Gourdjieff, Rencontres avec des hommes remarquables, 1960

“E exigense da civiltæ contemporanea an generou unn’atra forma, assæ specifica, de lettiatua, ch’a vëgne ciammâ giornalismo.

No pòsso passâ sotta scilençio sta neuva forma letteräia perché, levou o fæto che a no pòrta assolutamente ninte de bon pe-o sviluppo de l’intelligensa, a l’é vegnua, mæ pai, o mâ di nòstri tempi, into senso che a l’eserçita unn’influensa funesta in scî rappòrti umen.

Sto genere de lettiatua o s’é diffuso ben ben inti urtimi tempi perché – ne son fermamente convinto – o corresponde megio de ògni atro a-e debolesse e a-e exigense determinæ inti òmmi da-a seu crescente farta de voentæ. Finisce coscì pe atrofizzâ e seu urtime poscibilitæ de acquixî i dæti che ghe permetteivan, scin à oua, de piggiâ ciù ò meno consciensa da seu reale individualitæ – o solo mezzo pe razzonze o regòrdo de un mæximo, fattô che o no se peu sghindâ into processo de perfeçionamento de un mæximo.

Pe de ciù sta lettiatua cotidiaña, privâ de prinçipi, a l’isoa areo o pensceo di òmmi da-a seu individualitæ, de mòddo che a consciensa morale, che de semme in semme ancon a l’appariva inte liatri, oua a l’à cessou de parteçipâ a-o seu pensceo.

E son ormai privæ di dæti che scin à quello momento gh’aivan asseguou unn’existensa ciù ò meno sopportabile, a-o manco into campo di rappòrti personali. Pe sfortuña nòstra, sto genere de lettiatua, ch’a l’invadde ògni anno de ciù a vitta quotidiaña de persoñe, a fa patî a-a seu intelligensa un indebolimento in ciù, consegnandola inerme à tutti i tipi de inganni e de erroî; a î mette feua stradda de maniman, a î sväia da chesesegge mòddo de pensâ ciù ò meno fondou, e incangio de un giudiçio san, a stimola e a fissa inte liatri çerte tendense indegne, comme: incredulitæ, rebellion, poia, pudô, discimulaçion, orgheuggio e coscì via.

Pe dipinzive in quarche mòddo tutto o mâ fæto à l’òmmo da sta neuva forma de lettiatua, ve contiò çerti avvegnimenti caxonæ da-a lettua di giornali: no ò raxon d’indubitâme da seu veridiçitæ, perché o caxo o l’à vosciuo che mi ghe parteçipesse (...).

Inte un di mæ soggiorni à Baku lezo, pe diversci giorni de fia, in scî giornali locali che mæ nevo o riçeveiva, di longhi articoli, che e chinòlle occupavan ciù da meitæ do giornale, donde se faxeiva o lözo o ciù sperticou de unn’attoa e da seu bravua, con tutti i particolari poscibili. Se parlava de lê con mai tanta de quella inscistensa, e con mai tanto invexendo che fiña mi, òmmo vegio, me son infiammou e unna seia, lasciando da parte tutti i mæ affari e renonçiando a-e mæ abitudini, son anæto à tiatro pe vedde a stella. (...). Oua, sensa tegnî manco in conto e mæ conceçioin personali in sce l’arte, ma consciderando sempliçemente a cösa da un ponto de vista ordenäio, devo riconosce che no aiva mai visto ninte de paragoneive à sta celebritæ... pe-a farta de talento e l’assensa de noçioin e ciù elementari in ponto arte scenica e interpretaçion de unna parte. (...). Comme son vegnuo à savei dapeu, un çerto industriale de Baku – o tipico raffinatô de petròlio che o l’aiva fæto fortuña – o l’aiva antiçipou unna bella somma à çerti giornalisti, promettendoghe de raddoggiâla se fïsan riescii à rende avvoxâ a seu amante, scin à pöco tempo primma a camea de un inzegnê rùscio, che lê o l’aiva seduto in occaxon de seu vixite de affari. (...).

O pubrico o no sa mai chi l’é chi scrive. O conosce solo o giornale, o quæ o l’appartëgne à un gruppo de esperti commercianti. Cöse san esattamente quelli che scrivan in sce sti giornali, e cöse succede derê a-e quinte da redaçion? O lettô o no ô s’a, e o piggia pe öo tutto quello ch’o treuva in scî giornali. (...). Se devo credde à l’imprescion che m’é restou dòppo avei lezzuo a stöia antiga, e élites de civiltæ de un tempo no avieivan mai permisso che unna scimile anomalia a duesse mai tanto à longo”.