E communale franseixi veddan l’affermaçion de verdi e autonomisti.

Domenega 28 de zugno s’é tegnuo e eleçion amministrative in Fransa, voto che o l’à mostrou un neuvo cangio inta politica franseise e a conferma de çerte realtæ. I resultati i ciù sorprendenti e poxitivi son stæte e vittöie di Verdi inta Fransa continentale, e quelle di autonomisti / indipendentisti inte l’isoa da Còrsega. O “Partitu di a Nazione Corsa” (PNC) o l’é diventou o primmo partio pe preferense in sce l’isoa, elezzendo o scindico inte di paixi scignificativi comme Zonza ò Figari, ma sorviatutto de Pòrto Vecchio, unna de ciù grendi e importanti muniçipalitæ còrse. L’isoa a l’à manifestou de spesso a seu coæ de autodeterminaçion, segge da-o lato indipendentista, segge da quello autonomista. Regordemmo a lòtta armâ do “Fronte di Liberazione Naziunale Corsu”, inspirou à l’ETA e à l’IRA, e tutti i movimenti vexin à questo, ormai scentæ che l’é diversci anni, ma sorviatutto l’exploit di partii territoialisti e progrescisti inti urtimi anni, donde o dexidëio de unna democraçia avansâ, o paçifismo, l’ambientalismo e o refuo da lòtta armâ an sostituio de maniman a retòrica di partii naçionali franseixi, faxendo cresce a fiducia pe l’autogoverno inti çittadin còrsci. A repubrica franseise, do resto, o l’é un Stato fortemente çentralizzou, e no l’é un caxo se de spesso se parla de Pariggi e do resto da Fransa, quande s’à da fâ co-i serviçi, co-o tessuo sòçio-econòmico e ancon de ciù co-a coltua. A divixon linguistica franseise, sciben che æguâ, a l’é presente e compricâ, e se ghe reconosce çinque gruppi: la langue d’oil (inta quæ ghe cazze o franseise standard e o piccardo), a langue d’oc (occitan in senso ancio), breton (de tipo celtico), francoproensâ (arpitan) e còrso. A-o de là de queste emmo da reconosce ascì e minoranse catalañe, basche, i dialetti tedeschi e o ligure. A supremaçia naçionâ do franseise standard a l’é apreuvo à scancellâ tutte e atre lengue in Fransa, e de fæti i governi de l’isoa an delongo incontrou de difficortæ à portâ a lengua còrsa a-o mæximo cian do franseise, pe çercâ de creâ un bilinguismo che ancon o no l’existe.

L’alleansa tra autonomiste e indipendentisti, riunii in diverse sigle, a l’à portou à l’esploxon da costion còrsa in Fransa da-o 2014; da quello momento i movimenti regionalisti còrsci veddan cresce delongo de ciù i seu consensci, e sta tornâ elettorale a l’é stæta l’ennexima ripreuva. Inte st’urtimo dexennio emmo visto nasce e cresce tante organizzaçioin, in gio pe l’Euröpa, de scinistra federalista, indipendentista e verdi; partii e movimenti che mettan in discuscion a costion naçionâ e o ròllo de l’Euröpa. E forme di Stati naçionæ son stæte misse a-a preuva sorviatutto da-i caxi catalen e scoçeixi, ma ascì in Italia gh’é un sccioî de realtæ che piggian pê; e à fianco da costion di Stati gh’é o ròllo de l’Euröpa, che a l’é apreuvo à affrontâ unna de crixi ciù greivi da-a seu nascion comme entitæ politica. E fòrse euroregionaliste de scinistra, pe-a ciù parte, sponcian pe rafforsâ i poteri de l’Union, e fiña pe-a creaçion de unna Repubrica Europea, a quæ a porriæ un bello tòcco de temi amministrativi a-e regioin, con ammermâ ò scancellâ o ròllo di stati-naçion, permettendo à l’Euröpa de coordinâ i diversci territöi. A Còrsega a l’é un di scimboli de sto repiggio do regionalismo progrescista e ecologista, unn’isoa ch’a no se sente rapresentâ à Pariggi, ma ch’a l’é inseria in pin inte dinamiche europee. Fòscia a pròscima revoluçion a comensià in periferia, e anche questo ne mostra e urtime eleçioin amministrative franseixi.