Trent’anni de scena muxicale into Levante

Inta Rivea de Levante a scena muxicale a l’é stæta delongo bella viva, quello che manca ean e son di locali che peuan aggiuttâ. Inti anni son stæti, à dî a veitæ, pròpio pöchi. E diverse propòste muxicali, son stæte pe-a ciù grande parte fornie da conçerti organizzæ da gruppi o assoçiaçioin colturali, primma do 2000 regordo Il Gruppo, Gerico Assediata e Fata Morgana, dapeu o 2000 Zero Festival e Mojotic. I locali, inti anni ’80-’90, à Ciavai pe dî gh’ean sette discoteche, programmavan solo muxica commerciale, e no l’ea previsto sunnâ da-o vivo. Uña de pöche realtæ controcorrente o l’é stæto Il Capolinea, in scê colliñe de Rapallo vixin à Montallegro, che da-o ’90 a-o ’96, o l’à movimentou un pö a scena levantiña permettendo a-e band da zöna a poscibilitæ de trovâ un palco e da gente che a stesse à sentî.

Do resto regòrdo seiañe pe sponciâ questo ò quell’atro esponente politico durante e varie eleçioin, co-a promissa de fâse carrego de richieste di muxicisti, cheite delongo into veuo. A propòsta muxicale a l’é arrestâ inte man de pöchi inluminæ, comme l’inventô da Festa di Frontiera, che à Lavagna à partî da-o 1995 a l’à portou nommi da scena internaçionâ pe di conçerti de badda, con unna çernia da-o ciù ampio respio. Unna realtæ bella spessa a l’é stæta portâ avanti da-i Figgeu Piccin, che in sciô Monte San Giacomo de d’ato a Cogorno da-o 2004 e pe dex’anni an organizzou a Festa della Musica, con nommi internaçionæ ma spaçio pe-e differenti anime muxicali do territöio.

Inti urtimi anni doe realtæ che satan a-i euggi son a Shanti House e o Circolo Randal. A Shanti House, unn’oasi de umanitæ in sce l’Appenin ligure, de d’ato a Sorviacroxe, Borzonasca, o l’é un B&B; into 2004 son iniçiæ i coscì diti dj set con unna seleçion muxicale pe-o ciù basâ in sciô levâ do ritmo do reggae, viste e preferense muxicali do bacan, a-o secolo Franco Repetto, ideatô ascì da saga “Storie di funghi”, che a conta de mattaie di fonzaieu, e de sò figgio Gabriele, ciù conosciuo pe U Elettronicu. Con o passâ do tempo queste seiañe inandiæ quæxi pe rie se son transformæ inti di vëi e pròpi eventi, coscì che da-o 2012 e pe diversi anni an dæto vitta a-i differenti ShantiReggaeSummer, co-e band de Zena e do Levante accommunæ da l’amô pe-a “januaican music” e à quarche sound system vegnuo da Milan.

Intanto à Sestri Levante da unna cabirda de zoeni de belle speranse, a l’é nasciua a realtæ do Circolo Arci Randal. “Con l’intento de ëse un ponto de riferimento in sciô territöio e pe-a communitæ”, regòrda o Fabio Pali, o prescidente, o circolo o l’à promòsso diverse presense e iniçiative, corsci de differenti matëie, proieçioin de cine, rassegne de tiatro, fin à l’aradio in sciâ ræ, Radio Randal, nasciua da-a çenie de 92.1fm, unn’aradio pirata che a transmetteiva in modulaçion de frequensa da-e colliñe vixin à Zanoni. Ma quello che à fæto o Randal riguardo a-i spettacoli da-o vivo penso però che o no gh’agge paragon. Nasciuo into dexembre do 2012 o l’à produto fin a-o 2018 unna media de circa 60 conçerti ògni anno, spaçiando à 360 graddi riguardo a-i generi muxicali e con un euggio attento a-a scena do territöio faxendo scì che gruppi de diversci stili muxicali se poessan esprimme da-o folk a-o metal, da-o reggae a l’hip hop da-o dub a-o rock à l’elettrònica. L’incontro con U Elettronicu, anima sonöra da Shanti Family, fònico rescidente inti urtimi anni de gestion do circolo, o l’à dæto vitta e forma à quattro ediçioin do Niatri Festival, pe supportâ a muxica in lengua zeneise. Frexoin in Val Graveggia, Sestri Levante e Sorviacroxe son e localitæ che an ospitou a rassegna inti urtimi 4 anni, oua l’é prevista unna quinta ediçion a-i primmi de luggio, covid 19 permettendo, delongo a Sorviacroxe sotta l’egida da Shanti House. Scignoria, e boña muxica - tutti._