Òmmo, gianco de sciusciant’anni

A candidatua de Antonella Bellutti a-a Prescidensa do CONI a no l’é stæta unn’iniçiativa de testimoniansa ma l’iniçio de unna revoluçion, colturale e politica. Un movimento pacifico o s’é arrecampou atorno à lê, spontaneamente, pe supportâ a seu propòsta de un spòrt incluxivo e fondou in sce legalitæ e diritti, paritæ e opportunitæ pe tutti.

O no l’é un caxo che segge stæto unna dònna à fâse portatoa de unn’iniçiativa coscì de rottua, unna tedòfoa consapevole de portâ a seu voxe in rappresentansa de tutti quelli che da sto spòrt no se sentan rappresentæ e che son unna inconsapevole maggioransa. Ancon pe pöco.

O spòrt italian, anche inte ste eleçioin de vertice, o s’é demonstrou pe quello che o l’é: unn’enclave construia inti dexenni pe auto-alimentâse, sotta o nomme de unn’autonomia che a l’à finio pe constituî o pretesto e a scusa pe giustificâ – feua contròllo – un scistema maròtto, fæto de privilegi e spartiçion de potere. Un mondo che o dovieiva incangio ëse portou de valoî universali de ugualiansa, o rappresenta a-o conträio che l’é tutto dî a sottocoltua do paise intrego, e de tutti i settoî produttivi che ô compoñan.

Un mondo che o l’é riescio à rende corpeive unna dònna, unn’atleta, e giustificâ coscì o seu licençiamento pe caxon da seu maternitæ, ch’a l’é diventâ fonte de responsabilitæ resarçitöia ciutòsto che l’emblemma da proteçion di diritti e da vitta mæxima. Unna vea fortuña che sto fæto de crònaca, portou da-a societæ sportiva depoì à un giudiçe, o segge vegnuo feua pròpio into mentre da candidatua de Antonella: o seu mondo de idee, construie in sce l’esperiensa personale, in sciâ fadiga e in sce competense da seu squaddra de tecnichi, idee che no dovieivan manco ëse qualificæ comme innovative, o l’é arrivou anche pe questo à l’önô de crònache, con permettighe de ëse lê à dittâ, à tutti i atri candidæ – con l’arrembo da politica che a l’é anæta apreuvo a-o consenso de gente, finarmente indignâ – l’agenda di temi da trattâ pe riformâ sto settô.

Sta chì a l’é stæta a vea vittöia, che a l’à za promisso de ëse a primma de unna longa serie: l’avei mostrou à tutti quelli che into seu agî an perso o senso mæximo do seu ròllo instituçionâ – che o dovieiva protezze interesci diffuxi, ma che incangio conduxan de existense cegæ solo che a-e lògiche do dinâ, esprimmendo coscì a seu preferensa pe chi o promette a conservaçion de quelli privilegi – che existe un mondo despægio, che o l’é pronto à tiâ sciù a testa e à sostituîse à quello atro mondo, corrotto da ruzze de dexenni de iniquitæ, destinou à sparî.

O l’é stæto un önô pe mi, inte tutti sti meixi de campagna elettorale, de dâ à Antonella Bellutti o mæ contributo de giurista, tanto ciù a-a luxe da riforma do diritto sportivo tòsto approvâ, che pe comme a l’é pensâ, no à caxo pròpio da quello mondo, a rappresenta un mezzo pe no cangiâ ninte, lonxi da-o perseguî di obiettivi de pari dignitæ into travaggio, tanto belli sbandëtæ d-o ministro, sciben che nint’afæto vëi. E se partià torna giusto da chì, da-i emendamenti a-a riforma, continuando à denonçiâ, comme emmo za fæto in commiscion coltua segge a-o senato che in Parlamento, che no basta unna narraçion pe fâ sostansa.