A Ciña a l’à rinforsou a seu imagine globâ
E o l’è un gran rischio
A fase do Covid-19 a l’é destinâ à ëse regordâ comme quella che a l’à contribuio de ciù à disegnâ torna i equilibri di rappòrti geopolitichi do nòstro paise. Inte sto contesto se inserisce e neuve dinamiche de relaçion tra realtæ e perceçion che s’é creou tra a Ciña e l’Italia, nasciue da strategie misse in atto da-o governo de Pechin, in fase pre e post Covid-19. A primma a l’à da vedde co-a promoçion da coscì dita Neuva Via da Sæa, i accòrdi da quæ son stæti negoçiæ in mòddo ciutòsto insòlito, con papê firmæ da-i rapresentanti di enti locali italien e i fonçionäi politichi do governo cineise. Sta strategia a l’é stæta contestâ da l’Union Europea in quante esprescion de un disequilibrio do poei de negoçiaçion: da unna parte gh’ea i ministri de un governo autoritäio tra i ciù potenti a-o mondo, e da l’atro i scindichi ò i assessoî communali de çittæ medie, ò picciñe. Dòppo e streite de man aggaibæ e de bon incontro tra ministri e assessoî, a l’é arrivâ a “strategia da mascheriña”. Pe caxon de frequenti ambiguitæ di messaggi in scî soçial, i media e i lettoî son stæti induti à confonde di acquisti con de donaçioin, e l’é nasciuo l’idea de un Paise filantropo e assæ generoso. Inte sta dinamica ascì, però, no s’é trattou de unna manifestaçion de ingenuitæ, ma da missa in deuvio de tenniche de soft power, termine ch’o se deuvia inta teoria de relaçioin internaçionæ pe descrive a capaçitæ de un poei politico de “persuade e cooptâ, pe mezo de risorse intangibili”. L’obiettivo o l’é o poei, o strumento o l’é a coltua, ò donca, a-a giornâ d’ancheu, i media digitali. À tutto questo se gh’é azzonto ascì di epixòddi che sciatan e communicaçioin de di bot e di profî fäsci che an tempestou pe di giorni i soçial media con promeuve di messaggi de propaganda à favô do governo cineise. L’opinion pubrica a l’é cangiâ, mesuâ da sondaggi che no lascian dubbi: o megio alleou pe l’Italia? Pe tanti ancheu o saieiva a Ciña, e no ciù i USA.
Beseugna arregordâse che ancheu i Paixi de tutto o mondo trafegan e dialogan graçie a-i sviluppo de organizzaçioin e do commercio internaçionâ, ma tra unna partnership commerciâ e unna sòlida alleansa politica gh’é de belle differense. L’Italia a l’é un alleou stòrico di Stati Unii, co-o quæ a scompartisce l’appartenensa a-o patto NATO. I Stati Unii mantëgnan un rappòrto relativamente in conflito con Pechin: da-a guæra di daçi, a-e accuse de furto e plagio de brevetti (sempre ciù de spesso in USA), scin a-e limitaçioin a-e operaçioin de aziende cineixi. E sollevaçioin de Hong Kong e l’escluxon de Taiwan da-e töe de l’OMS (pe caxon de prescioin cineixi) no an fæto atro che polarizzâ ancon de ciù ste distanse. O nòstro Paise o no veu però renonçiâ à neuve opportunitæ creæ graçie à numeroxi interventi econòmico-industriali do governo cineise, da l’ingresso inte de gren açiende, à l’acquisto de arie portuali e hub da logistica. Renonçiâ do tutto à l’alleansa con i USA saieiva però imposcibile e in giornâ l’Italia a se treuva comme quarche dëxeña d’anni fa, quande se diva che a l’aiva “a moggê americaña e l’amante araba”, pe descrive i rappòrti de ambivalensa portæ avanti inti anni ’70 e ’80 da-i diversci governi italien co-o mondo arabo e american. Ma l’Italia a dovià preparâse perché à un bello momento porrieiva succede che ghe domanda de çerne, e tra un governo reaçionäio e unna democraçia imperfetta dovemmo öguâse che a segge sta chì urtima à regordâ a-o Paise da che parte emmo da stâ.