A diplomaçia de vacciñe in man a-i mascci alfa
E l’Euröpa a stà à ammiâ

Ngozi Okonjo-Iweala, nigeriaña, primma dònna a-a testa de l’Organizzaçion Mondiale do Commercio, a l’é formale (intervista à Le Figaro do 1 de arvî 2021): “tra a-a fin do 2020 e l’iniçio do 2021 o repiggio do commercio mondiale o l’é stæto ciù fòrte de quante previsto à zugno de l’anno passou, dòppo a primma ondâ di lockdown; i cen de recupero di diversci paixi (USA, UE, Ciña, ecc.) son riescii à passâ de d’ato a-i neuvi e diversci paletti impòsti a-o commercio mondiale da-o recente aumento da tenscion tra l’America trumpista e atri grendi paixi comme a Ciña, a Ruscia, l’Iran, ecc.; ma a grande incògnita a l’arresta a mæxima epidemia, e e campagne de vaccinaçion son i megioî cien de repiggio poscibili”. Aponto. Semmo inte l’arvî do 2021: donde stan tutti sti “grendi paixi” co-e seu campagne de vaccinaçion? Continuemmo, çittando delongo di dæti produti da-a direttoa generale de l’OMC. Uña de træ prinçipali vacciñe contra o Covid-19 a l’includde 280 componenti, che vëgnan da 19 paixi: purtròppo, tante de restriçioin commerçiale in corso – quelle vegie, in sce brevetti e propietæ intellettuale, e e neuve, assæ ciù arbiträie – no aggiuttan. Comme nascian ste neuve restriçioin a-o commerçio mondiale de produti e serviçi? Da-e recenti rattelle tra quarche “òmmo fòrte”, comme o vegio prescidente USA, putin, Xi Jing Ping e Bolsonaro, pe çittâ solo quelli primmäi – no s’â pigge o Salvini meschinetto – l’obiettivo di quæ o l’arresta a reindustrializzaçion di seu paixi, inte di settoî conscideræ, à tòrto ò à raxon, comme vettoî de sviluppo futuo pe sti paixi. Resultato? “Ancheu o 70% de dòse de vacciña produte son riservæ à 10 paixi do mondo”, a deplöra Ngozi Okonjo-Iweala, ch’a l’azzonze: “inti giorni chi vëgne inandiemo di seminäi de travaggio co-i primmäi laboratöi farmaceutichi do mondo, i staiemo à sentî pe capî quæ son e seu difficoltæ pe produe e distribuî ciù tante vacciñe, mascime e difficoltæ burocratiche, e çerchiemo de capî comme poemmo aggiuttâli, rendendo ciù façili çerti scangi de produti e componenti essençiali a-a produçion mondiale de vacciñe”. Merci, madame. Ma perché semmo arrivæ scin à sto ponto? Saiëscimo tentæ de domandâlo a-i “masccetti fòrti” che divimo primma.

Piggemmo i ciù rappresentativi, tra liatri, e comensemmo da chi à l’iniçio do 2021 o diva ancon che o Covid into mondo l’aiva sconfitto lê, co-i miliardi dæti à Pfizer e Moderna, e che pe questo o l’aveiva o diritto à desconosce o seu successô, democraticamente eletto, e à invexendâ unna streuppa de barbari sbraggianti che an misso à færo e feugo unna de ciù antighe e rispettæ instituçioin democratiche do mondo, o Parlamento federale di Stati Unii d’America. Ribadimmolo chì, unna vòtta pe tutte: no, Trump o no l’à sconfitto da solo o Covid, i miliardi dæti à Pfizer e Moderna no ean i seu, i brevetti deuviæ da sti laboratöi framaceutichi no î à depoxitæ lê – ma unna cobbia, maio e moggê, d’immigræ turchi naturalizzæ tedeschi a quæ, graçie a-e regole impòste a-o commercio mondiale da l’OMC, a l’à posciuo vende a seu idea a-a Pfizer, permettendo à sto laboratöio de produe de vacciñe in larga scaa, e distribuîle a-o tutto o mondo. Se anche mai o l’avesse fæto, questo o no ghe daieiva o diritto ni à denonçiâ comme illegittimo o processo democratico, ni à invade un Parlamento. Question a l’é che ancheu i americani son o pòpolo o ciù vaccinou do mondo, e sto chì sorviatutto graçie a-e seu aziende, a-o seu senso de l’organizzaçion, a-a capaçitæ de aggiuttâse l’un con l’atro, e anche un pittin a-a neuva amministraçion Biden. L’exempio o no l’aggiutta fòscia à arrivâ a-o ponto, ma s’avvexinemmo. Segondo paise ciù vaccinou a-o mondo, l’Inghiltæra, donde un atro bello esemplare de masccio alfa o se demoa à firmâ di accòrdi co-i paixi vexin, pe desconoscili dapeu se i urtimi sondaggi d’opinion ghe suggeriscian di neuvi traghetti da mette in atto verso i seu conçittadin ò i seu paixi vexin. Boris Johnson o l’é o megio exempio do fæto che, quande t’ê un còmico de profescion, ò un intellettuale con grande senso do humor (ingleise), sto chì o no fa de ti pe fòrsa un bon primmo ministro, ò un partner che se ghe peu contâ. Circa o 50% di ingleixi, ancheu, son vaccinæ (ma de unna sola inieçion: ti sæ che rie) e a vacciña “ingleise” AstraZeneca a l’à dovuo cangiâ de nomme perché “Bo-Jo” o s’é demoou à confiscâ tutte e dòse produte da sto laboratöio “ingleise” in gio pe-o mondo, in barba à ògni tipo de regola de common e de civil-law internaçionâ (assæ divertente). Chì s’avvexinemmo a-o ponto. Passemmo a-o terso “ommetto fòrte”, Jair Bolsonaro, e chì no rie ciù nisciun. O Brasile o l’é ancheu o paise a-o mondo donde 3.000 persoñe a-o giorno meuan de Covid; donde i uspiæ seleçioñan scistematicamente i seu paçienti in base à quante peuan pagâ pe-e speise meghe; donde di banchê, di imprenditoî, di economisti e atre personalitæ da societæ civile fustigan o prescidente con unna lettia averta implacabile e de grande sæximo, e Bolsonaro o risponde con licençiâ tutti i seu ministri de sæximo, i trei generali e cappi de Stato Maggiô ciù rispettæ do paise, e con çercâ de impoñise lê comme o “veo baccan” de l’eserçito brasilian. (Chì a boña notiçia a l’é che à l’iniçio de arvî i militari brasilien an incroxou e brasse, erzendose à difensoî da Constituçion e infliggendo à sto esemplare de masccio alfa do tipo “narciso perverso” unna sconfitta politica che speremmo a segge definitiva). Ma cöse l’é successo in davei in Brasile?

Chì, pe capî, beseugna atraversâ torna l’Atlantico e o Paçifico, e indagâ in casa de atri doî “òmmi fòrti”. Dæti a-a man: a Ciña, paise da-o quæ a pandemia a l’é partia, a l’à fito brevettou unna vacciña locale, con efficacia pâ a-o 50%, e a l’à deciso “democraticamente” de vaccinâ pöco a seu popolaçion: ancheu a Ciña a l’espòrta a vacciña inte 48 paixi; à l’iniçio de arvî a n’aiva za esportou 500 milioin de dòse e o Brasile o l’é un di primmi benefiçiäi de ste dòse. Da-o canto seu, a Ruscia de Putin, donde no se sa ben quante ammasse o Covid, a l’à deciso lê ascì de vaccinâ a-o minimo o seu pòpolo, e anche a l’espòrta o seu Spoutnik inte 72 paixi. O primmo benefiçiäio da vacciña russa: o Brasile.

Concluxon: e se a diplomaçia de vacciñe, ò giusto a diplomaçia, â lascescimo fâ à quarche dònna in ciù e à quarche masccio alfa in meno?