Frantz Fanon, Les damnés de la terre, 1961

Ma succede ascì che e masse rurale, sciben a pöca preisa che i partii naçionalisti an in sce de lô, intervëgnan in mòddo deçixivo segge into processo de maturaçion da consciensa naçionâ, segge pe dâ o cangio à l’açion di partii naçionalisti, segge, ciù de ræo, pe sostituîse fiña a-a sterilitæ de quelli partii.

A propaganda di partii naçionalisti a treuva delongo un reciòcco inte masse contadiñe. O regòrdo de periodo precoloniale o l’arresta vivo inti paixi. E dònne ciccioezan ancon à l’oegia di figgeu i canti che an accompagnou i guerrezzê da rexistensa a-a conquista. À dozze, à trezz’anni i contadin conoscian o nomme di vegi che an ascistio à l’urtimo sollevo e i seunni inti douar, inti paixi no son i seugni de lusso ò de promoçion a-i esammi che fan i figgeu de çit- tæ, ma i seugni de identificaçion à questo ò quello combattente, che a stöia da seu mòrte eròica a caxoña ancon ancheu de belle lagrime.

Into momento into quæ i partii naçionalisti preuvan à organizzâ a classe operäia de çittæ, se asciste inte campagne à de esploxoin che in scê primme no se riesce à spiegâ. Pe exempio l’avvoxâ insurreçion do 1947 in Madagascar. I serviçi colonialisti son sccetti: se tratta de unna sollevaçion. De fæto niatri savemmo ancheu, comme sempre, che e cöse ean ben ben ciù compricæ. Inta Segonda Guæra Mondiale e grendi compagnie coloniale an esteiso a seu potensa e s’en impadronie da totalitæ de tære ancon libere. Sempre inte quello mæximo periodo s’é parlou de l’eventuale insediamento in sce l’isoa de pròfughi ebrëi, cabili, antillen. Corriva ascì a sveuga da pròscima invaxon de l’isoa, co-a compliçitæ di colöni, da parte di gianchi do Sud Africa.

Coscì, passou a guæra, i candidæ da lista naçionalista en stæti eletti trionfalmente. Subito dòppo a represcion a s’é organizzâ contra e cellole do partio MDRM (movimento democratico de rinneuvamento Malgascio). O colonialismo, per razzonze i seu fin, o l’à deuviou i metodi i ciù clascichi: un muggio de arresti, propaganda razzista intertribale, e creaçion de un partio con-i elementi no organizzæ do sottoproletariou. Quello partio, dito di diseredæ do Madagascar (PADESM) o l’offrià à l’autoritæ coloniale co-e seu provocaçioin definitive, a garançia legale do mategnimento de l’ordine. Oua, st’operaçion meschiña de liquidaçion de un partio, inandiâ in antiçipo, a piggia chì de proporçioin stramesuæ. E masse rurale, in sciâ difensciva da trei ò quattro anni, se sentan tutt’assemme in peigo de mòrte e deciddan de oppoñise servaggiamente a-e fòrse colonialiste. Armou de zagagge, e ciù de spesso de prie e de bacchi, o pòpolo o s’asbria into sollevo generalizzou in vista da liberaçion naçionâ. O seguito o l’é nòtto.

Ste insurreçioin armæ no rappresentan che un di mezzi deuviæ da-e masse rurali pe intervegnî inta lòtta naçionâ. De vòtte i contadin se dan o cangio con l’agitaçion urbaña, con ëse o partio naçionalista inte çittæ oggeto de represcion poliçiesca. E notiçie arrivan inte campagne amplificæ, enormemente amplificæ: leader arrestæ, mitraggiamenti molteplici, o sangue neigro ch’o l’inonda e çittæ, i figgi di colöni che sguassan into sangue arabo. Aloa l’òdio ammuggiou, l’òdio esacerbou, o scceuppa. O commissariou de poliçia lì da vixin o vëgne piggiou d’assato, i giandarmi son fæti à tòcchi, o meistro elementare o l’é massacrou, o mego o gh’à sarva a vitta solo perché o l’ea feua, eccetera. Colònne de pacificaçion vëgnan mandæ inte zöne, l’aviaçion a bombarda. O confaon da revòlta o vëgne aloa desguggeito, e vegie tradiçioin guerriere spægan torna, e dònne ciòccan e man, i òmmi s’organizzan e piggian poxiçion in sce montagne, a guerriggia a comensa. Spontaneamente i contadin crean l’inseguessa generalizzâ, a-o colonialismo ghe piggia poia, o s’inandia a-a guæra ò o comensa à negoçiâ.