Godot

Aspëtando Godot? Ma anche no, çerco de spiegâme megio. No sò se v’é mai capitou de retrovâve à aspëtâ l’1 à Carregamento quande ve sei ascordæ, ò pròpio no saveivi che i autisti da AMT aivan indito un sciòpero, ma pöi, stante a nòstra solitudine à unna fermâ pe sòlito ciutòsto trafegâ – e sorviatutto o fâ marçian di passanti che ne gian d’in gio ammiandone con unn’esprescion tra o serio e o faceto – s’â demmo che quarcösa no va. Unna vòtta aviëscimo domandou in gio à di desconosciui, oua, dòppo avei inforcou o nòstro smartphone desvelemmo o misterio, se ravvedemmo e çerneggemmo o contrattempo pe quello ch’o l’é: un imprevisto, comme i cartonetti do monopoli, e de seguo no se tratta de unna pandemia.

Ecco, sta sensaçion de déjà vu, de perdia do contesto, s’â sentimmo adòsso anche quande se avvixiña e eleçioin muniçipali, che dæ ben a mente, se tegnian tra manco un anno. Gh’é ancon do tempo utile pe trovâ l’alternativa à Bucci, ma a sensaçion a l’é unn’atra: pâ che se segge za votou e che lê o segge stæto riconfermou.

E coscì Zena, e i seu zeneixi con quella faccia un pö coscì, stondäi in senso montalian anian à votâ. Miga unna röba da ninte, pe quanto se tratte de de amministrative; no ascordemmoselo, o l’é quello momento, quello elettorale, che a democraçia a riserva pe l’esprescion da libertæ de çernia. Donca se arve o scipäio, into recanto bleu: o “scindico ch’o cria” (dixan de lê à Tursci), dirigista mancou e decisamente diffidente, comme testimònia e seu pöche interviste, donde fiña o giornalista che o veu fâghe i complimenti pe-o seu ròllo inta reconstruçion o vëgne scistematicamente tacciou de pöca concretessa; un òmmo “tutto de un pezzo”, o s’é visto anche into confronto co-o vorgo, difeiso solo che da-o seu collæn ortopedico. E into recanto rosso?

O sfiddante: Godot ch’o chiña da quello autobus ch’o no l’arriva, causa sciòpero, ma à differensa de chi sciòpera, ch’o piggia unna poxiçion e comonque o rinonçia à un giorno de paga, chì nisciun o se fa avanti, manco morgan; e no pe ninte: Renzi, che ormai o l’é o dadaista da vittöia concettuale, o l’à za espresso “paitiañamente”, o seu sostegno à Bucci.

Inte sti anni o nòstro: o l’à segnalou allerte meteo anche inte de giornæ assoiggiæ, e sorviatutto o l’é riescio là donde tutti s’ean fermæ: o l’à eliminou i trei tronchi de parma mòrti à Carregamento, e de questo ghe son infinitamente riconoscente (sciben che no son stæte rimpiassæ da de neuve piante); dapeu, però, con tutto che o l’à reconstruio o ponte casseuâ in sce casseuâ, purtròppo o s’é ingambou. Nisciun o s’aspëtava che o desse o feuggio de via a-i negòçi di Benetton, manco i çentri soçiali son riescii à cheugge a colluxon tra i vestii e a viabilitæ, ma che unna çittæ feria, oltraggiâ e vilipeisa a no se pòsse propoñe comme parte civile, l’é coscì incivile?

O conflitto o va sedou, o 25 d’arvî a l’é a festa de tutti: liberatoî e fascisti; a riqualificaçion urbaña a se fa con vernissage e supermarket, o monopòlio do carrello o l’é stæto finarmente scciancou, oua scì che a democraçia da spòrta a l’à dæto un gio! Spaçi verdi, leughi de incontro? No, megio parchezzi e frenetichi acquisti.

E pöi a-a fin Godot magara o l’é anche arrivou, o l’é chinou à Prinçipe e o l’à attraversou a çittæ vegia; o l’à ascoltou i discorsci a-o mercou e a-o bar, e dapeu de un bello gio in Via XX o l’é anæto à Brignoe e o l’à piggiou torna o treno verso quarche direçion de partio.

Insomma cao zeneise, un nòstro antigo conçittadin o l’à dito “che l’inse!” e zu prionæ. Ma à chi? I austriachi e i piemonteixi ancheu vëgnan a-o mâ comme turisti. Ma un scindico migrante? Quella scì che a saieiva unna bella reçenscion, squæxi unna revoluçion.