Oua un neuvo iniçio
E unn’idea de Liguria

T’ê ne chì torna. A sospençion de ògni attivitæ a l’à corpio anche o Stafî, che o doveiva anâ in edicola a-a fin de marso e incangio o gh’arriva oua, co-a reavertua de tutto o Paise, o 4 de mazzo. O l’é donca, inte un çerto senso, un neuvo iniçio, coscì comme o ô l’é in generale. Perché o tempo sospeiso o l’à solo ascoso i problemi che gh’aivimo, o n’à creou se mai di neuvi, e se o l’à lasciou un pittin de tempo pe rimette in ordine i penscëi o l’à anche complicou ben ben o scenäio.

No l’é façile raxonâ inte sto periodo, escì ben che beseugna fâlo, e con ciù fòrsa che mai. Perché o “doman” o l’arrivià fito, e e critiçitæ da nòstra region – che ean graviscime primma da vegnua do virus – rischian de presentâ a-o repiggio un conto che no poemmo pagâ. E crixi favoriscian chi gh’à e spalle larghe e fan scentâ da-a scena chi l’é debole, e niatri no poemmo permettise de perde manco un menuto, perché l’irrelevansa definitiva a l’é derê a-o canto. Repiggemmo donca o discorso da donde l’aivimo lasciou. E eleçioin regionæ, che doveivan tegnîse in mazzo, son rimandæ à ciù avanti. O Toti o ê vorriæ o ciù fito poscibile, pe asconde e responsabilitæ che o dovià affrontâ pe-a gestion no tanto da crixi sanitäia (donde l’improvisaçion e a riçerca do consenso à bon patto an superou ògni limite, scin ciù in là do ridicolo, ma son stæte graçiæ da un numero tutto sommou basso di contaggiæ) quante da costion de RSA. O l’é in boña compagnia – veddi a Lombardia co-o scandalo do Pio Albergo Trivulzio – ma o no veu dî: scandalo commun, scandalo doggio. Do resto, a çittadinansa ligure, ipnotizzâ da-a propaganda continua da zonta uscente, a no pâ avei dæto scin à oua segni de stanchessa. O Toti e i seu, no se sa quante piaxan, ma se ritëgnan preferibili a-i atri. Za, i atri. Dòppo settemañe de tragicomedia – che speremmo de ascordâse fito – s’é arrivou finarmente a-o “grande accòrdio” tra PD e M5S, pe corrî insemme sensa savei perché ni chi saià o candidou. Se peu dî che pezo, scin chì, no se poeiva fâ. A battaggia elettorale, che a l’é determinante segge pe-a corsa a-o Commun de Zena do 2022, segge perché atri çinque anni de toti-leghismo porrieivan scignificâ un ponto de no retorno, a l’é vista da parte do PD comme unn’occaxon pe scistemâ i conti interni, sançionâ o contròllo do Orlando e a definitiva sciortia de scena do Burlando. Dan l’eleçion pe persa, e zeugan unn’atra guæra, tutta seu. À scinistra do PD, con tutto che o travaggio de Linea Condivisa o l’é fiña bon in quante à contegnuo, se sconta a mancansa de unna leadership accapparrante, fresca, neuva. Magara, dònna. Verso o çentro gh’é IV, che in ciù de ëse o pezo partio de tutta a stöia do çentro-scinistra italian, in Liguria o no propoñe ninte, levou minacciâ un giorno scì e l’atro ascì de no fâ parte da coaliçion. Assæ megio aloa o movimento civico do Merella, e tutte e fòrse che ghe gian intorno (da-e schegge do PSI a-i sopravisciui de +Europa, fin a-i liberali che no veuan anâ con sto çentro-drita, lezi Vinacci ò Serafini, tra i atri), ma l’imprescion a l’é che no aggian a fòrsa e e risorse pe mandâ in gio e seu idee, escì ben che ghe n’an ciù che atri. Dapeu gh’é o groppo do nomme. Sansa? Massardo? Un atro? Semmo ancon lì. Stante che a-o M5S ghe va ben tutto, ò a-o manco, de questi, tutti doî, semmo ostaggi do PD naçionâ e ligure o quæ, pe inciso, anche sotto a gestion do Farello o l’assomeggia ciù à un consesso de scignori da guæra – guæra di misci, s’intende – che no à un partio. No gh’é linea, solo individualitæ, pe-a ciù parte de basso profî, con Lunardon, Rossetti e Pandolfo che son in miscion speciale: obiettivo pötroña. Après moi le deluge. Mai comme inte sto momento, donca, se sente a neçescitæ de formâ un movimento, un partio regionalista che o sacce interpretâ e esigense do territöio, zugando in sciô cian doggio de l’attivitæ de lobbying à Romma e in Euröpa pe ridisegnâ o scistema de finançiamento da region, e da valorizzaçion da specifiçitæ colturale ligure. Pragmatismo e e emoçioin. O spaçio politico, pensando à un contenitô averto, transversale, da-i liberali a-a scinistra, o gh’é, e se se partisse subito – sperando de votâ in autunno – se porrieiva anche pensâ de riescî à eleze un conseggê za inte ste pròscime eleçioin. Pe pöi cresce e pontâ à ëse determinanti a-e communale de Zena. Un partio do genere o serve perché quello che manca a l’é unna vixon da Liguria che a tëgne insemme tutti i territöi e e seu diverse vocaçioin, un progetto che o vagghe ciù in là da gestion de l’emergensa e do declin. Serve rimette in gio unn’idea de Liguria comme entitæ politica autònoma, existia primma de l’intrâ into stato italian, e conscia che se oua a ne é incidentalmente parte, a l’à a capaçitæ de pensâse anche un doman, se mai a UE a savià evòlve verso quell’Euröpa de Regioin che a l’é l’unica soluçion pe anâ avanti in sciô cammin de l’integraçion e evitâ a seu disintegraçion. Pe arrivâghe ghe veu, pe primma cösa, un dibattito pubrico libero e intelligente. O Stafî o vorriæ servî à questo.