L’arte a se na va via da Zena

Dòppo avei frequentou o liçeo linguistico Grazia Deledda, à Zena – scheua inta quæ o studdio de træ lengue moderne o m’à indirissâ verso unna vixon internaçionâ da coltua contemporanea – do 1970 son riescia à transformâ l’oggetto da mæ pascion, l’arte vixiva, inte l’oggetto do mæ travaggio, con arvî a Galleria Unimedia inte un vegio palaçio do çentro stòrico zeneise.

Do 1995, in sce l’onda de çerte esperiense americañe visciue inti mæ viægi à New York, ò provou l’avventua da casa-galleria inte un scito in sciâ colliña de Caignan, con vista in sciâ mäveggiosa copola de l’alessi.

Do 2005 ò averto, into seiçentesco Palaçio Squarciafico, l’Unimedia Modern Contemporary Art, che a-o delà de unn’attivitæ constante de presentaçion de zoveni artisti, a l’à rivòlto particolâ attençion, into corso di anni, a-a poexia vixiva e concreta, a-a body art, à l’arte concettuale, à l’arte antropològica, e à di mezzi esprescivi comme a fotografia, o video e a performance in areo.

À meitæ di anni ‘70 son stæta feliçemente contaggiâ da-o virus Fluxus, da-o quæ no son ancon stæta risanâ!

Riassummo inte ste pöche linie a stöia de ‘50 anni de attivitæ colturale inte unna çittæ comme Zena, da quæ nòmino quarchidun di “pòsti” conosciuo à livello internaçionâ... Quande son partia pe sta mæ avventua, pensava assæ ingenuamente che saieiva stæto façile... o no l’é stæto, o l’é stæto tutto estremmemente diffiçile, ma in quarche mòddo son ancon chì. Ea di anni diversci, inti quæ provâ unn’avventua l’ea poscibile! Zena a l’é sempre stæta unna çittâ serrâ verso o neuvo, arroccâ in sciâ tradiçion, assæ conservatoa. Ma a l’é anche a çittæ inta quæ l’é nasciuo tanti fenòmeni colturali d’eccellensa: o tiatro sperimentale, co-a Borsa d’Arlecchino, e rivista d’avanguardia comme o 3rosso e o Marcatré, l’Arte Pövea, i cantautoî; a çittæ che tra e primme in Italia a l’à ospitou o Living theatre e a l’à accuggeito Jospeh Beuys, Allan Kaprow e a banda di Fluxus. E ancon, o tiatro de Pina Bausch e quello de Bob Wilson.

E de maniman, da-o veu assoluo à livello instituçuionâ, inti anni ‘70 graçie a-a voentæ de çerti appascionæ pe-i quæ a coltua a l’é ciù importante do pan (artisti, galleristi, cuatoî, colleçionisti) e a-o geniale intervento de l’assessô Sartori, o l’é nasciuo o Museo d’Arte Contemporanea de Villa Croce, segondo museo communale in Italia dòppo o Castello di Rivoli, museo che pe ciù de un dexennio o l’é stæto un çentro de energia instancabile pe l’arte vixiva e pe-a coltua in areo. Se capisce, o museo o l’à attiou a presensa de di artisti e de di cuatoî, o l’à fæto da propulsô a-a nascita de atre gallerie. Do 2004 Genova Capitale della Cultura a l’é stæta unn’esploxon inte tutti i campi da coltua, da-a muxica à l’arte vixiva, a-a poexia, a-a lettiatua.

E dapeu... dapeu un passin passetto a çittæ a l’à comensou à anâ in derê, in sciô cian do privou e purtròppo anche pezo, in sce quello de l’attivitæ instituçionâ. Seguo, a crixi econòmica a l’à zugou un fòrte ròllo negativo, sensa dinæ no se fa ninte in davei. De maniman o museo o l’à perso a seu carrega propulsciva, tante gallerie an serrou, tanti colleçionisti son sparii e no son stæti sostituii da di zoeni, i artisti no an trovou ciù di pòsti donde espoñe e seu òpie e idee. À fâla curta, emmo perso “l’ambiente”, e insemme à l’ambiente emmo perso anche a domanda de coltua. E sta chì a l’é a nòtta a ciù dolorosa, ch’a pâ confermâ a tristiscima diciaraçion rilasciâ da-o Tremonti ormai l’é quarche anno: “con la cultura non si mangia”. E no l’é vea! Perché no solo a coltua a l’é importante comme o pan, comme ò za dito, ma a coltua a l’é un mezo straordenäio pe creâ di induti econòmichi ecceçionali.

O resto o l’é crònica che veddemmo e lezzemmo tutti i giorni, comme l’installaçion da statua de giorgio Parodi, giusto à Caignan donde staggo mi (mostruosa installaçion, ch’a no se peu sarvâ da nisciun ponto de vista, segge estetico che de contegnuo), ma continuemmo, perché no se peu mollâ, comme a dixe Cristina Lodi, co-o “pescimiscmo da raxon e l’ottimismo da voentæ”, de gramsciaña memöia.