Ammiemmo ciù lontan de pròscime eleçioin

Attaccan da scinistra à drita di vòstri teleschermi: Anna Canepa, Anna Maria Furlan, Giampaolo Botta, Lorenzo Cuocolo, Federico Romeo, Paolo Comanducci, Paolo Momigliano, Gimmi Giacomini, Andrea Orlando, Roberta Pinotti; à dispoxiçion: Daniela Anselmi, Maria Silva. Da drita à scinistra co-a maggetta gianca: Aristide Fausto Massardo, Ferruccio Sansa, Valentina Ghio, Francesca Balzani, Alberto Benedetti, Giorgio Cuttica, Paolo Bandiera, Tonino Gozzi, Maurizio Conti, Paolo Cremonesi, Maurizio Mannoni; à dispoxiçion: Nicola Morra, Luca Becce, Ariel Dello Strologo e Elisa Serafini. Î emmo contæ, son stæti 28 i nommi sciortii inte sti meixi comme papabili pe guiddâ a coaliçion do “çentro-scinistra à çinque stelle”. Pe caitæ, bella partia. Ma insomma.

Emmo aspëtou scin à l’urtimo pe anâ in stampa poendo commentâ a çernia do candidou (ò candidâ, che saieiva megio), ma pe-a tersa vòtta o Stafî o deve sciortî co-a sensaçion che i lettoî lezian à nomme za sciortio. Cöse dî: speremmo che l’editoriale o l’invege, pe amô de patria, e che quande leziei se sacce finarmente che pesci emmo da piggiâ. Do resto, no se capisce ben cöse o porrià fâ sto meschinetto de un candidou, çernuo dòppo unna palinòdia estenuante, à trei meixi manco da-o voto, con dexe ponti de destacco rilevæ da-i urtimi sondaggi verso a coaliçion ch’a sostëgne Giovanni Toti.

E paròlle mancan pe descrive o desastro compio da-o PD ligure à guidda (?) Farello, in primis, e da-i atri à reua. Se son ascoxi scin à l’urtimo derê a-o veuo di “accòrdi programmatichi” perché no saveivan comme desgroppâ a costion do candidou, che in realtæ a l’è primmäia, finindo pe anâ a-o delà do ridicolo. Che pöi, se o candidou o deve vegnî solo apreuvo à sta mitològica discuscion in sciô programma, e o no l’à posciuo dî racca in scî temi che s’è discusso inti atretanto mitològichi “tavoli”, cöse o deve fâ quande ghe dan o ballon in man? L’esecutô testamentäio?

Oua à tutti i mòddi, ò ben ò mâ, comensa a campagna. A saià strania e curta, ma a ô saià pe tutti. Solo che a zonta Toti a l’avià occaxon de asconde e seu infinie insufficiense, da-a sanitæ a-a politica econòmica, da-a politica pe l’entrotæra a-a coltua, scin à l’ambiente, mancanse che saieivan façili da documentâ numeri a-a man, ma che interessian relativamente pöco perché intanto liatri an “fæto o ponte”. E fanfare di giornali e de televixoin locale, con Primocanale in testa à portâ o gaggiardin, son za lì belle pronte che se scadan, e pe un pâ de settemañe – de circa eutto che ne separan da-o voto – saiemo tutti invitæ à parlâ de quello. Se o ne piaxe, se o l’è seguo, e o primmo collaudo, e a çeimònia, e e paròlle do Prescidente Mattarella e quelle do Prescidente Conte. Scin à arrivâ à quelle do Prescidente Toti, che comonque o saià lì in primma fia, perché ghe tocca. In tanti se sentian rapresentæ, e fòscia saian fiña contenti e orgoggiosi, coscì che o viaduto in sciô Ponçeivia o finià pe ëse tragico unna tersa vòtta, dòppo e mòrte che aspetan ancon giustiçia, i danni à l’imagine e a-i trafeghi, oua a constataçion che o spaçio che o s’ea averto l’indoman da tragedia pe provâ à imaginâ torna o futuo de sto paise, o s’è definitivamente serrou. Semmo riescii inta grande impreisa de sopportâ a vista de un fantaxima pe trei anni, tutti i giorni, sensa fâse nisciuña domanda, sensa mette in discuscion ninte. Oua che o ponte o gh’è torna poemmo torna tutti a-i nòstri pòsti, un pittin ciù vegi, ancon ciù depresci sensa saveilo, perché quella brutta marottia a fonçioña coscì.

“Quello che o caxoña l’assopimento inti Stati che sòffran o l’ea a duata do mâ, che a paralizza l’imaginaçion de persoñe e a ghe fa credde che o no finià mai ciù”, o nottava o cardinâ Gondi à l’epoca da rivòlta da Fronda do 1649. Sarvo azzonze giusto apreuvo: “Ma tòsto che treuvan l’avertua pe sciortîne, cösa ch’a succede sempre à un çerto bello momento, son mai tanto sorpreise, mai tanto còmmode e mai tanto transportæ, che passan tutt’assemme à l’atro estremo, e lonxi da-o tegnî i cangiamenti pe imposcibili, î creddan façili; e sta dispoxiçion da sola a l’è de vòtte boña à generâli”. Questo pe dî che, a-o delà de tutti i problemi strutturali e squæxi stòrichi che a Liguria a se treuva à affrontâ a-a giornâ d’ancheu, o ponto veo o l’è a deprescion inconsapevole che a l’attanaggia i çittadin. O preferî vedde moî o mondo che s’è delongo conosciuo, ciutòsto che lasciâ spaçio à quarcösa de neuvo e sconosciuo. Comme i vegi, che à partî da unna çerta etæ, anche quande an e poscibilitæ econòmiche, no fan ciù di cangi inte seu case.

L’è pe questo che, anando pe un momento a-o delà da campagna elettorale, se rendemmo conto che a Liguria a l’à ciù che atro beseugno de imparâ torna à credde into futuo, e donca à credde in lê mæxima. O travaggio di partii e de liste che se ne veuan fâ carrego o dev’ëse quello de fâ cresce o senso de appartenensa di çittadin, verso unna communitæ averta e in graddo de comportâse comme un soggetto politico. Se se comensesse à fâ, questo in fin di conti o vâ ciù de un resultato elettorale.