Ma a Liguria a reneuva?
A Liguria a l’é stæta unna region ricca de çentrali termoelettriche, primma à carbon e dapeu à gazzo, quello gazzo che in boña parte o l’arriva in Italia da-a Ruscia. Do 2008 a potensa installâ a l’ea pari à 3059 MW (2972 MW termoelettrichi, 97%) pe unna produçion de 13 TWh, (12,7 da termoelettrico, 97,7%) con unna richiesta de 6,9 TWh, a-a quæ corrispondeiva un eccesso de produçion regionâ de 6,1 TWh (47%). Do 2019 a potensa installâ a s’é squæxi dimezzâ, e a l’é pari à 1690 MW (1430 MW termoelettrichi, l’85%) con produçion de 3,7 TWh (il 28% rispeto a-o 2008), di quæ 3,1 TWh da termoelettrico (84%) e 0,6 TWh da rinnovabili, à peto de unna domanda regionâ de 6,3 TWh. Semmo in presensa de un deficit de produçion de 2,6 TWh e semmo diventæ donca importatoî de energia elettrica. Pe de ciù, a potensa disponibile a l’é destinâ à reduise ancon con a dismiscion (phase-out) da çentrale à carbon da Spezza, faxendo cresce sto deficit se no gh’é di interventi à pòsta. Anche o confronto in sciâ diffuxon de Fonti Energetiche Rinnovabili (FER) fra Liguria e Italia, inti anni 2008 e 2019, a fornisce un quaddro desolante. De fæti, tanto che in Italia into 2008 s’é produto 60 TWh de FER, pari a-o 16,6% do consummo elettrico totale, e into 2019 s’é raddoggioiu circoncirca, passando à 116 TWh de fer, pari a-o 34,5% do consummo totale, con un contributo importante de solâ e eòlico (44 TWh), eben in liguria e fer son passæ da-i 0,3 TWh do 2008 a-i 0,6 TWh do 2019. L’é vea che son raddoggiæ, ma peisan solo o 9,5% do consummo totale regionâ.
À conferma de questo, a figua ricavâ da-o “rapporto annuale statistico di terna 2019” a mette in luxe comme a liguria a segge o fanalin de coa à livello italian pe l’impiego de rinnovabili. A nòstra region a resulta urtima segge in termini de potensa installâ (282 MW) segge in termini de energia produta (568 GWh).
Quarche raxon de sto primato in negativo a l’é ligâ de seguo a-e caratteristiche morfològiche da nòstra region, tante che pe exempio comme idroelettrico solo a Siçilia e a Pollia an de produçioin ciù basse da nòstra. Do resto, stupisce che a Liguria a segge penurtima inta produçion da solâ (105 GWh, un dæto sconfortante se paragonou co-i 562 GWh de unna region picciña e a-e nòstre latitudine comme o Friuli-Veneçia-Giulia). E un o gh’arresta ascì pe-a pöca produçion eòlica, con tutta l’abbondansa de vento ch’o batte a nòstra tæra (apeña 130 GWh quande o Molise o produe 680 GWh), e da bioenergie (65 GWh), escì ben che a nòstra region a l’à a ciù grande covertua de bòschi de tutto o Paise.
Cöse dovemmo aspëtâse da-o futuo? L’italia co-o “Piano Nazionale Integrato Energia e Clima”, approvou do 2019, a veu arrivâ do 2030 a-o 55% do consummo elettrico finâ soddisfæto da de fonte rinnovabili, con un crescio fortiscimo de l’eòlico e do fotovoltaico. L’obiettivo o l’é quello de inandiâ di impianti neuvi de rinnovabile e de cicli combinæ à gazzo naturale de urtima generaçion, pe sostegnî o sviluppo de rinnovabili e a seguessa do serviçio elettrico.
Quæ futuo pe-a Liguria, stante o crescio squæxi inexistente de rinnovabili inti urtimi dex’anni? Da donde arrivià l’energia pe l’elettrificaçion de caladde (cold ironing), pe-i veicoli elettrichi di quæ se parla tanto, oltre che pe-i uxi çivili e industriali ciù clascichi? Da-o nucleare franseise e svisseo e da-i cicli combinæ da Lombardia, ò da un cian de sviluppo serio à sostegno de rinnovabili, con l’uso in primis de biomasse di nòstri bòschi? Da l’eòlico, con tutti i problemi de impatto inte unna region turistica comme a nòstra? Da-o fotovoltaico domestico, assæ pöco sviluppou? Da l’energia do mâ, che à tutti i mòddi a l’é marginale?
Niatri da “Cattedra Unesco” aspëtemmo de savei comme a politica, sorviatutto quella locale, a l’intende razzonze i obiettivi de sostegnibilitæ energetica, che ormai no se peuan ciù sghindâ.