Progrescismo

Cao direttô, i doî termini “progrescista” e “territorialista” no an de senso; scorrindo o teu editoriale “unna neuva politica pe tiâ sciù di ponti”, eben gh’arresto pe l’uso do termine “progrescista”, ormai feuggia de figo de l’ex scinistra, comme o neoliberista PD, con quarche sponto in difeisa di diritti civili. Sto chì o l’é successo dòppo o “blairismo”, quande no savendo comme ingiarmâ l’addio a-o scistema soçialdemocratico in Euröpa o PSE o s’é fæto “progrescista”. De conseguensa in Italia con lezze ordenäie s’é proceduo dòppo o 1989, da parte do çentroscinistra, à l’accantonamento do modello econòmico constituçionalizzou. Piggio da-o mæ libbro “Politiche costituzionali per le riforme”, pag. 66: “il progressismo è un movimento che identifica coloro che sostengono la promozione dei diritti civili e soçiali, da acquistare però tramite riforme progressive anziché tramite una rivoluzione anarchica o soçialista. Il progressismo può considerarsi sinonimo di riformismo soçialista”. Urtimamente emmo constatou, incangio, che o riformismo o vëgne coniugou con chesesegge tipo de formaçion politica; urtimamente Monti o l’à parlou, paradossalmente, in termini de assoluo desprexo do scignificato stòrico do termine, de alleansa tra riformisti per attuâ de politiche neoliberiste. Mentre e politiche de Monti se dovieivan definî politiche contro-riformiste, stante che, za à partî da-i primmi anni do Neuveçento e scin a-i anni Ötanta, “riformismo” o voeiva dî “riformismo soçialista”; tanto che o stòrico soçialista Giuseppe Tamburrano à un convëgno à Zena do 2000 o l’à avuo mòddo de dî: “il soçialismo è soçialista, o non è!”.

Segondo l’andamento attuale, ch’o mistifica i termini, o progrescismo ascì o pâ destinou à connotâ de politiche neoliberiste, neçessäie à l’innovaçion de l’impreisa contra o conservatorismo scindicale e, ciù in areo, o conservatorismo da scinistra. O stravolzimento into seu conträio o l’é ancon in corso. Anche e politiche di governi soçialisti in Euröpa, da fin do Neuveçento, inspiræ a-a rifondaçion soçialdemocratica – a “tersa via” – son stæte un stravolzimento do pensceo originäio tanto do laburismo quante da soçialdemocraçia. Semmo za into pin do stravolzimento paradossale e paroscistico do linguaggio, pe asconde a veitæ. Ancheu o progrescismo o se vedde auto-attribuio da-i rappresentanti do neoliberismo, quæ Marchionne e Monti. Tanto che a definiçion ch’a no se presta à ëse capia a-a reversa a l’é sta chì de Guido Calogero: “la civiltà è una successiva neutralizzazione di diseguaglianze, è un generale progresso da ingiustizia a giustizia, da disuguaglianza a uguaglianza”. Pròpio affermando a disegualiansa comme un fæto naturale de l’umanitæ, se vedde che beseugna operâ contra de lê: l’ugualiansa di òmmi a no l’é unna seu natua, a l’é un nòstro dovei.