Soçiale: sto sconosciuo

Giusto feua da l’aula inta quæ aiva discusso a mæ texi de Laurea , mæ poæ o m’à accuggeita con un fattoriso e con un “Brava! No gh’ò capio un bellin de quello che t’aniæ à fâ, ma brava”. Con tutto che inti anni apreuvo mi agge travaggiou inte diversci settoî, lê o l’é mòrto sensa avei capio a specifiçitæ do mæ lou, ma o l’aiva apprexou unna çernia che into gio de un anno, manco, da l’esamme de stato, a m’aiva consentio de travaggiâ in regola e à tempo indeterminou. Â spiegavo coscì: e persoñe co-e quæ travaggio son esperte do seu problema, mi incangio son esperta de metodi pe-a soluçion di quella scituaçioin: coscì ò oscillou da l’ëse identificâ in Hervey Keitel che in Pulp Fiction o l’interpretava Wolf, “risòlvo problemi”, ò donca inta boña sammaritaña (ma stipendiâ), do tipo: “ah, ò capio, ti aggiutti e vegette à fâ a speisa”; “ah, ti aggiutti i figgeu à fâ i compiti”. Tutte attivitæ lödeivi, rispetto a-e quæ l’ascistente soçiale incangio o se mescia comme coordinatô: inte unna scituaçion problematica, o l’attiva e risorse esterne a-a persoña pe arrivâ à unna soluçion ò, ciù façilmente, à un equilibrio ciù soddisfacente da seu condiçion psicosoçiale.

L’appròccio multidimenscionale a-a persoña o l’à avvexinou a-a profescion çerti santoin new age che ammian à l’individuo in mainea olistica: però no, no emettemmo e mæxime parcelle salæ, ançi, sorviatutto pe chi o travaggia into pubrico i mitichi “scatti”, e progrescioin do stipendio, son lezzendie che se tramandavan i colleghi ciù ançien, quelli che pöi an visto ascì a penscion, che pe niatri “zoeni” a l’é unna bestia mitològica a-o pari de l’unicòrno, e che no contiemo a-e neuve leve, assunte dòppo dexenni de penscionamento che n’aivan lasciæ in quattro gatti à prescidiâ i serviçi soçiali communali, fonçioin obbligatöie pe ògni Commune italian. L’é o caxo de regordâlo.

No semmo manco quelli Laddri de Figgeu che, ciclicamente, ripropoñe çerta stampa, faxendo leva in scê bele de gente, ò in sciâ presunta sacralitæ di vincoli de sangue, comme se no fïse bastou in Italia i plastichi de Vespa in sce Cogne pe fâne capî che no, no tutte e moæ son moæ capaçi in quante che moæ. Peccou che st’urtima stæ à Zena semmo stæti missi a-a berliña pròpio da-o nòstro Assessô che, incangio de protezzine da unna stramesuâ shitstorm mediatica, o l’à pensou ben de serrâ l’uffiçio che o se òccupa de affido familiâ, desfandolo da l’ancheu a-o doman, privando de risorse neçessäie i colleghi incarregæ da l’autoritæ giudiçiäia de abbinâ un minô à unna famiggia affidatäia. E impedindo pe de ciù a-e famigge zeneixi, senscibili a-i problemi da soçialitæ, de ëse seleçionæ e de mettise à dispoxiçion da collettivitæ.

Riassummendo, à ëse ascistenti soçiali, sorviatutto into pubrico e à Zena, no s’angoscemmo: se travaggia co-e risorse sempre ciù restreite che a politica a ne destiña e co-a pöca competensa di seu rapresentanti; semmo pe-o ciù dònne, cösa ch’a no l’aggiutta inti zeughi de potere, e o l’é un travaggio à km zero, comme va tanto de mòdda in giornâ: spremmi o sangue de rave. E pöi o consente de mette in prattica a no violensa, quande t’ê aggredia da l’utensa incendiâ da-e denigraçioin diciaræ a-a stampa da-i teu vertici.