A Silicon valley vista da un zeneise ch’o ghe travaggia

À partî da-i urtimi anni ‘50, i sciensiæ e inzegnê de l’äia d’in gio à San Françisco, conosciua comme Silicon Valley, an produto ò contribuio à sviluppâ a ciù parte de tecnologie che caratterizzan a vitta d’ancheu. Da-i mezi de communicaçion moderni che ne permettan de vedde e parlâ co-i nòstri amixi e pænti inte di paixi lonten, comme se s’attrovessan vexin à niatri, fin a-a poscibiltæ d’avei inta stacca di arneixi che peuan tiâ zu da-a ræ unna quantitæ de informaçioin pægia à de dexeñe de miliardi de biblioteche de Lusciandria, a-e mävegge da meixiña moderna fæte poscibile da-i instrumenti informatichi, a-i satelliti che ne dixan donde anâ co-a machina – ò a-e machine che ô fan da sole! –, a sampa da “valladda do sciliçio” a l’é da tutte e parte. A-o de là de critiche, de spesso con raxon, de conseguense da tecnologia in sciô nòstro benstâ, o modello da Silicon Valley o l’à delongo impio de giöxia e atre superpotense, che ciù de unna vòtta an provou à reproduilo, pe-o ciù con di resurtæ scarsci. Cös’o l’é ch’o l’à permisso à sta valladda, che fin a-i anni ‘60 a l’ea conosciua pe-i seu erboi da fruta, de vegnî o çentro da revoluçion tecnològica? Se capisce, e condiçioin politiche e finançiäie ean propiçie ma, mascime ancheu, no en escluxive di Stati Unii.

Uña de raxoin ciù d’importansa a s’à da çercâ inta mentalitæ di primmi sciensiæ e inzegnê anæti à stâghe. Stæti instruii inti laboratöi de grende dite inzegneristiche, aivan l’andio de travaggiâ inte di ambienti pin de regole e de gerarchie redene, e ghe veddeivan unna ciæa divixon: lô, i impiegæ zoveni, che doveivan anâ apreuvo a-i commandi, e i bacchen, ascidiæ da-a poia de vegnî scompassæ da gente con de idee neuve, che ean i soli à poei piggiâ e deçixioin e ciù importante. Stuffi de sti ambienti de lou tradiçionæ, che no favan röso à l’imaginaçion e che pe lô ean tipichi da còsta de levante di Stati Unii e do Vegio Mondo, i fondatoî de primme dite da Silicon Valley an sperimentou con unna formola do tutto neuva pe unn’impreisa commerçiâ: unna gerarchia reduta a-o meno che se pòsse, l’avertua a-e idee neuve e o respeto de tutti i impiegæ pe quello ch’en, sensa stâ à tegnî conto da seu etæ ò esperiensa. Ancon ancheu, à camminâ inti scagni de dite da Silicon Valley, se veddià i stagisti, impiegæ, cappi e direttoî assettæ tutt’assemme inta mæxima stançia. Ninte sciô direttô, voscià, Sir ò Madam: tutti s’acciamman pe nomme, inte unn’atmosfera sereña sensa o timô de vegnî sbraggiæ pe avei parlou feua de pòsto, e ascì i neuvi impiegæ en sponciæ à dî a seu, perché se capisce che peuan portâ di ponti de vista freschi.

Con tutto che o scistema de seguessa soçiâ american o l’é ben ciù stoccæso de quello europeo, unn’atra particolaritæ do spirito da Silicon Valley a l’é l’ammiraçion pe quelli ch’an l’ardî de scommette inte de neuve idee e d’inandiâ a seu dita, à despeto do reisego de fâ fallimento. A-o conträio di paixi donde unn’impreisa anæta mâ a l’é vista comme un motivo de derixon e unna maccia indelebile into curriculum, da quelle bande a l’é vista comme unn’opportunitæ ræa d’avei impreiso quarcösa, squæxi comme unna marca d’önô.

L’é façile, con fâ di sti discorsci, de cazze inta banalitæ de l’American dream, e con tutti i problemi che ancheu ammagoñan a valladda gh’é da domandâse quante a smangiaxon d’inricchîse a l’agge piggiou o pòsto da coixitæ e da pascion pe-a descoverta. N’arresta però de seguo unna leçion importante da trâ da sto capitolo de l’istöia: unna soçietæ ch’a veugge innovâ a l’à beseugno de dâ a mente à unna pluralitæ de voxe sensa l’impoxiçion de gerarchie e a l’à da çelebrâ – e no scöxî – chi o l’à l’ardî de navegâ in çerca de neuvi orizzonti.