“Spillover”

O Covid-19 o l’é cheito in scê nòstre vitte comme un furmine à çê sen, caxonando mòrte, sofferensa, poia; o l’à destabilizzou l’economia creando desoccupaçion, neuve povertæ, inçertessa do futuo. O l’à obbligou milioin de persoñe à serrâse in casa e o l’à tegnuo i figgeu e i zoeni lonten da scheua. E conseguense de tutto questo son lonxi da l’ëse quantificæ e compreise scin in fondo, se mai ô saian. Probabilmente a ciù parte di italien scin à l’iniçio do marso passou a no saiva manco ben comme o fïse fæto un virus (figuemmose un coronavirus), ni a conosceiva a differensa tra epidemia e pandemia. Fito emmo dovuo mette à giorno o nòstro vocaboläio con di termini neuvo comme “zoonoxi”, “lockdown”, “droplet”, “distançiamento soçiale”. In realtæ o rischio de unna pandemia comme quella che stemmo attraversando o l’ea za assæ ciæo a-a communitæ scientifica e a-e organizzaçion sanitäie internaçionæ da di belli anni, comme minimo da-o 2003, quande inta Ciña meridionâ l’ea scciuppou a Sars, a scindrome pormonâ che a l’aiva contagiou euttomia persoñe, da Scingapore à Toronto, o 10% de quæ a l’ea mòrta. Unn’epidemia ch’a l’é stæta definia “o proiettile che o l’à sfiorou l’oegia de l’umanitæ” – avviso do seu “erede” Sars Cov-19, che nisciun gh’à dæto a mente – fermâ co-i interventi de contegnimento e unna boña dòse de fortuña.

Atri campanin d’allarme aivansunnou ben ben primma, fin da-i tempi de Ebola. Do 1995, pe exempio, l’é sciortio o cine “Virus letale”, co-o Dustin Hoffman into ròllo de un mego militare impegnou con un virus de orgine animâ (unna zoonoxi, comme Sars e Sars-2. O 60% de marottie infettive son zoonoxi), che inti titoli de testa o riportava unna çitaçion do genetista, premmio Nobel, Jousha Lederberg, ch’a dixe: “A scingola e ciù rilevante minaccia a-o constante dominio de l’òmmo in sciô pianeta son i virus”. No l’é stæto donca diffiçile pe-o giornalista scientifico David Quammen prevedde, do 2012, quello che saieiva successo. Into seu straordenäio libbro “Spillover. L’evoluzione delle pandemie”, edito da Adelphi (o spillover o l’é o sato de specie ch’o permette à un virus de passâ da-e bestie a-i òmmi) o scriveiva: “Dio o no veugge che aviemo da fâ con un virus greive comme a Sars, che o se diffonde da-e persoñe avanti che ne veddemmo i scintomi”. l’é quello che o l’é successo co-o Covid-19. Passou eutto anni da-o seu libbro “profetico” (ma bastava fâ ben o travaggio da giornalista), de fronte à l’emergensa mondiale o l’à repiggiou o discorso inte un articolo apparso in sciô New Yorker l’11 de mazzo (fito traduto da Adelphi inte l’ebook “Perché non eravamo pronti”). Into reportage Quammen o l’intervista i viròlogo Ali S. Khan, ch’o l’é stæto dirigente do Cdc (l’Agençia federale americaña pe-o contròllo e a prevençion de marottie) za impegnou in primma linia inta battaggia contra i virus: into Zaire pe l’epidemia de Ebola, into surtanou de l’Oman pe-a freve emorragica Crimea-Congo, in Uganda torna pe Ebola, à Scingapore pe-a Sars, in Ciad donde a poliomelite a no l’é ancon debellâ. l’é pròpio Kahn che o repropoñe e “cöse da fâ” pe contrastâ e pandemie, comme aveiva za fæto do 2016 into libbro “The next pandemia”. Ve ê chì: “reçerca in sciô campo finalizzâ a-a scoverta di neuvi virus; monitoraggio vigile di spillover; scistemi pe produe fito di test diagnòstichi e in grande quantitæ; megio capaçitæ de rispòsta individuale e di respiatoî, e programmi coordinæ pe mesciâli da unna giurisdiçion à l’atra; cianificaçion coordinâ tra çittæ, Stati, provinse e agençie internaçionæ pe contegnî infeçioin catastròfiche; educaçion da collettivitæ pe rafforsâ a disponibilitæ geneâ e supportâ o distançiamento soçiale e o contròllo da quaranteña; megiô amministraçion da sanitæ pubrica e cicli de finançiamento segui; e, cösa ciù importante de tutte, a voentæ politica de assummise o rischio de sostegnî de speise pe unna preparaçion da quæ fòscia no ghe saià mai de beseugno”. Nisciun o gh’à dæto a mente.