Çentro stòrico borgheise

Sarzan: a Zöna a ciù antiga da çittæ e te gh’attreuvo in sce Facebook de föto de unna construçion originale, unna grande banchiña e in sciô sfondo, derê à unna miagia transparente, a tore da gexa.

Inte sta commistion tra etæ de mezo e contemporanietæ me son fæto piggiâ da unna domanda in sce chi abita a zöna e in sciô scignificato che peu avei unna cösa pægia. Se vedde subito che se tratta de una travaggiou ben studdiou. Unna meña de òpera à incastro de pallet. Con tutto, sto aspetto popolare o no peu che tradî unna realtæ da zöna ben ben diversa, che a l’à piggiou di valoî inmobiliari de tutto rispetto: creddo che nisciun quartê comme sto chì, levou Arbâ, o no stagghe patindo à Zena a crixi do mercou di prexi de abitaçioin. Chì questi zoeni, e meno zoeni, an misso in òpera o seu inzegno pe personalizzâ o pòsto donde vivan. Un pòsto assæ appetibile pe chi o sciòrte a-a seia, tiatro da movida e de un baxin de utensa ch’o treuva di ponti de incontro vexin à l’universcitæ.

Stâ in Sarzan, donca, l’é vive inte un pòsto de ricchi no ricchi, gente sensa sosta, che no â fa pesâ. M’é vegnuo in cheu, coscì, unna bella scena da pellicola Ovosodo de paolo Virzì, inta quæ un figgeu benestante o s’infiltra inte unna famiggia desastrâ, de l’avvoxou quartê proletäio de Livorno, e o ghe fa mille complimenti: “che bello! pâ de stâ à Bucarest!”. Eliatri s’â beian.

L’ammetto, gh’é da provocaçion inte quello che ò scrito in sciô social. A l’é unna cösa che ò imparou à vint’anni, quande gente missa economicamente ben ben megio che mi, quande arrivava o conto a me diva “paga ti che ti travaggi”. Sentî comme teu o pòsto donde ti vivi l’é à tutti i mòddi importante, e no l’é mancou e preise de poxiçion inte l’ambito da discuscion, perché quarchidun o s’é sentio tiou in ballo. Quande quarchidun o credde inte quarcösa e o ghe mette de l’impegno, tanto de cappello. Però, ammettemmolo, chì à Zena gh’é un pittin a tendensa a inmacarâse, anche perché questi ceti ciù benestanti à fâ de spesso i discorsci in sciâ neçescitæ de integraçion de chi vëgne da feua, in sciâ ciaga da de natalitæ da Liguria, in sce l’incluxon, e in scî desaxi de gente che mai vivià into quartê, perché i sciti en tròppo cäi.

Scì, gh’é unna borghexia ch’a se sfòrse de pai de scinistra con tutto che a vive inte unna zöna che a l’à di prexi di inmòbili assæ erti, e co-o pòpolo a gh’à pöco da fâ. Tascio elevou de instruçion. O pòpolo semmo tutti niatri, ma o pòpolo veo o vive inte banlieu de Brin Fillak. E banchiñe de legno stan lì, son un feticcio de arte pövea che a dixe “semmo ricchi instruii borgheixi, ma semmo comme viatri: ammiæ che banche da quattro södi”.

Coscì, tanto che o scindico Bucci, noelo pertusio, o revoluçioña, o tia zu, o reconstruisce o waterfront da mæña da Foxe, con di innesti conscistenti de ediliçia privâ inte unn’aria che primma a l’ea de tutti, e zoene e i zoeni de Sarzan se dan breiga con di avvitatoî e con do materiale pöveo. Peu ëse, ançi, o l’é un segno antagonistico a-a veña palaçiñâ ch’a va pe-a maggiô inte sta meschinetta de Zena de l’iniçio do terso millennio.

Into scangio m’é stæto fæto nottâ che o livello de instruçion o no l’é direttamente proporçionale a-o reddito, ma me permetto de aveighe di belli dubbi, perché questo o poeiva ëse veo oua l’é quarche dexennio, ma no in giornâ. L’universcitæ a costa, a costa tantiscimo, e sta politica de inasprimento da tasciaçion a l’à creou unna seleçion, che se veugge dî ò no. No ò mai visto mantegnî de famigge con de borse de studdio, ò fòscia son mi che no son bon.

Dito questo, se me arve un mondo neuvo, quande lezo de Spazio Comune Luzzati, a-o quæ ciù de 18.000 persoñe an dæto o seu “me piaxe” e do Ce.Sto., organizzaçion no profit. L’é l’oa de mesciâse, anche a-a seia. A çittæ a l’é apreuvo a cangiâ e l’antagonismo a no vëgne da di gruppi isoæ, ribelli e autoreferençiali. Cangiâ se peu. Viva Sarzan.