Quattro spiegaçioin pe capî a deriva da politica

Perché, quando vëgne zu i ponti politichi no pensan pe primma cösa a tiâli torna sciù, ma à mette a-a berliña i seu gestoî? Perché a ciù parte de notiçie politiche a gh’à à vedde co-e polemiche di partii? Perché e ciù antighe democraçie de l’Occidente son governæ da di (ciù ò meno) scimpatichi paggiassi? O l’é o populismo, bellessa.

Dòppo ëse stæto pe ciù de un secolo a pegoa neigra da streuppa democratica, o populismo o göde de fortuñe planetäie. Torna, perché? Gh’é armeno quattro spiegaçioin, no alternative ma complementari.

A primma a l’é politica. A-o manco da primma guæra mondiale i Parlamenti, eletti da-i çittadin, son stæti sostituii da-i executivi ò da-i seu leader, legittimæ sorviatutto da-o consenso riscòsso in scî media. E democraçie rapresentative, liberali, constituçionali, saiva à dî pluraliste, se son transformæ de maniman in autocraçie elettive, comme o ê ciamma Michi Bovero. I seu cappi an ancon a condiscendensa de domandâne o voto, ma fito no faian ciù manco quello: ne domandian solo quarche like, d’in semme in çento.

A segonda spiegaçion a l’é econòmica. Co-a globalizzaçion neoliberista, ò sæ a privatizzaçion di serviçi statali in favô do mercou, i governi naçionali contan meno di poteri fòrti globali, e a politica a s’é trasnformâ in intrattegnimento sccetto. Se capisce, a globalizzaçion a l’à caxonou a sciortia da-a povertæ de di paixi comme India e Ciña, ma ascì o progrescivo impoverimento di paixi occidentali. Sti chì, pe protesta, an comensou à votâ i coscì diti sovranisti, ancon ciù asservii a-i poteri fòrti globali, ma che a-o manco finzan de tronâghe adòsso.

A tersa spiegaçion a l’é psicològica: l’impoveimento di occidentali o l’à contribuio à alimentâ o seu risentimento contra a politica, risentimento dito ascì antipolitca, che o s’é cangiou de maniman in ruzze contra chesesegge élite intellettuale ò anche solo tecnica: banchê, economisti, professoroin, “gufi”, “rosiconi” e via demonizzando. A ruzze a l’é particolarmente evidente in scî soçial, donde de micce consapevoli ò no (fake news), de esprescion de òdio (hate speech), e scimili, informan ormai a communicaçion corrente.

Ma a spiegaçion a ciù inluminante a l’é a quarta, quella mediatica, saiva à dî relativa à quelli media, mascime internet, che son ormai l’ambiente vitale de l’homo sapiens sapiens do terso millennio. A rivoluçion digitale, comme tutte e træ vegnue primma, a l’à produto unna neuva politica, assæ ciù pervaxiva di totalitarismi do Neuveçento perché a ne accompagna delongo pe mezo di nòstri telefonin: o populismo digitale. Sto chì o l’à accelerou o processo che Gabriele Giacomini o l’à ciammou de-rinaçionalizzaçion de l’agente politico, ma che, in termini ciù tæra-tæra, o porrieiva ciammâse rimmincionimento globale.

Creddeiva d’ëse stæto o primmo, into mæ libbro “Come internet sta uccidendo la democrazia” (Chiarelettere, 2020), à avei adottou st’urtima spiegaçion comme a primmäia. Urtimamente, però, ò lezzuo torna de cöse scrite da-o Umberto Eco fra o 2000 e l’anno da seu mòrte (2015), l’anno primma a-o referendum in sciâ Brexit e à l’eleçion do Trump. Ben, me son addæto che l’essençiale o l’aiva za dito lê. Pe avei unna spiegaçion soddisfacente do populismo digitale, in effetti, basta cuxî insemme i seu scriti in sciâ tv e quello che o peu fòscia consciderâse o seu testamento morale: a sciortia in scî soçial che “dan diritto de paròlla à de streuppe de abbelinæ”.