sommou speremmo che no vëgnan feua comme forma de impoxiçion territoiale da Romma.

À tutte e mainee, quello che se trovià da affrontâ o candidou saià unna partia diffiçile ma con arcuñe poscibilitæ de vittöia. Segge chi segge, saià importante che o no se ne stagghe a-o cado di caminetti, ma che o vagghe in gio pe-o territöio, da Levante à Ponente, à communicâ unna neuva idea de Liguria, unn’idea de repiggio che a sacce fâ leva in sce l’orgheuggio de appartegnî à unna tæra diversa. Diversa da-e regioin confinanti pe geografia, stöia, coltua, specializzaçion e neçescitæ de l’economia, e donca besugnosa de rispòste diverse, adattæ a-o seu contesto particolâ. No se dovià solo batte in scî temi, do resto ineluddibili, da lòtta a-e disegualianse e a-o cangio climmatico – con tutte quello che ghe stà drento –, a-i fenòmeni de presensa mafiosa ormai arreixæ e a-o malaffâ nostrâ, saiva à dî a triade de scinistra contemporanea: giustiçia soçiale, ambiente e etica. Ghe vorrià unna vixon in ciù, che dòppo a campagna elettorale, se se guägna, a dovià ëse transformâ in atti spedii e concreti de governo.

A Liguria a deve recuperâ conscensa de lê comme entitæ politica e territoiale euro-mediterranea. Questo scignifica troncâ quanto ciù poscibile i ligammi ideològichi e de dipendensa da-o Stato italian, pe recuperâ un rappòrto diretto co-e insituçioin europee, e atri Stati e regioin d’Euröpa e do Mediterraneo. Ma veu dî ascì travaggiâ à l’interno, pe rinsaldâ un vincolo de appartenensa commun da Vintimiggia a-o Tellâ, sensa lasciâ inderê e tære de là da-o Zovo, e questo se peu fâ solo se a-i vertici gh’é a conscensa de l’importansa de mette à serviçio de un progetto de paise o patrimònio colturale stòrico ligure. Unn’agençia regionale dedicâ à sto aspeto, finançiâ comme se dê, a porrieiva ëse un ponto de partensa, ma l’é importante che l’intendimento o segge scompartio da tutte e fòrse de governo. Pe no lasciâ delongo questo tema a-e fòrse de drita, che ô trattan in mainea scciappiña – ciù pe mancansa de coltua che pe atro.

Ghe peu ëse un regionalismo à scinistra, e a Liguria a n’à beseugno ciù che mai. E pròscime eleçioin son fòscia l’urtimo treno, e l’é poscibile che se guägnan in sce sto ponto.