Racconti da drento a-a pansa do Biscion

Sciummi de pagine son stæti scriti in sciô “Biscion”, o complesso de allögi popolari in scê colliñe de Quessi (progetto de Daneri, Fuselli, Morozzo della Rocca, Andreani, Pateri, Pulitzer, Sibilla sotta o coordinamento de Luigi Carlo Daneri e Eugenio Fuselli, 1956-1968). Da un lato Renato Bonelli o gh’aviæ misso unna bomba, tronnando che «addensare gli uomini in alveari avrebbe potuto avere solo effetti deprimenti», da l’atro Bruno Zevi o domandava in mòddo provocatöio se “dobbiamo forse insistere sulle solite casette uniformi a 3-4 piani che impegnano vaste superfici, lasciando pochissimi spazi verdi, tagliando le visuali panoramiche e inducendo quell’atmosfera di periferia?”. Intremmo in casa de Bruna Pedemonte, abitante da-o 1968 do Blòcco A, pe scrovî, a-o netto de critiche architettòniche, cöse veu dî vive inta pansa de quello serpente stramesuou.

Che effetto o t’à fæto intrâ pe-a primma vòtta a-o Biscion?

“Do 1968 aivo 4 anni e arrivava da-a profonda Val Ponçeivia, donde o mâ o l’ea un miraggio lontan. Sciortindo da-a pansa de quella biscia enòrme, da quello poggiòlo do scito che eimo anæti à vixitâ, o mâ o s’é averto lì davanti à mi, tutto insemme, tanto che derê a-e spalle o verde denso da pinæa o me sponciava. Quella sensaçion de invexendo e esaltaçion, che solo un bagno inaspëtou inta pua bellessa o peu dâ, o m’à taggiou o sciou pe un bello tòcco. Mæ poæ o travaggiava inte unna raffineria picciña, o l’ea un operäio, mæ moæ faxeiva a casalinga: eimo unna famiggia mönoreddito co-o seunno de unna casa nòstra. O seunno o stava diventando realtæ, perché pe-a primma vòtta s’ô saiëscimo posciui permette, e o l’ea belliscimo. Quella casa popolare a saiæ diventâ nòstra con un riscatto, l’ea coscì che fonçionava o cian INA Casa. A preoccupaçion di fonçionäi che s’occupavan de l’assegnaçion a l’ea che i allögi anessan à famigge e persoñe con redditi basci, scì, ma de diversa estraçion, con l’intendimento de garantî unna grande mixité soçiale, pe evitâ de quelli blòcchi in çimma a-e colliñe de Zena diventessan unn’enclave de desandiæ e emarginæ”.

A lettiatua intorno a-o Biscion però a l’à spesso contou de un pòsto periferico e de emarginaçion. Cöse ti ne pensi?

“Un pittin a l’é anæta coscì, perché no sempre s’é riescio à garantî a mixité soçiale e o progetto de Daneri, ch’o preveddeiva unna serie de spaçi destinæ a-a collettivitæ, o l’é stæto moncou da de çernie politiche succescive. E se sa che se se veu speculâ, o verde e i spaçi aggregativi son i primmi à sätâ. Mi continuo, da rexidente da ciù da çinquant’anni, à pensâ che o Biscion o segge stæto e o segge ancon in giornâ un progetto soçiale da ammiâ attentamente: i architetti an sacciuo progettâ unn’idea de communitæ coesa, de un vexinato parteçipe. A-o Biscion l’é imposcibile sentîse abandonæ, l’architettua a l’impoñe l’incontro: inte quella grande promenade architecturale niatri figgeu eimo i figgeu de tutti, tutti n’accudivan, ma a-o mæximo tempo i spaçi ne davan a poscibilitæ de giâ liberi e segui, à l’averto, ma coverti e contengnui. I sciti, pöi, en generoxi: son invasi de luxe, da nòrd à sud, freschi e ventilæ inti meixi ciù cadi ascì, i vani son ampi. Se capisce, i anni ‘80 arrivan e l’eroiña a no risparmia o Biscion, comme a no risparmia di atri quartê, ma l’ea ciù façile pensâ mâ solo di pövei do Biscion; o l’ea un mòddo pe inluddise che o problema o fïse ciricoscrivibile, e o l’avesse da fâ solo con quelli de case popolari”.

O progetto originäio o l’ea ligou streitamente a-a realizzaçion de un çentro aggregativo, da gexa, da farmaçia, de unna serie de serviçi de proscimitæ, de stradde e mezzi pubrichi che connettessan o quartê intrego co-o çentro. Comm’a l’é anæta?

O çentro soçiale previsto o no l’é stæto realizzou subito. Con tutto, a communitæ ch’a l’abitava o Biscion, inta quæ mæ poæ, a l’à comensou à auto-construîselo: partan con un campo da petanca e co-o tempo a cösa a s’allarga, piggiando atri spaçi che diventan a societæ. Da-a petanca a-o “Teatro del Biscione di Strada”, che o l’é arrivou à conlaborâ con Benno Besson, regista franseise allevo de Bertold Brecht: se respiava un bello invexendo à l’interno do nòstro circolo Arci. L’atro pòsto de vitale importansa a l’é stæta a parròcchia e a fòrsa de çerti prævi speciali, comme don Antonio ch’o l’organizzava i çentri estivi into quartê. À quello tempo existiva e colònie estive do Commun, ma che di figgeu de famigge sensa guæi palanche poessan accede à di çentri estivi de proscimitæ l’ea in davei un quarcösa de innovativo, un piccin seunno realizzou. No solo auto-construçion, ma ascì lòtta pe ottegnî i serviçi dovui: penso che ghe segge ancon inti archivi i articoli che contan di blòcchi straddali che i çittadin do Biscion an organizzou diverse vòtte pe ottegnî un traspòrto pubrico ch’o servisse tutto o complesso”.

Da comme ti ne parli o Biscion o pâ o paradiso?

“O no l’ea, existiva anche tanta delinquensa. Existiva o bon, che o l’ea assæ, ma o lato oscuo ascì, che o l’é anæto crescendo co-a vegnua de l’eroiña e co-o tesciuo commerciale ch’o fadigava à rexiste. Ancheu l’é tutto ciù tranquillo e o l’é ritornou anche o fermento de communitæ di iniçi do quartê, perché tanti de niatri, che crescendo eimo anæti à vive feua, son tornæ insemme à quello spirito ch’o gh’ea a-o prinçipio. O Biscion o merita de procede into segno de l’innovaçion, into quæ o l’affonda e seu reixe. Ancheu o porrieiva diventâ un quartê à impatto zero areo. Parteçipâ à unna riunion de condominio do Biscion a l’ea unn’esperiensa ciù unica che ræa, semmo tanti, l’é comme un piccin parlamento”.