Pe no lasciâ ciù di spaçi veui

E çittæ son di organismi viventi che attraversan di longhi cicli de vitta no sempre liniæ: e crixi econòmiche, e variaçioin demografiche, i cangi politichi, e catastrofe “ambientali”, i mercoei finançiäi instabili e a deindustrializzaçion, insemme à unna politica de governo do territöio che a no prevedde sti dissesti ciù ò meno “fisiològichi”, pòrtan a-o declin de vegie destinaçioin d’uso e à l’abandon de spaçi un tempo vivi. Tra unna vegia e unna neuva destinaçion d’uso se crea coscì di “beuggi temporali” che peuan duâ di dexenni, e inte quello tempo succede che o problema do degrado pontuale o se spantega à maccia d’euio, con generâ povertæ diffusa inte di quartê intreghi, deprescion soçiale, desertificaçion urbaña e rurale, inçertesse e inmobilismo, scin a-o ponto de no ritorno.

E raxoin do retardio inta riqualificaçion de sti spaçi son infinie: tante vòtte son i costi stramesuæ de riqualificaçion e bonifica, atre vòtte i progetti intran in conflitto co-i beseugni de communitæ locali perché no son preçedui da di percorsci parteçipæ, atre vòtte ancon a pachidermica machina burocratica neçessäia à l’approvaçion di cen a rallenta o proçesso de rigeneraçion, ò ancon, son de interesse econòmico scarso. L’é inte sto “beuggio temporale” che l’é poscibile sperimentâ di re-uxi temporanei, che peuan inandiâ di neuvi scenäi de rigeneraçion, grande qualitæ urbaña e benestâ pe-o çittadin, evitando o collasso. Perché no sfiddâ o presumî da cianificaçion urbanistica tradiçionâ e da progettaçion architettònica, de spesso incautamente lontañe da-o çittadin che o no l’é ciammou à parteçipâ, e sponciâ perché sta prattica a divente un instrumento reconosciuo da-e amministraçioin, pe scrovî de neuve identitæ urbañe, pe testâ de differenti vocaçioin d’uso, de communitæ potençiali de cua, e de ræ profescionali?

O “beuggio” o peu transformâse inte unn’opportunitæ, diventâ a palestra donde eserçitâ unna coltua de progetto collettivo e alimentâ l’assonçion de responsabilitæ da parte de tutti, inta transformaçion definitiva de sti spaçi. O re-uso temporaneo o l’evita, in ciù, a cheita do valô econòmico de l’inmòbile e do quartê in sciô quæ o l’insciste, mantegnindolo seduxente a-i euggi di poscibili finançiatoî de progetti definitivi (conseguensa no da pöco). Do resto, diffiçilmente unna transformaçion urbaña stabile e de longa duâ, preçedua da un re-uso temporaneo parteçipou, a resultià incongruente co-e exigense da çittadinansa: a transformaçion definitiva a saià a conseguensa de de çernie testæ da unna communitæ de progetto attiva e fautoa do seu destin.

Sta prattica l’é di belli anni ch’a l’é reconosciua da-e P.A. de atre çittæ europee, comme instrumento de gestion di procesci de transformaçion. Sensa anâ tròppo lontan, Milan into seu PGT 2030 (Piano del Governo del Territorio redatto in co-progettaçion co-i çittadin e i stakeholder) a l’inserisce l’uso temporaneo (PdR art. 15) comme instrumento tattico pe innescâ di procesci de rigeneraçion incrementali inti ambiti destinæ a-e Grendi Funçioin Urbañe (es. Scalo Farini), coscì comme into resto da çittæ. À titolo d’exempio fasso riferimento a-o progetto Piazze Aperte do Piano Quartieri do Commun de Milan: i progetti de rigeneraçion de ciasse son preçedui da di interventi de carattere sperimentale e temporaneo che, in coinvòlze i çittadin, arvan de neuve vixoin e de neuve prattiche urbañe, pascibili de megioamento e de sviluppo. Ma no solo de çittæ comme Milan definiscian torna e regole e i rappòrti co-a çittadinansa ch’a l’é co-progettista do futuo do territöio, ma ascì e Regioin se dòttan de de lezze che agevolan sto coinvolzimento: l’Emilia-Romagna co-a seu L.R. n. 15 do 22-10-2018 a l’affavoisce a parteçipaçion di çittadin à l’elaboraçion de politiche pubriche e à rafforsâ o senso da çittadinansa attiva, mascime in occaxon de çernie importanti e strategiche pe-o territöio. De sta lezze a nòstra Liguria se vedde che a no sente a mancansa, sciben che pe-e eleçioin son tutti pronti à impîse a bocca de “soçietæ civile”, indispensabile inte sti caxi, a-o manco comme feticcio, pe pöi ascordâsene fito quande l’é l’oa de governâ.

À Zena l’esperiensa de re-uso temporaneo do Mercou de Corso Sardegna, che graçie à unn’açion corale tra Riprendiamoci Genova, P.A., assoçiaçioin e scingoli çittadin, o l’é tornou à ëse patrimònio do Commun, a l’à contribuio à fâ renasce pe doì anni l’inmòbile abandonou, tra conçerti, mercoei, mostre d’arte, zeughi pe-i figgeu, e a l’à visto confirmou e megioou o progetto de rigeneraçion definitivo, che o se realizzià in continuitæ amministrativa. Oua sta à niatri domandâ che sta prattica a no segge relegâ à unn’esperiensa picciña de di scingoli volontäi e de quarche amministratô longimirante, ma che a se transforme inte un strumento de rigeneraçion reconosciuo e agevolou da-e P.A., into quaddro de un cian strategico de longo periodo.

L’é neçessäio do resto fâ attençion à comme se prattica o re-uso temporaneo, de mòddo che o no se redue solo à unna festetta à sostegno de de politiche che tendan à “presentificâ”: “La politica ha fretta (…) e le trasformazioni territoriali sono lente (…), e allora va bene dare una piccola sovvenzione a un gruppo di giovani per installare (temporaneamente) uno spazio per l’arte o la cultura in un vecchio capannone abandonato; che si faccia, che si capitalizzi immediatamente il successo politico dell’iniziativa, e che la cosa duri anche sei mesi, per poi chiudersi e tornare al suo abandono fisiologico. Il temporaneo come orizzonte di azione, l’effimero come principio, stanno diventando il nesso causale di una politica che non immagina più se stessa come parte di un lungo processo. (…)”. (ARU 01 Architettura della Rigenerazione Urbana, “Argomenti per una critica alla rigenerazione urbana”, Giovanni La Varra).

No femmose inaiâ e regordemmose che o futuo o l’é delongo inte nòstre man, basta voeilo.