G8 vint’anni apreuvo
Perché emmo perso

L’è façile giudicâ i fæti l’ea conträio a-a globalizzaçion in prospettiva, ammiando co-a comoditæ di vint’anni che son passæ da-i giorni do G8 de Zena, ch’o segna scimbolicamente à livello internaçionâ o ponto d’arrivo, e de iniçio da retiâ, de l’urtima onda alternativa a-o modello dominante: l’atromondismo. Ciù diffiçile, ma ciù interessante, çercâ de regordâse comme l’è successo, tornando a-i penscëi de quelli anni giusto dòppo o 2001, quande paiva che pe-o movimento ghe fïse un grande avegnî, e incangio l’ea apreuvo à finî tutto. Perché oua, l’è o caxo de dîlo ciæo, l’è tutto finio, e sensa stâ à giâghe intorno poemmo affermâ che emmo perso. Ma emmo perso de maniman, sensa addâsela, cian cianin. Emmo perso perché emmo comensou à pensâ à atro, ò à no pensâ ciù à ninte.

E grendi manifestaçioin do G8 à Zena arrivan dòppo quelle de Seattle, dòppo l’insurreçion zapatista in Chapas, e inte un contesto soçiale, colturale e artistico internaçionâ che o permetteiva l’existensa de unn’alternativa, into senso che questa alternativa a se pensava diffiçile ma poscibile. E un modello alternativo à quello dominante o no l’è solo o fruto de unn’idea politica, econòmica e soçiale: pe existe o l’à beseugno de l’arrembo artistico, estetico, colturale, saiva à dî che o deve poei generâ un costumme e di riferimenti sòlidi, che façilitan l’adexon e o sentimento – pe chi o l’aderisce – de “fâ parte de un quarcösa”. Un quarcösa, se poscibile, de ciutò- sto definio, e no solo pe negaçion.

Queste condiçioin gh’ean vint’anni fa: no gh’ea solo a Klein, Chomsky e a i atri riferimenti dimmoghe “teòrichi”; gh’ea Marcos che o portava o conflitto in sce un cian differente e Manu Chao che o ne metteiva e paròlle in muxica. Gh’ea un scistema no solo de valoî, ma anche colturale e estetico, che o se contrapponeiva à quello dominante; unn’alternativa che a parlava unna lengua diversa da quella do potere, a se vestiva, a cantava e a s’ammava in mòddo differente.

Ancheu questo o no gh’è, e a sensaçion a l’è che o no ghe saià pe un bello pö, scinché l’imponderabile de l’istöia o no mette torna in circolaçion quarche elemento de difficoltæ pe-o modello dominante; che però, oua comme oua, o l’è fortiscimo, e o pâ anâ ben à squæxi tutti. O dimostra a capaçitæ de inglobâ chesesegge elemento critico, luxingando, pagando, eccetera, e do resto perfeçionando delongo de ciù un scistema de vitta into quæ pâ imposcibile imaginâ unn’alternativa.

Piggemmo pe exempio e proteste che gh’è stæto primma da pandemia pe-a costion do cangio climmatico: chi ê faxeiva, a-o de là do fæto che o l’ea zoeniscimo, o no faxeiva parte de “unn’atra parte da societæ”. Do 2001 chi l’ea conträio a-a globalizzaçion o no accattava Nike e o no anava da Mc Donald, e atre röbe do genere; oua chi protesta contro o climma o no se differençia guæi, perché o no peu differençiâse: o l’ammia e serie, o deuvia o smartphone, i abiti de consummo e l’estetica no peuan ëse tròppo radicalmente alternativi. Son proteste riformiste, in sce un tema che o domanda o pensceo revoluçionäio (levou Extinciton Rebellion, che però o l’è minoritäio).

Ma o cangio revoluçionäio o no l’è ciù attuale, into pensceo contemporaneo, escì ben che a neçescitæ a gh’è. Però se preferisce pensâ a-o “pomodoro di prossimità di agricoltura biologica” che a-a lòtta pe-o cangio do scistema soçioeconòmico. Se ghe pensemmo, anche o “pomodoro di prossimità di agricoltura biologica” o l’è figgio do movimento de vint’anni fa: tra e tante diverse instanse che componneivan o moxaico de l’atromondismo gh’ea anche quella de un mangiâ ciù genuin, eccetera. Oua se trovemmo che l’è arrestou solo o “pomodoro di prossimità di agricoltura biologica”, e mille atre röbe do genere (o coton ecològico, i pesci pövei, eccetera), che pe caitæ van beniscimo, ma a-o de feua de un quaddro critico d’insemme, ançi inglobæ into quaddro mainstream, no scignifican ninte. Tanto ciù che o resto do mondo – che vint’anni fa o contava ancon relativamente pöco, e incangio oua o l’è tanto potente quanto quello oçidentale – o va ancon inte unn’atra direçion.

Da “un altro mondo è possibile” à “mangiamo cibo di prossimità” a stradda a l’è longa, e l’occaxon ch’a se ne presenta a l’è importante pe storicizzâ un percorso. Operaçion ch’a no peu no includde da un lato unna valutaçion in sce l’impatto che an avuo i soçial network e o smartphone (e doe grendi innovaçion do secolo, pe-o momento) in sciâ pulscion de ribellion da popolaçion oçidentale, e da l’atro lato a neuva realtæ, inta quæ o mondo oçidentale o peisa relativamente de meno. Pe quanto no pòsse fâ piaxei dîlo, o movimento No global o l’ea ancon un movimento in boña mesua oçidentale (e sudamerican, che o l’è oçidente, anche se sud). Ancheu semmo inte un contesto mondiale, sensa nisciuña vixon alternativa ch’a sacce parlâ (a-o manco potençialmente) à tutti. E fòscia, inte condiçioin attuali, no l’è manco poscibile. O discorso o l’è longo e o merita ben ben de approfondimenti. Pe-o momento poemmo constatâ solo che a scinistra mondiale a l’è mòrta à Zena, oua l’è vint’anni.