O re denaro

Sto chì o l’é quello che o reçita l’attô in costumme, into trailer ch’o l’annonçia a mostra “Il Re Denaro. Le monete raccontano Genova fra arte, lusso e parsimonia”, ideâ da Guido Rossi e cuâ con Anna Orlando, coproduta da-o commun de Zena e Associazione Amici di Palazzo della Merdiana, co-a parteçipaçion de Banca Carige. Inaugurâ l’espoxiçion i 27 de mazzo, saieiva bello recenscîla, se no fïse però de importansa primmäia fermâ in sce quello che o l’à tristemente precedua: o titolo, e aponto, o trailer divulgativo de un menuto, diffuso in scî canæ soçial di Musei di Genova e de Palazzo della Meridiana.

A mostra, divisa in seçioin dedicæ ogniduña à unna fase stòrica compreisa tra a primma meitæ do Trexento e a segonda meitæ de l’Euttoçento, vëgne presentâ chiaramente comme unn’orgoggiosa e acritica celebraçion do dinâ. Inte quelli secoli, tra erti e basci, a Zecca de Zena a batte monæa, a finançia impreise e battagge, a dòmina i mercoei e a l’incroxa i grendi nommi da stöia. O l’é un racconto affascinante, quello de l’economia zeneise, e bastieiva consultâ i Atti da Società Ligure di Storia Patria pe rendisene conto. Con tutto, e pe tante raxoin, saieiva ciù interessante e inricchente asciste ancheu à unna seu elaboraçion ciù complessa e meuia, à unna narraçion ch’a fesse tesöo da distansa temporale e che a savesse leze torna i fæti segondo unna vixon meno univoca e ciù articolâ.

Fâ unna boña divulgaçion colturale do 2021 veu dî, pe exempio, includde de “voxe” arrestæ pe do bello scilenti, accheugge di ponti de vista, atre prospettive, anche in senso parallelo e orizzontale. Unna mostra stòrico-documentäia a no dovieiva aspirâ solo à l’intrattegnimento, ma dovieiva riescî à exibî luxe e ombre de impreise e trionfi, a dovieiva inquaddrâ e vittöie e e conquiste drento à unna cornixe ciù grande. L’intrattegnimento o l’é un mezzo potente de communicaçion che però o no peu sostituîse a-o valô do mes- saggio ò a-o peiso do contegnuo. Quæ a l’é l’atra faccia da medaggia? Che aspetti peuan ëse missi in discuscion? Quæ son i lati scui de unna crònaca gloiosa? O prexo pagou in termini de vitta umañe, de spesso innoçenti, tanto pe çitâne un bello banale.

Ancheu no emmo beseugno che ne diggan che graçie a-e palanche emmo unio di pòpoli, fondou di imperi e scoverto di mondi. I “mondi” existivan ben primma de “scoverte” de Cristòffa Combo, e e scoverte son quelle che atri pòpoli ciammieivan colonizzaçion, i imperi son stæti fondæ co-e dinâ, ma ancon de ciù co-o sangue, co-a corruçion e e soverciaie, e di pòpoli intreghi son stæti brutalmente sobbaccæ. O dinâ o l’à accattou e venduo de vitte umañe, in nomme da glöia, o l’à esasperou a povertæ. A monæa do lusso, da bellessa e da parscimònia, a l’é ascì quella da mòrte, do colonialismo, da guæra, do sfruttamento. Un trailer comme quello che emmo dito de d’ato o l’é unn’ingenuitæ doggia: inefficaçe in sciô cian communicativo e in sce quello colturale.

O no l’é o strumento, o veo problema: a l’é a bassa qualitæ do messaggio ch’o se pòrta apreuvo. E sviste, i erroî, a scelta estetica, e forsatue e l’improbabile collage de personaggi e epoche, son meno allarmanti de l’idea ciatta ch’a sta sotta à l’operaçion divulgativa in sciô cian do contegnuo. Azzonzemmoghe, à prescinde da-o resultato effettivo de l’espoxiçion, che a no l’é fòscia unna çernia de bon gusto rende omaggio a-o palanche inte l’anno da pandemia e da profonda crixi econòmica che ancon no emmo superou. E monæe peuan contâ de seguo tante cöse de Zena, di mäveggiosi palaçi patriçi e de ricche colleçioin allugæ lì drento, de l’abilitæ de quelli che an reiso avvoxou o seu nomme into mondo, e de seu intuiçioin pioneristiche, ma, insemme, peuan contâ tanto atro, e stimolâ un pensceo netto e averto, che o no segge fäsou da miti e pregiudiçi. A stöia a no deve ëse scancellâ, ni a dev’ëse lasciâ moî sotta a pua di libbri de scheua. A Stöia a dev’ëse interrogâ.