I minoî e e çittæ in tempi de Covid

“Tròtta o tempo, tanto tempo, tròppo brutto. Tutto gia in sce de lê. Tic toc, fa o tempo drento, tic toc fa o tempo feuan. L’é despægio feua e drento, o tempo. Torna tempo à trottâ feua, e drento” (da unna poexia de un figgeu de 10 anni).

L’ea i 29 de marso quande diversi genitoî de Zena se son riunii pe scrive a-o seu Scindico perché o fesse tornâ into dibattito a paròlla “minô”, “figgeu”, “foento”, “zoenòtto”. I figgeu son sparii, ma continuan à vive inte nòstre case e inte nòstre çittæ, e za aloa doveiva ëse intollerabile pe tutti l’assensa de un dibattito in sciô seu benestâ, o seu presente e o seu futuo. Î emmo reduti à alunni, studenti, scoläi digitali, neuvi eröi do Coronavirus, figgeu geni rexilienti che tutto peuan perché fòrti, perché, pe niatri grendi, liatri san adattâse à tutto, ma che in realtæ no stan ciù sciù da-i seu diven, sconfondan o giorno co-a neutte, no se levan ciù o pigiama; son quelli che ancheu no veuan ciù sciortî, perché gh’emmo denegou o tempo de feua, se semmo ascordæ de liatri e da qualitæ do seu tempo, manlevandose da ògni tipo de responsabilitæ collettiva inti seu confronti.

O no l’ea o sbraggio de quarche isterica “mamma pancina” (comme son stæte etichettæ e dònne quande an deciso quello giorno de tiâ sciù a testa e portâ avanti un pensceo critico), “viçiâ” e “incapaçe” de stâ in casa à gestî i figgi, tra class-room, smart-work e speise contingentæ. L’ea o portâ a-a luxe un problema soçiale, unna bomba che se stavimo coltivando inte nòstre case; un reciammo a-a civiltæ, a-o fâ politica co-a P maiuscola, quella che ògni çittadin o dovieiva fâ ògni giorno perché parte de unna communitæ pensante, quella ch’a governa e a prevedde i problemi passando atraverso l’ascolto, a comprenscion di beseugni e da seu traduçion, da definiçion de prioritæ, à costo de ëse quarche vòtta impopolare. Quella ch’a se piggia o tempo pe pensâ, pe no arrivâ a-a l’ennexima emergensa; o tempo pe progettâ à curto, medio e longo termine; che a l’analizza a complescitæ de scituaçioin e a ne riçerca de soluçioin concertæ, sensa fomentâ e tifoxerie tra “staiacasisti” e “fuoricasisti” e sensa riçercâ e soluçioin inte di slogan veui che ancheu, inte sta scituaçion drammatica, fan ciù mâ che mai e caccian tutti inte l’inseguessa e inta poia de un tempo sospeiso. Che pöi, quæ o l’é o senso da politica, se no quello de fâse carrego do çittadin, de inquaddrâ i vegi e i neuvi beseugni, e vegie e e neuve disegualianse, e fragilitæ, de no ascordâse di ciù pövei e di ciù fragili, de sottrae i urtimi da-a “mòrte civile” e de evitâ o moltiplicâse de neuve povertæ, e de impegnâse into portâ avanti de soluçioin radicali e coraggiose, se neçessäie, pe-o ben commun?

Oua, sciben che drammaticamente in retardio, çerchemmo de pensâ à quæ forma dâ a-e nòstre çittæ, de mòddo che se riesce à accheugge a nòstra neuva vitta a-i tempi do Cornavirus. E tanto che se inandia de commiscioin in sciô welfare di minoî e de famigge, donde se sottolinia l’efficensa de l’averta de 84 pagine Facebook pe raccontâ e föe a-i figgeu da 0 à 6 anni, comme o comparto da scheua o l’agge reagio ben a-o serrâ improviso, donde se entuxasmemmo perché e moæ stan à casa e fan i erboi de Natale pe Pasqua perché an trovou in sciâ ræ l’enneximo link – sempre che seggian dotæ de connescioin e suppòrti tecnològichi – convinte che bastià à sarvâ o figgio da despiaçion, questa a a ghe cresce drento, ma nisciun o l’é pronto à veddila.

Emmo o dovei de ridisegnâ e de construî di neuvi mòddi de abitâ e stradde, e ciasse, i parchi, e mæñe, e montagne emmo o dovei de occupâse da vitta e de evitâ neuvi mòrti e neuvi lockdown, e de fâ in mòddo che oua che se torna à arvî l’economia e se torna à travaggiâ, se addeuviemmo pe-o benestâ e a salute de tutti, di ciù fragili ascì, quelli che no travaggian, quelli che no produxan, ma che son o nòstro futuo. Che se evite unn’avertua sensa aveili conscideræ: ò poia che liatri sciortian sensa nisciuña regola, perché no ne peuan ciù, e lì scì che o saià un enòrme problema de seguessa sanitäia.

L’é l’oa de “cianificâ in mòddo averto”, comme dieiva Isabella Inti (“Pianificazione aperta – Disegnare e attivare processi di rigenerazione territoriale, in Italia”, Lettera Ventidue), e de comensâ oua (saiva stæto megio vëi) à testâ di neuvi mòddi de abitâ con attivâ de picciñe sperimentaçioin inti quartê, coscì che tutti pòssan assumme fito di compartamenti segui, metabolizzâli, placando l’instinto à trovâ di manezzi creativi pe sottrâse a-a regola. Emmo beseugno che e nòstre çittæ stimolan a responsabilitæ partindo da-a fiduçia di çittadin, che travaggian e agevolan unna neuva normalitæ do vive cotidian. A fiduçia a dev’ëse dæta perché in sciâ sfiduçia e in sciâ diffidensa no se construisce ninte. I 10 de marso poeivimo cianificâ e agî, oua semmo – comme sempre – arrivæ à dovei re-agî à unn’emergensa. L’é l’oa de repiggiâse o tempo pe pensâ, perché sedonca saià delongo o tempo de emergense.