Trump o l’ea favorio
Ma a gestion do virus a ghe peu costâ caa

Pöchi giorni apreuvo a-a cancellaçion do ciù grande festival artistico da çittæ, o South by Southwest, e stradde de Austin son pe-o ciù deserte, ò frequentæ se mai da quarche persoña che a pòrta à spaçio o can, ò da quarche irriducibile jogger che, sciben che provisto de mascariña, o continua à corrî pe e vie di quartê rescidençiæ. A-a giornâ d’ancheu i Stati Unii son o paise ch’o l’à registrou o ciù erto numero de persoñe infettæ da-i virus, co-a çittæ de New York epiçentro da pandemia americaña. In ciù di rischi sanitäi, diffiçili da carcolâ inte un paise into quæ e speise meghe son stramesuæ e ciù de 27 milioin de çittadin no peuan permettise unn’asseguaçion sanitäia (circa o 9% do totale da popolaçion), gh’é ascì i danni econòmichi e e ripercuscioin politiche connesse à sti chì.

Inti urtimi anni de l’amministraçion Tump o paise o l’à registrou un di tasci de desoccupaçion tra i ciù basci da stöia, circa o 3,5%. Numeri che o prescidente o l’à exibio con orgheuggio e in linia co-o famoso mòtto MAGA, “Make America Great Again”, transformou inte l’inno da seu campagna elettorale do 2016. Sfortunatamente, pe caxon do serrâ de tante attivitæ commerciali, inte l’urtimo meise a desoccupaçion a l’à schittâ a-o 4,4%, o livello o ciù erto da l’agosto 2017, e o numero di desoccupæ o l’é cresciuo in pöche settemañe de 1,35 milioin, razzonzendo coscì i 7,14 milioin totali. Se prevedde che i numeri continuan à pezoâ à arvî e mazzo, stante che i consummi e a produçion de ben e serviçi son stæti reduti ancon da-e progrescive mesue de lockdown. Çerte analixi de mercou, comme e recenti previxoin de Morgan Stanley e Goldman Sachs, prospettan unna cheita do PIL do 30% pe-o segondo semestre do 2020, che o porrieiva portâ a desoccupaçion a-o 12,8% inte quello periodo. O rischio o l’é donca che a-a crixi sanitäia s’azzonze ascì quella econòmica.

O scenäio o se presenta nint’afæto rasseguante pe l’amministraçion Trump, stante che i democratichi continuan à aspresciâ e politiche do prescidente, che segondo liatri o no l’à operou in mainea tempestiva, minimizzando i rischi potençiali do virus, e agindo solo quande ormai l’ea tròppo tardi. Da parte seu o prescidente o l’à promisso di grendi incentivi econòmichi a-e famigge e a-e impreise (2,2 miliardi de dòllari in aggiutti approvæ da-o Congresso che s’azzonzan a-i 4 miliardi de stimoli precedentemente promissi da-a Riserva Federale), e o l’à postiçipou o pagamento de tasce dovuo in arvî a-o meise de luggio. Trump o l’à attaccou ascì (verbalmente) o governo cineise pe avei tegnuo ascoxi pe tròppo tempo i dæti relativi a-a pericoloxitæ do virus, no permettendo coscì unn’açion effettiva de coordinamento internaçionâ pe arginâ a seu diffuxon à livello globâ. Gh’é da dî che e accuse de sto tipo no an mai dannezzou l’imagine do Trump a-i euggi di seu sostegnitoî, ançi, tutto a-o conträio. Into mezo de st’inçertessa, i effetti do COVID-19 in sciô scistema USA son donca ancon assæ diffiçili da analizzâ. Quæ saian e conseguense politiche de tutto questo? Sta chì a l’é a grande domanda che se poñe tutti i commentatoî. Pe-o momento se peu solo affermâ con çertessa che a muxica a l’é cangiâ: e nòtte de l’inno MAGA, che pe tanti scimbolezzavan a speransa de un neuvo boom econòmico, into gio de dötræ settemañe an acquixio i toin luveghi de un preludio muxicale inçerto, che o porrieiva antiçipâ unna de ciù grendi crixi soçiali di urtimi tempi.