I rappòrti Euröpa-Ruscia tra l’interesse econòmico e e neçescitæ da politica

Identificâ de prospettive o no l’è façile inte sti tempi de pandemie. Chi l’aviæ posciuo imaginâ che un virus o rendesse o semplice mesciâse tra a Ruscia e a UE praticamente imposcibile durante diversci meixi, tiando torna sciù unna neuva cortiña de færo? Sto periodo, do resto, o l’à confermou çerte tendense ciæe.

A politica a l’influensa ormai i affari ciù che o conträio. A-o manco da dòppo a crixi ucraiña do 2014, che a l’à provocou che e doe parte fïsan pronte à sacrificâ di interesci econòmichi evidenti a-i seu obiettivi politichi. E sançioin an rinciassou a diplomaçia e sta tendensa a se rinfòrsa. Sto chì o rende i ligammi econòmichi à longo termine assæ vulnerabili a-i avvegnimenti politichi, a-i sviluppi interni e a-e tenscioin internaçionæ.

Quande l’economia a diventa de maniman ciù politica, “no gh’è de relaçioin con l’UE, in quanto à organismo”, o nòtta o ministro di affari esteri, Sergey Lavrov i 23 de marso passæ. Se peu discute e caxoin e e responsabilitæ che an portou à sti ponti. O fæto o l’è che a coperaçion co-a Ruscia a s’inscrive inte sto momento inte un quaddro bilaterale tra stati. O “Green Deal” europeo o rappresenta donca unn’occaxon de sviluppâ di accòrdi pe un sviluppo ciù durevole. Ma a polemica in scî vaccin Sputnik Y a mostra che rinforsâ a coperaçion Ruscia-UE o l’è diventou unna sfidda. A-a natua o veuo o ghe mette agoscia. Da quande a parte de l’UE into commercio estero da Ruscia a l’è passâ da-o 49,3% do 2013 (avanti de sançioin) a-o 38,5% do 2020, a quöta da Ciña a n’à mai ciantou de cresce, passando da-o 10,5% do 2013 a-o 18,3% do 2020. A ciña a l’è ormai o primmo partner commerciale da Ruscia e sta dinamica a dovià aumentâ ancon, perché de impreise cineixi guägnan di dividendi da l’alleansa politica tra Mosca e Pechin.

Ste chì rappresentan unna concorrensa ch’a cresce de maniman pe-e impreise europee, mascime inte infrastruttue e inti traspòrti, con ëse a ruscia un attô importante da Belt and Road Initiative. Unna parte do futuo ariopòrto de Mosca-Kazan o saià donca construio pe-a China Railway Construction Corporation. Intanto che o progetto Nord Stream 2, o gazduto sino-ruscio Power of Siberia o l’arrivià fito a-a capaçitæ piña de fonçionamento, e a construçion de un segondo gazduto Power of Siberia 2 o l’è lì che se ne parla za.

A strategia ruscia de sostituçion de importaçioin a rappresenta unn’atra tendensa de fondo. O paise o no l’è autosuffiçiente inte un gran numero de costioin, e into contesto attuale sta dipendensa a l’è vista comme unna debolessa. O settô da carne de pòrco o rappresenta un bon exempio. Do 2020 e esportaçioin de carne de pòrco an superou e importaçioin, tanto che oua l’è dex’anni e importaçioin rappresentavan un terso da consummaçion interna. Con tutto, o paise o l’arresta assæ dipendente da-e importaçioin de materiale genetico e de pòrchi reproduttoî de qualitæ, di quæ o 90% o vëgne da l’UE e da l’America do Nòrd. Sostituî e importaçioin là donde l’è poscibile, e diverscificâ l’economia do paise o domanda ancon di grendiscimi investimenti e trasferimenti de tecnologia.

E tenscioin politiche an reiso e esportaçioin meno segue, comme a constatou i esportatoî europëi de produti agricoli apreuvo a-a proibiçion de importaçioin de produti alimentari comme “contro-sançion”, inte l’agosto do 2014. Intanto, ògni impreisa ch’a l’investiva into paise a l’ea consciderâ comme un investitô naçionâ; o reverso da medaggia o l’è che i investitoî europëi no an ciù o benefiçio de unna meña de “statuto de foresto onoreive”. An ciutòsto conveniensa à presentâse comme de impreise “rusce”, cösa ch’a veu dî che à tutti i mòddi devan rispettâ e regole do zeugo de lì. L’è veo, o contesto locale di affari o l’è megiou de brutto, segondo a clascifica Doing Business da Banca mondiale. O paise o l’è passou da-a 120 poxiçion a-a 28exima, do 2020. O pâ megio de l’Italia ò da Fransa, clascificæ 58exima e 32exima.

Che conseguense ghe saià pe-e impreise europee? Travaggiâ man inta man co-e camie de commercio locali, e ambasciæ naçionæ, i mediatoî de affari e e autoritæ locali diventa sempre ciù strategico. Ma sorviatutto e societæ che espòrtan verso a Ruscia dovieivan çercâ de investî direttamente into paise, che o rpesenta ancon de prospettive industriali, passando pe-o commercio in linea ò l’informatica. Pe ricollegâse a-a tradiçion istòrica di mercanti zeneixi, che saveivan tegnî in conto i reiseghi politichi de l’epoca, pe spantegâ i seu interesci econòmichi scin a-e ziñe do Mâ d’Azov.

Unna verscion ciù longa de st’articolo a l’è stæta pubricâ in ingleise in sciô scito di ISPI – www.ispionline.it – e in franseise in sciô scito de La Vigie – www.lettrevigie.com –.