Incontro con Zena
Amô à primma vista

O regòrdo de quello viagio ghe l’ò into cheu comme se fïse vëi. Un viagio de dixeutto oe co-o mæ walkman sentindo a cascetta de Bryan Adams. Scì, perché parlemmo do 1998 e mi gh’aiva giusto dixeutt’anni. Assettâ, ammiando feua da-o barconetto de un pullman, inte un mesccio de nostargia e tantiscima coioxitæ. Me ne son anæta, ò lasciou i mæ amixi, a mæ famiggia, verso unn’avventua ignòtta. Za, mi che vegniva da un paisetto de vintimia abitanti à malædi, ch’o sta in slovacchia che manco co-a lente d’ingradimento l’aviësci trovou, mi partiva pe Zena.

À l’epoca no gh’aivimo accesso à internet e mi no aivo avuo a poscibilitæ de ammiâ comme ea fæto l’Italia, e meno ancon Zena. A mæ vitta in Slovacchia a no l’ea pe ninte noiosa, ma aiva beseugno de ciù. M’arregòrdo solo, quande o celere o l’à fæto l’urtimo tòcco de de autostradda, piggiando tutte quelle curve da serravalle, e veddendo tutte quelle case construie inte di pòsti da no credde, che pensavo solo “ma o mâ dond’o l’é?”. No riesciva à capî, no riesciva à imaginâ donde poesse trovâse quello mâ, che do resto mi no aiva mai visto. Me paiva coscì assurdo che o mâ o poesse stâ d’arente à di paisaggi mai tanto pin de bricchi, e o me paiva un viagio infinio perché quande no ti veddi l’oa de arrivâ, quande no ti veddi l’oa de sentîte libera, o diventa delongo un viagio infinio. Veddei, quande se cresce sotta o communismo russo, sensa guæi prospettive pe-o futuo, ma ti ti te senti inte l’anima scin da figgeua che ti veu xoâ, aloa se treuva un pittin de coraggio e d’inconsciensa, e ti parti e bòn.

O primmo amô o no s’ascòrda mai, me divan coscì. Oua sò cöse voeivan dî, perché pe mi o l’é stæto amô à primma vista, caa Zena, mi me son innamoâ de ti perdutamente. O l’é stæto un corpo de furmine.

Stæta chinâ zu da-o pullman in Ciassa da Vittöia, ò proseguio verso Nervi, l’é lì che aviæ visciuo. E subito me pâ tutto mai bello, mai grande, immenso. Perçepiva unna çerta libertæ inte persoñe, l’invexendo de unna çittæ grande, l’ea tutto mai tanto accapparrante.

Arrivo donca à destinaçion, inte quello scito piccinetto, assæ accoliente, donde aviæ visciuo pe un anno – a-o manco quella a l’ea l’idea. Ma o mâ? Mi voeiva à tutti i costi vedde o mâ. L’é inutile che ve digghe che no saveiva parlâ a lengua italiaña, e che anava in gio co-o diçionäio, e no gh’aivo manco un telefonin. Ninte google maps, ninte coordinæ, ninte de ninte, solo o mæ instinto. M’ò serrou a pòrta apreuvo e son anæta a-a riçerca do mâ. Dòppo squæxi vinti oe de viagio, sensa avei dormio guæi guæi, a mæ unica neçescitæ a l’ea esplorâ. E l’ò trovou, o mâ diggo, e o l’ea ancon ciù bello de quante no avesse posciuo imaginâ. Quella æxia legia de luggio, quello profummo che o l’emanava, fissâ l’orizzonte, tutto o m’à fæto sentî à casa. Comme se â conoscesse da sempre, Zena e o seu mâ ean a cösa a ciù bella che aiva mai visto. Eo zoena, picciña, veddeiva tutto co-i euggi de l’amô, e l’ea tutto mai tanto entuxasmante e mai tanto bello. Me sentiva accuggeita co-e brasse averte. No gh’aveiva l’intençion de restâ, ma do resto comme se fa à lasciâ sta çittæ unna vòtta che ti l’æ conosciua?

Da alantô l’é cangiou tantiscime cöse, tutto o mondo o l’é cangiou, ma i mæ sentimenti verso Zena son arrestæ incontaminæ. Oua vivo con unna çerta consapevolessa, ma delongo co-o mæximo amô da primma vòtta, perché o primmo amô o no s’ascòrda mai.