Se e arme no son ciù benvegnue à Zena

Nave carreghe de arme se mescian tra e caladde e inti container s’asconde di miscili, proiettili e detonatoî. I portuali s’oppoñan. Son quelli de Zena à avei inandiou sta battaggia pe-o desarmo. O Collettivo Autonomo dei Lavoratori Portuali de Zena, ancheu drento a-o scindacato USB, da-o 2019 o l’é in primma linia inta lòtta contra o commercio de arme. I portuali renonçian a-e seu paghe, a-e seu giornæ, pe dî No a-o trafego mortale. Josè Nivoi do CALP e in USB o ne racconta cösa l’é apreuvo à succede tra i portuali, comm’a l’é nasciua a lòtta e quæ son i pasci che se sta faxendo.

I portuali de Zena no an fæto attraccâ a Bahri carrega de arme. Ti ne racconti a vixenda da l’iniçio?

“Do 2015 un compagno portuale o s’ea insospettio pe unna filla de Toyota gianchi destinæ à Tangeri, giusto in concomitansa co-o scceuppo da guæra in Libia. Un anno apreuvo n’arriva un vidio de quelli territöi in guæra e reconoscemmo i mezzi carregæ à Zena da-i adexivi che attacchemmo pe identificâ l’imbarco. O fâ l’imbarco. O fæto o l’ea grave, ingenuamente ô reputemmo isoou, ma comensemmo da lì in avanti à ammiâ con euggi i carreghi. Do mazzo 2019 i portuali de Le Havre n’informan che aivan bloccou a nave Bahri, refuando l’imbarco de eutto òbixi, e che a nave a stava faxendo rotta in sce Zena. Missi in allerta, trovemmo into nòstro pòrto eutto generatoî mimetichi da Teknel. A Teknel e a delta, e compagnie che cuan i carreghi da Bahri, ne riferiscan che son di generatoî destinæ a-a “proteçion civile” de l’Arabia Saudia. Into dubbio, î fotografemmo e î mandemmo a-a Weapon Watch e à Rete Disarmo Italia. E assoçiaçioin ne çertifican che quelli generatoî servan à alimentâ di droin da combattimento e che a famosa “proteçion civile” arabo-saudia o l’é un eserçito fæto e finio. Denonçiemmo à l’Autoritæ portuale e con CGIL-FILT convochemmo unn’assemblea di lavoratoî, invitando anche e assoçiaçioin umanitäie, Emergency e Save the Children, e tanti collettivi politichi, no solo de Zena. Annonçiemmo o sciòpero in sciâ caladda de riferimento, refuando l’imbarco a-a Bahri. A l’é anæta coscì! Battaggia vinta, ma saveivimo che l’ea solo l’iniçio”.

O CALP o s’é destaccou da-a CGIL e o l’é introu in USB. Comme mai? A CGIL a no l’ea a-o vòstro fianco inte sta lòtta?

“Do 2020 i portuali de Bilbao n’informan che stava arrivando di container de esploxivi destinæ à Gedda, con passaggio da Zena. N’attivemmo, ma a CGIL a fa un passo in derê: do 2019 eimo in piña campagna europea e a-a CGIL ghe convegniva promeuve un fòrte sentimento de scinistra, cavarcando a battaggia pe-o desarmo à fianco di portuali. No solo a battaggia contra e arme pe conveniensa politica, ma anche o riguardo da CGIL into parlâ ciù co-i padroin che co-i lavoratoî, n’à portou à çerne USB. Con tutto che mancava garançie da CGIL, inandiemmo un prescidio insemme a-e assoçiaçioin umanitäie, faxendo passâ o messaggio che no solo l’attracco e o carrego, ma ascì o sempliçe tranxito de ste merçe o doveiva cessâ. Domandavimo l’applicaçion de l’articolo 11 da Constituçion e da lezze 185 do 1990. Tanto che favimo o prescidio n’arriva unna communicaçion da-o Ministero di Esteri in sce l’imposcibilitæ de applicâle à quello conflitto, perché de livello locale e no reconosciuo de portâ internaçionale. Peccou che o Parlamento Europeo o no l’ea da mæxima opinion. Pe capî l’interesse de l’Italia pe-e arme beseugna regordâ che o nòstro paise o l’é o dozzen produttô mondiale, e Leonardo a l’é a segonda azienda à livello globâ. O ministro da tranxiçion ecològica o l’é o vegio CTIO da mæxima Leonardo. Into PNRR, 30 miliardi e 700 milioin son destinæ à rende green e açiende che produan arme, no à rende green e açiende e into mæximo tempo convertîne e produçioin in civile, con sarvâ o pòsto de travaggio”.

Chi l’é con viatri inte sta battaggia?

“Comme CALP drento à USB semmo apreuvo à formâ un cordinamento internaçionâ di pòrti pe parlâ tra portuali, unindose no solo inte lòtte pe difende i driti di lavoratoî, ma ascì inta lòtta politica pe-o desarmo. Dòppo i fæti de Zena tanti pòrti, comme Liorno e Napoli, e no solo, an scioperou e bloccou di carreghi de arme, destinæ pe exempio à Israele. A-a fin de zugno emmo organizzou o prescidio “La solidarietà non è un crimine” davanti a-a Prefettua de Zena insemme a-e assoçiaçioin umanitäie che sarvan i migranti in mâ che scappan da-e guære. Arme, guære e mòrti in mâ son i ingredienti da mæxima riçetta. Apreuvo a-i sciòperi contra e arme, çerti compagni portuali de Zena son stæti indagæ pe assoçiaçion à delinque. Semmo segui che ste indagine se serrian con un ninte de fæto, perché l’accusa a pâ seguî o Teorema Calogero. E pensâ che sciña o Pappa o n’à dito BRAVI!”.

No ve sentî comme unna formigoeta depoî à di interesci econòmichi stramesuæ?

“Semmo consapevoli de ëse unna stissa à peto da potensa do mercou globâ de arme, ma a somma de tante gosse a peu creâ unn’onda da-o basso che speremmo à pòsse riçeive e giuste rispòste politiche. In Italia vëgne movimentou 10-11 milioin de container circoncirca, e Zena a ne mescia da sola circa 3. Se i lavoratoî portuali de Zena sciòperan, se crea un danno econòmico à tutto o Nòrd Italia che o se sente fiña in Euröpa. Un quarche peiso ghe l’emmo. A logistica a l’é l’urtimo anello da filiera de l’industria de arme; semmo apreuvo à intrâ inte fabriche ascì, semmo in contatto streito pe exempio co-o comitou contra l’RWM de Iglesias, co-o quæ se lòtta contra unna forma de ricatto salariale perché de fæto l’azienda tedesca, ch’a produe arme in Italia perché a no peu produle in Germania, a l’é unna de pöche realtæ lavorative in sciô territöio, donde o l’é erto o livello de desoccupaçion e de povertæ. Intremmo ascì inte universcitæ pe promeuve tra i studenti a coltua do desarmo: progettâ un arto biònico pe anâ avanti in campo mego o no l’é comme progettâ un aerio che caccia de bombe. L’Euröpa, in primis l’Italia, e i Stati Unii son i ciù grendi produttoî de arme a-o mondo, e semmo ancon lonten da unna tranxiçion no solo ecològica, ma anche sensa arme. O profitto o ne mette tutti in sce l’attenti e pe oua o ne fa serrâ un euggio, à livello globâ. Niatri anemmo avanti, e l’alleansa tra portuali pe-o desarmo a cresce: insemme à niatri se oppoñe di lavoratoî portuali da tutto o mondo, da-o Sud Africa a-i Stati Unii, da-o Sud scin a-o Nòrd d’Euröpa.