I freschi de gexe do ponente, sensa destin

N’é passou pe coscì di anni da quande giava pe-e valladde do ponente à sentî parlâ e gente. Quaranta, che aloa n’aiva dixeutto ò zu de lì. Un o l’arrivava à Arbenga, à Sanremmo co-o treno, o s’imbarcava in sce uña de quelle vettue che gh’ea aloa, ancon de compagnie privæ, o l’arrivava inte un tra i tanti paisòtti da montagna. Pe-o ciù no gh’ea d’aberghi o de penscioin, e do resto, chi se ê poeiva permette? Sacco à pei, che tanto l’ea stæ. L’idea a l’ea quella de parlâ co-i vegi, de registrâ conversaçioin, ma a l’ea unna scusa: se gh’anava pe-o piaxei d’anâ, e e ciù tante vòtte, se ghe discorriva scì co-e gente, ma sensa stâ à fâ o giamin de marcâse quello che se sentiva. L’ea comme anâ inderê into tempo, se capisce, ma se sentiva ascì l’äia che tiava: à Pigna, unna vegetta cegâ in doe sott’à un fascio de legne un bello momento a m’attacca à raxonâ de comme o paise o se veue. “Ti che t’ê zoeno”, a me diva in pignasco streito, “ti te porriësci piggiâ unna figgia chì e vegnîghe à stâ. Chì, ammia ben, che e figge son belle e son brave, no comme e castellusse, che son tutte bagarde”. M’avieivan piggiou à mi che vegniva da feua, ma guao à parlâ con quelli do Castê! E ti capivi che sti paixi cian cianin moivan, e che e gente se ne rendeivan conto, ma che no renonçiavan à ëse quello ch’ean. Oua se ti ghe væ, inte quelli paixi, ti t’accòrzi che da quelli tempi e cöse van pezo. Manco ciù i vegetti. Quarche inmigrou – e a l’é unna benediçion – che a pixon a costa meno che in rivea. Quarche tedesco ò olandeise ch’o s’à dæto recatto à unna cà e o fa teletravaggio con Rotterdam e Francofòrte. Benvegnuo lê ascì. Se veua i paixi, e o l’é o drama de l’introtæra de rivee. Drama into drama, i paixi deruan. Se perde a memöia, se desperde o paisaggio, se renonçia à dâ a mente a-o territöio. Se perde conoscensa. In mezo à sto panorama, ven in cheu ascì quello che se perde in ponto arte. Me fermo in sce un exempio, e pittue à fresco.

Da-a meitæ do trexento a-i primmi do Çinqueçento no gh’é stæto gexa, cappella, ötöio da Saña fin a-a Fransa che no seggian stæti decoræ segondo o dexidëio e e poscibilitæ de ciascheduña communitæ. A no l’ea solo arte e divoçion: a l’ea unna mainea de rapresentâse. Inti secoli, tanti de quelli freschi son stæti renoelæ ò scassæ a-a dreittua, sorvetutto in tempo de Contrareforma e segondo o gusto baròcco, ma tanti atri se lezan ancon e definiscian a pittua tardogòtica de montagne da Liguria comme un insemme de gran interesse pe a stöia de l’arte. Se parla inti libbri de stöia de l’arte de pittua “vernacolare”, de comme a leçion de Giòtto ò de Bruegel a vegniva fæta pròpia e inventâ torna, a-i euggi e segondo e exigense de un pubrico neuvo. Ben, za a-i tempi che mi gïava pe quelli bricchi, arriescî à vedde e òpie spantegæ un pö inte tutto l’introtæra a l’ea unna impreisa, imaginemmose a-a giornâ d’ancheu. Seguo, gh’é de quelle gexe che restan averte, e gh’é a poscibilitæ de vixitâle: neuvamente m’é intravegnuo à Montegraçie derê a-o pòrto, e n’é varsciuo a peña. Ma pe uña ch’a se peu vedde (e arrestan e ciù avvoxæ, se capisce), ghe n’é da dexe de che nisciun o s’arregòrda, e che intanto che son serræ van in roiña cian cianin con tutto quello che contegnan. Un patrimònio rapresentativo da coltua ligure ch’o l’à unna dimenscion internaçionâ, da tegnî in conto quante i palaçi de Zena, ascì pe-o carattere unitäio che a pittua de l’Etæ de mezo inta montagna do Ponente a l’esprimme, e che oua comme oua o no l’é reconosciuo e apprexou inte nisciuña forma. E intanto che sensa nisciuña cua se cointa à desperdilo, vëgne in cheu ascì cöse un patrimònio pægio o porriæ rapresentâ pe l’economia de quelli territöi, se con unna vixon appropiâ de coltua turistica o vegnisse misso in luxe, e se tra tante “Strade del vino, del sale, dell’olio” e compagnia se fesse di itineräi de conoscensa da pittua à fresco do ponente. Utopia? Investimenti raxonæ e coæ de fâ marciâ torna, co-a coltua, o destin da nòstra montagna: no serviæ atro.