Bucci, occaxon persa
Oua beseugna fâ megio

Voendo fâ un raxonamento assolutamente pragmatico, e lasciando pe un momento da parte i schemi ideològichi e a partexaneria, poemmo fermâse à raxonâ in sce quello che o rappresenta e o l’à rappresentou scin à oua o scindico Bucci pe-a çittæ de Zena.

Partimmo da-i meriti e da-e qualitæ che se ghe peu riconosce: Bucci o l’è un energico e o l’à pascion pe quello ch’o fa; o l’è un zeneise ch’o veu ben à Zena: à differensa do Toti, “o ghe credde”, comme se dixe. O seu passou profescionale e a seu formaçion ghe lascian in ereditæ unna çerta capaçitæ de pensâ complesso; pe de ciù, o l’à di træti sòbri e austeri che ô fan perçepî in scintonia co-o spirito da çittæ. Un ch’o travaggia, ch’o xeua basso, pöche paròlle e camminâ, tutte röbe che van d’accòrdio co-a rappresentaçion che i zeneixi gh’è ancon cao dâse de liatri mæximi.

Bucci però o l’à di difetti, che in parte an à vedde co-a seu persoña e in parte ch’o contesto politico into quæ o l’è spegou. Primma cösa, che pe quante se pòsse çercâ de passâghe in çimma, a l’è grave, o l’incarna un modello de leadership scompassou, comme testimònia tutti i problemi ch’o l’à inti rappòrti co-i fonçionäi de ciù tanto livello, che defæti no fan atro che abandonâ l’amministraçion pe refâse unna vitta into settô privou. Parlemmo chì de quelle figue che mandan avanti a machina communale, con competense che de spesso no son economicamente reconosciue à dovei into pubrico, e che donca besugnieiva tegnîse streiti. Sbraggiâghe, impoñighe e decixoin, trattâle sensa prudente riguardo, o no l’è un segno de fòrsa, ma unna farta de capaçitæ organizzativa, e in fin di conti de intelligensa amministrativa. Oltre a-o portâ avanti un tipo de gestion do potere patriarcale, feua da-o tempo, pe mezo do quæ no se porrià mai inandiâ ninte de moderno, perché inte un çerto limite e forme determinan e açioin e i resultati. Scignifica no capî comme fonçioña sto secolo, e se à tanti zeneixi ghe piaxe “o scindico ch’o cria”, a l’è ciù a dimostraçion de un retardio colturale e soçiale, che no de quarche peculiaritæ do carattere di abitanti.

Gh’è pöi un problema politico: Bucci o sbraggia abrettio, ma a-a fin da föa o conta pöco. O s’atteggia da baccan con chi o gh’à “sotta”, ma quande intra inta stançia o Rixi, seu inventô politico, o nòstro eröe o l’asbascia o sguardo e o no silla. Squæxi tutti i giorni, verso e sei de seia, Toti e Rixi ô ciamman pe dîghe quello che o deve fâ. E lê aloa o no cria: o se ne sta.

Se capisce che st’andio o no mette solo in luxe a carregatua de un potere exibio e no esercitou, ma o rappresenta ascì un problema politico inta mesua inta quæ o Bucci, a-o de là de tutto, o l’è megio di seu poæ politichi, ma à l’oa da veitæ o no â tocca. O l’è comme l’animatô de un villaggio vacanse, che ghe dixan a scaletta de attivitæ e lê o ghe mette a faccia e o sprint, pe tiâ sciù o morale a-i zeneixi; o diventa coscì o conträio de quello tipo “pöche paròlle, tanto travaggio” ch’o vorrieiva incarnâ.

Marco Bucci, donca, che tanto entuxasmo o l’à addesciou in boña parte da çittadinansa, o se treuva à ëse into megio di caxi unn’occaxon persa. Che però, voendo ammiâ e cöse in poxitivo, a peu sponciâ à çercâ de fâ megio l’anno chi vëgne, quande se dovià çerne se confermâlo ò elezze un neuvo scindico. Perché l’approvaçion ch’a l’à scheusso o seu attivismo, in tanti caxi veuo e a-o feua de un disegno d’insemme, a l’à fæto capî à tutti i mòddi che i zeneixi apprexan chi o no l’allarga e brasse, comme tròppo vòtte s’è visto fâ a-o Marco Doria. Perché no çercâ aloa, da scinistra, de trovâ unna figua ch’a l’agge e mæxime caratteristiche in ponto energia e boña voentæ, ma che à differensa de l’attuale scindico a no se treuve à governâ pe caxo, sensa avei mai riflettuo in sciâ realtæ do territöio? Perché se capisce che se un, scin à dötrei anni fa, o s’occupava de lastre e pellicole comme o scindico-commissäio, l’è diffiçile che dapeu o gh’agge de idee in scî cien de sviluppo da çittæ – e questo saieiva l’urtimo mendo da mette in luxe. O meno grave, s’o no picchesse contra unna mancansa de umiltæ, che quande se tratta de travaggiâ in sce de questioin de quæ o no l’à idea, a gh’impedisce de domandâ à chi l’è di anni che ghe sta apreuvo.

Gente, magara de quaranta e no de sciuscianteçinque anni, che a l’à sacciuo coinugâ l’attivitæ profescionale ò imprenditoriale co-a riflescion, o studdio e l’attivismo, ghe n’è. No guæi, ma ghe n’è. E aloa anche O Stafî, dòppo La Città de Borzani, o domanda à gran voxe de primmäie averte, vee e parteçipæ. Maniman emmo imparou quarcösa da sti quattro anni: che serve un ch’o se dà d’attorno, ma che no basta quattro sbraggi à imbösâ unna tendensa ch’a pòrta Zena sempre ciù in basso, inte tutti i indicatoî, primmo fra i atri quello demografico. “Comme fâ à recuperâ çentomia abitanti da chì a-o 2030?”. Questa a l’è a domanda a-a quæ o candidou (megio ancon, a candidâ) do çentro-scinistra o dovià savei risponde in mòddo credibile. aloa fòscia riesciemo à guägnâ. Ma a l’è unna rispòsta ch’a no s’improvvisa, e che no ghe l’à un da solo.