Prospettiva europea: o lascito e a leçion de Antonio Megalizzi

Assettâ in sce un ròtolo de còrda da mainâ, e o prof. Cacciari o l’é à fianco à mi, in sce unna banchiña. A no m’é anæta zu a lectio magistralis “Conoscenza e coscienza” e no pòsso fâ atro che dîghelo. Chi à consciensa de lê, o s’interroga e o pratica a conoscensa, o no peu che ëse disperou. In doe paròlle a lectio do Prof a me dixe questo. Aloa a feliçitæ e a construçion de un mondo megiô son privativa de nesci e ingenui? A-e nòstre figge e a-i nòstri figgi dovemmo augurâ de ëse di superfiçiali pe ëse feliçi? Con gaibo, ma franchessa, dissentiscio, perché no veuggio credde che chi o l’à i instrumenti intellettuali o segge destinou a-a sola pratica da disperaçion, perché co-a seu mæxima profonditæ o peu dedicâse segge a-a riçerca segge à l’elaboraçion de soluçioin; in boña sostansa à l’amô e a-a feliçitæ ciù completi e generoxi. O professô o controbatte che i òmmi, in quanto mascci, peuan ormai appartegnî à doe categorie, ò à quella di disperæ ò à quella di nesci, e che e sole che peuan ëse conscienti e construî sensa perde di tòcchi da complescitæ do mondo, son e dònne.

Mi no penso che segge unna costion de genere, sciben che l’é veo che e dònne son storicamente meno inquinæ da-i privilegi secolari do potere, e son potençialmente ciù libere inta construçion. E dapeu incontro Federica Megalizzi, seu de Antonio, mòrto inte l’attentato do mercatin de Natale de Strasburgo di 11 de dexembre do 2018. 29 anni, studente, giornalista, speaker radiofònico, scrïtô, o l’aiva intercettou o gap communicativo tra e instituçioin europee e i çittadin europëi. O comensa coscì à dâse d’attornio pe cormâ e carense informative e à progettâ di format pe spiegâ e avvexinâ l’Union Europea a-e gente. O l’ea à Strasburgo no pe caxo: o s’attrovava lì pe contâ insemme a-i seu colleghi e attivitæ do Parlamento Europeo pe Europhonica, o format radiofònico in sce l’UE de radio universcitäie. Federica a conosce a complescitæ do mondo, a poeiva cede a-a disperaçion e a-a poia, ma insemme à Luana Moresco e à Caterina Moser, rispettivamente compagna e collega de antonio, e à tante atre realtæ che ê suppòrtan, a pòrta avanti l’impegno do fræ à traverso a Fondazione Megalizzi. “O regòrdo de Antonio o l’é vivo inta Fondazione, ma o dolô o l’é un fæto intmo e familiare. Portemmo avanti o seu travaggio anando apreuvo à doe bordonnæ, a formaçion e l’informaçion, con l’idea de diffonde a conoscensa de l’Euröpa, pe valorizzâ, sostegnî e fâ cresce a communicaçion e l’informaçion, e rafforsâ unn’identitæ collettiva naçionâ e europea”. Antonio o se’a reiso conto de comme inte scheue no vegnisse mostrou scistematicamente a stöia de l’Euröpa. “Ancheu s’é fæto di pasci in avanti”, a me dixe Federica, “ma o travaggio o l’é ancon ben ben. Intanto se dedichemmo à unn’attivitæ constante de desmontaggio de bufale che alimentan a fäsa perçeçion de l’Euröpa, ch’a diventa tante vòtte responsabile de tutti i moæ che ne sagriñan, solo perché se ne travisan e competense. Antonio o diva de spesso, arraggiandose, che quande e cöse van ben, o merito o l’é di scingoli Stati, quande quarcösa o va mâ, l’é delongo corpa de l’Euröpa!”.