L’ambiente o l’à sprescia

A sciensa a l’à demonstrou ormai, a-o delà de ògni dubbio, comme o crescio progrescivo de l’anidride carbònica e do metan inte l’atmosfera o rappresente a caxon primmäia do rescädamento globale attuale. Uña de conseguense do rescädamento globâ o l’é o cangio climmatico, i effetti ciù evidenti do quæ son o deslenguâse de calòtte polari, l’innarsamento do livello do mâ, o crescio di ecoscistemi e a perdia da biodiverscitæ. Dita in atre paròlle, o rescädamento globâ o l’é apreuvo à “desturbâ” o climma.

L’é ben sottoliniâ che o climma o no l’é mai stæto stabile; inta stöia do nòstro pianeta o climma o l’é cangiou delongo, ma l’attuale crixi climmatica, de origine antropogenica, a l’é unica pe velocitæ, intenscitæ, caxoin e, sorviatutto, conseguense. O cangio climmatico antropogenico o l’à za portou à de modifiche sostançiali inte medie inti estremmi de tante variabili climmatiche. Di atri cangiamenti climmatichi ormai no se peuan ciù sghindâ, ma a velocitæ e l’entitæ dipendan da-o successo de politiche globæ de mitigaçion. Pe sta raxon inta vintunexima convençion Quaddro de Naçioin Unie in scî cangi climmatichi (apreuvo indicâ comme COP21), ch’a s’é tegnua à Pariggi do 2015, quæxi tutti i paixi do pianeta an deciso de mette in atto un cian pe combatte o rescädamento globâ.

I ponti prinçipæ de l’accòrdio preveddan che se treuve un equilibrio tra e emiscioin e o sciorbimento di gaz særa à partî da-o 2050, con mantegnî o crescio da temperatua globâ ben a-o de sotta di 2°C.

L’accòrdio de Pariggi o suggerisce ascì che o rescädamento globâ o peu ëse limitou fortemente à traverso l’applicaçion de de politiche energetiche decise, comme l’aumento di prexi di combustibili fòscili in favô de di investimenti in tecnologie à basciscima emiscion de carbònio. O messaggio o l’é ciæo: i combustibili fòscili appartëgnan a-o passou, tanto che in futuo l’energia a porrià ëse solo à emiscion de carbònio pesso.

Con tutto, sciben i boin propòxiti da COP21, o scistema energetico mondiale o continua à ëse o ciù grande emissô de gaz à effetto særa, pe caxon da seu grande dipendensa da-i combustibili fòscili. L’accòrdio de Pariggi o l’é stæto firmou do 2015, e da alantô e emiscioin de CO2 ligæ a-a produçion energetica son aumentæ. O diväio tra e aspettative e a realtæ inta lòtta a-o cangio climmatico o l’arresta donca scignificativo. L’é neçessäio e urgente unna tranxiçion energetica basâ in scê energie rinnovabili, l’efficiensa energetica a l’elettrificaçion. E tecnologie son disponibili za ancheu, se peuan applicâ in sce larga scaa e son competitive in ponto costi. I anni che vëgnan saian cruçiale; e analixi scientifiche ciù recenti an dimostrou che solo se agimmo subito, con redue de brutto e emiscioin de CO2 avanti di pròscimi 10 anni, saiemo boin à contegnî o crescio da temperatua media globâ a-o de sotta di 2°C rispeto a-a temperatua media pre-industriale. Ma pe razzonze st’obiettivo l’é neçessäio unna revixon profonda de politiche energetiche à livello internaçionâ. Dita despægia, a tranxiçion energetica a deve avvegnî ben ben ciù de spedia de quante o l’é previsto. Pe razzonze i obiettivi suggerii da-a COP21, a diffuxon de energie rinnovabili a dovieiva aumentâ de a-o manco sei vòtte rispeto a-i cien attuali di maggioî paixi industrializzæ. Se s’anesse apreuvo a-i cien energetichi attuali, defæti, e emiscioin annue de CO2 ligæ a-a produçion de energia ammermieivan solo un pittin, avanti do 2050, e sto chì o contribuieiva à fâ aumentâ a temperatua media superfiçiâ do nòstro pianeta de a-o manco 2.6°C avanti do 2050, rispeto a-o periodo preindustriale, con de ripercuscioin devastanti, à livello soçiale, politico e econòmico.