A Ciña comme se vedde da l’ariopòrto

Ò viagiou ben ben, ma arcuñe tra e esperiense ciù strafaläie da mæ vitta ê ò fæte inti ariopòrti cineixi. Pechin 2017: primmo contatto con l’Impero do Çentro. Tòsto desbarcou, unn’imprescion de potensa massiccia ch’a no dà guæi mente à l’estetica. Ciumento, äsâ, ciumento abrettio, in eccesso, comme nòtta i mæ euggi de professô inte unna facortæ de Architettua. Tutto estremamente sòlido, rinforsou a-o de là do neçessäio, inte un stile sòbrio e sciuto che quarchidun o porrieiva ciammâ “brutalismo”. Un shock: pöchi impiegæ parlan ingleise, beseugna arrangiâse, fâse capî, açettâ de prononçie a-o limite do comprenscibile. Donde saià a mæ valixa? Doe poliçiòtte teccette e scimpatiche me fan capî à gesti che devo piggiâ un treno: “ciuf ciuf”, universale. Veddo, defæti, che diversci passaggê che ean in sciô mæ mæximo aerio son che montan in sce un treno tòsto arrivou. No fasso in tempo à montâ, o parte subito, e arresto lì futo à aspëtâ quello dòppo. Pe fortuña arriva into gio de pochiscimo. E o treno o parte veloce e o viagia, o viagia, o maxiña di chilòmetri. Comenso à preoccupâme: e se me fïse inärou? Devo piggiâ unna coincidensa pe unna çittæ do sud, e no l’é che gh’agge sto gran margine. Passa dexe menuti, un quarto d’oa, tanto che o treno o sfreccia in sce de colisse rinforsæ da de gaggiarde struttue de ciumento, à traverso un paisaggio de veddri opachi e äsâ. In sciâ fin o se ferma e capiscio donde semmo: an za smistou a mæ valixa a-i domestic flights. Chì o panoramma o cangia areo: famigge con figgeu bordellanti, gente semplice, quarchidun con de gagge da bestie, pollastri. Recupero a valixa, ma comensa unn’atra odissea. A mæ coincidensa a l’é in retardio; primma o retardio o vëgne annonçiou in ingleise ascì, ma dapeu e notiçie comensan à arrivâ capirçiosamente solo in cineise. Unna scignoa, che ghe fasso mäpró, a me fa vedde a seu app do telefonin ch’a dà notiçie anche in ingleise, coscì screuvo che devo cangiâ de gate, à peto de quello indicou in sciâ carta d’imbarco. O xeuo o no parte mai. Arrivo à destinaçion con træ oe de retardio e dispero de trovâ quarchidun ch’o m’aspete ancon, e incangio o comitou d’accoliensa o l’é ancon tutto lì e un collega, co-o fattoriso, o me dixe che sti retardi in scî xeui interni son conscideræ “normali”.

Huang Chou (Canton) 2018. Arrivo apreuvo à unna neutte squæxi insònne pe poia de no addesciâme in tempo. Viagio de træ oe in machina pe razzonze l’ariopòrto e screuvo che l’aerio ch’o deve portâme in Italia via Helsinki o no gh’é, scancellou causa tifon. I impiegæ s’inzegnan pe trovâ unn’alternativa, ma in sciâ fin devo ricegâ in sce un xeuo pe Hong Kong con coincidensa pe milan... 10 oe ciù tardi. Me rassegno e çerco de fâ passâ o tempo. Screuvo che l’ariopòrto o l’é pin de tecnologia à mi desconosciua. In particolâ me corpisce de stranie piramidi bleuçê, spantegæ ògni vinti metri pe tutto o salon de partense. An di esagoni sciaccæ in scî loei. Sotta gh’é de preise de corrente, normaliscime, pe recarregâ i telefonin. Arriva un figgeu e co-o seu smartphone o fotògrafa un còdixe QR a-a base da piramide, dapeu o l’inquaddra un di esagoni. A çelletta a se arve e a lascia sciortî un carregatô portatile pe telefonin che o figgeu o l’inseisce into seu e o se ne va. Pe disnâ vaggo à mangiâ inte un clascico ristorante cineise, ch’o me pâ affidabile, o l’é pin comme tutto e i prexi en raxoneivi. A-o momento de conto tio feua e palanche che m’en restæ e fasso pe pagâ; me rendo conto, de fæti, che tutte e casañe pagan con unna app... O maitre, paxe, o scròlla a testa e intuiscio ch’o ghe dixe: “e piggighele, ste palanche, meschinetto, o deve vegnî da un paise arretrou...”.

Shanghai (2017). Arrivo comme a-o sòlito in retardio pe caxon de un xeuo interno. Unn’oa pe piggiâ a coincidensa pe francofòrte, e devo retiâ a valixa e fâ torna l’imbarco, perché pe raxoin de seguessa in Ciña no se peu spedî direttamente o bagaggio se no da l’urtima tappa do territöio cineise. Da-i xeui interni devo anâ a-i internaçionæ. L’aerio o l’atterra... Comensa e maneuvre pe-o parcheggio... Ma o gate o no l’arriva mai. Maxinemmo di chilòmetri, l’ariopòrto o l’é sensa fin. Finarmente metto pê à tæra, riescio à recuperâ a valixa a-o xeuo, arresta 45 menuti e devo fâ torna tutte e pratiche de imbarco. Trafelou riescio à arrivâ a-o check in e screuvo che gh’é unna fia de 50 persoñe. Me vëgne in cheu che beseugna passâ à traverso 3 diversci contròlli de seguessa; me veddo perso. Dapeu aggueito un tanabeuso con scrito Lufthansa e un clascico Fritz assettou paxe derê a-o sportello. Levo a pua a-o mæ tedesco di anni do dottorou e ghe spiego fito a scituaçion. O s’â rie: nisciun problema Herr Professor! O me fa lê a carta d’imbarco e o me fa passâ e seguesse da l’ingresso di VIP. Arrivemmo a-o gate e o parla co-o personale cineise... O mæ pòsto economy o diventa un pòsto business... E graçie a-i anni a-o Ghoete Institut!