O pubrico e o privou depoî a-a pandemia

E coscì emmo scoverto che emmo fæto di erroî, emmo deuviou e poule abrettio, quande divimo che emmo da “sarvâ o pianeta”. Inte sti doî meixi de lockdown, e ripreise di droin n’an mostrou de ægue e di çê ciæi, l’Himalaya ch’a se vedde torna da-o Punjab dòppo trent’anni, i drafin che satan into pòrto de Òlbia, cangui, pinguin, strussi, lioin e elefanti che scorattan belli contenti pe-e stradde de çittæ sensa òmmi ni dònne in gio. O pianeta o no se poñe o problema de ëse sarvou ciù de quante a ramma in sciâ quæ semmo assettæ a no l’agge poia de vegnî taggiâ. Semmo niatri che s’emmo da ascidiâ. L’é in zeugo o nòstro destin, no quello da Tæra.

Chi sa se o lockdown o l’à mostrou quarcösa à quelli filloin che piggiavan in gio i figgeu di Friday for Future, e î ciammavan “gretin”. Existe tante forme de quella autoçentratua, ch’a pòrta e persoñe à dî “niatri semmo megio di atri”: a tribù, o campanin, a religion, a lengua, a naçion, a classe soçiale, a rassa, o cô da pelle, o continente, a specie. A l’é unna forma mentis antiga de millenni e diffiçile da arrancâ. Ghe semmo niatri e gh’é i atri. E sovente, gratta gratta, ti screuvi che sensa i atri no ti peu definî o niatri; niatri semmo niatri perché no semmo viatri. Coscì tutto o bon che vëgne da feua o s’à da ignorâ, da piggiâ in gio. O problema o s’ô poneiva sciña Karl Marx, e sciben che o l’ea interessou à tiâ sciù lê ascì un niatri do proletariato, quande o diva che a borghexia a pòrta di valoî e de forme de bellessa che van ascimilæ da-e classe infeioî.

Confesso che me dà breiga tutto o regio naçionalistico ch’o se vedde inte propagande televixive italiañe: consummæ 100% italian. Perché s’a l’é vea che tanti produti italien, da-o mangiâ a-i vestî, a-a coltua, son de eccellense pe indavei, resta o fæto che existe ascì o camambert, o champagne, a bira ingreise, a cicolata svissera, o caviâ ruscio, e ascì a machine tedesche, l’elettrònica giapponeise, a muxica cubaña, l’architettua araba, a lettiatua anglo-americaña e a filosofia d’Oriente. E intanto l’é veo ascì che emmo imparou che o nòstro modello de çiviltæ, quello europeo, o s’é mostrou ciù bon deatri into piggiâ de peto l’emergensa Covid-19, graçie a-o fæto che disponemmo de un scistema pubrico megio constituio e ciù larghê. E tasce che paghemmo no pan mai tròppe quande finimmo inte unna terapia intensciva (ò quande emmo beseugno de un intervento de erta chirurgia). Se t’æ un cancao, unna patologia cardiovascolâ pesante e t’ê pöveo, l’é megio se ti vivi into paise de Merkel, Conte e Macron, ciù che inte quelli de Trump e Bolsonaro.

Do resto, a neçescitæ (sacrosanta, e ch’a no se discute) de partî torna a l’à subito descadenou unna gran coæ de deregulation; l’ascidio pe-e longannie burocratiche o l’à averto e pòrte à di attacchi delongo ciù streiti a-o ròllo de contròllo do Stato in sciô giusto fonçionamento de l’economia. O no l’é un bon segno, into paise donde e træ organizzaçioin mafiose ciù fòrte do mondo se ghe son ingrasciæ. E o l’induxe à pensâ ch’aggemmo a memöia curta, perché se semmo ascordæ de tutto o mâ che a deregulation neoliberista a l’à fæto à l’umanitæ inti urtimi trent’anni: a l’à misso à tòcchi i equilibri do clima e de societæ, a l’à moltipricou e disegualianse, a l’à sacchezzou e i ben do pianeta e a l’à fæto de tutto un continente, l’Afrega, un pòsto che o regòrdâ l’inferno. Ma apòsta: un inferno pe-i òmmi. L’æña do deserto a no patisce ni o cado e ni a sciughea.