O repiggio da Liguria o passa da Bruxelles

Inte sto 2020 che o passià a-a stöia pe tante raxoin, e eleçioin regionæ liguri òccupan de seguo un pòsto limitou e marginale. E l’è giusto ësine consapevoli, segge pe no dâ tròppa importansa a-e bæghe nostræ, segge pe capî comme reimpostâ un rappòrto dialettico e de scangio con l’esterno, che o l’è vegnuo à mancâ de maniman che a region a se serrava in sce lê mæxima. Pe liberâse da-o schema de dipendensa da-o Stato italian, a Liguria a deve imparâ a relaçionâse fito con – e sorviatutto piggiâ e palanche da – Bruxelles. Se a zonta Burlando a no l’ea in graddo de mette à fruto e risorse reise disponibili da-a UE, lasciando lì unna boña parte sensa riescî à spendila (s’ea perso ciù de 100 milioin), o governo Toti o l’à scì fæto megio in ponto quantitæ, ma sensa dâse breiga de imaginâ unna speisa de qualitæ. Chi travaggia into mondo de l’impreisa o ô sa ben che o ciù de vòtte i bandi FILSE fæti co-i fondi UE son de specie de suscidi elargii un pö coscì abrettio, perché scì. Incangio a capaçitæ de profittâ ben di fondi UE, e no solo quelli che son assegnæ d’uffiçio à l’Ente Region, ma à missa in möto de un meccanismo virtuoso che o pòrte e impreise, e assoçiaçioin, e fondaçioin, e scheue, insomma i diversci attoî da societæ e de l’economia ligure à finançiâ i seu progetti co-e risorse europee, a l’è unna de pöche speranse de rimette in pê o territöio. E sorviatutto a seu demografia. E a politica cöse a fa?

No sò se ei avuo occaxon de leze o programma che aivan concordou e fòrse politiche do Campo Progressista insemme a-o M5S, che dapeu an consegnou a-o Ferruccio Sansa comme fïse un testamento da eseguî. A pâ a lettia pe Papà Natale: ciù palanche pe l’entrotæra, ciù palanche pe-a scheua, ciù palanche pe questo e pe quello. Repiggemmo o welfare, repiggemmo o travaggio. Un belliscimo sfòrso de imaginaçion. Figuemmoselo: Gianni Pastorino lì cegou à pensâ comme spende e à rattellâ con Farello ò Rossetti che vorrieivan spende pe quarcös’atro, e Pirondini che o no l’è d’accòrdio. E intanto passava i meixi. Ean sti chì i famoxi accòrdi programmatichi: pensâ comme spende de palanche che no ghe son. L’accòrdio s’è trovou dixendo che tutti poeivan spende tutto quello che voeivan, tanto son palanche de fantaxia. Pâ un scherso, ma a l’è anæta coscì.

A realtæ ligure a conseggieiva incangio un pragmatismo differente areo, che o parte da-a constataçion che se no se riesce à invertî a dinamica demografica gh’è ben pöco futuo. Invertî a dinamica demografica veu dî pensâ à comme creâ travaggio, à comme inandiâ de condiçioin favoreivi perché e impreise nascian ò vëgnan chì, pe exempio spostandose da Milan, ma no solo; into fâlo, beseugna affavoî in tutti i mòddi i settoî de attivitæ green perché son quelli donde ghe travaggia ciù tanti zoeni, e son i ciù coerenti co-e exigense do nòstro secolo. Tutto o resto – l’attençion a-o soçiale, o repiggio do _welfae _, e politiche pe l’entrotæra – se no gh’è economia (verde) diventan a lista da speisa, e semmo tutti boin à scrivila. Se capisce che pe fâ giâ e cöse, in Liguria beseugna poeighe arrivâ e poeisene anâ, cösa che purtròppo a no l’è scontâ. Do resto, gh’è unna serie de òpie ciù ò meno finançiâ e in corso de realizzaçion che a l’è à basta pe no doveine parlâ ancon, anche perché l’è vint’anni che ne parlemmo, e parlemmo solo de quello. Comme se da-a Gronda passesse o destin de sta region, comme se a Vintimiggia ò a-a Spezza gh’importesse quarcösa da Gronda, tanto che no trovemmo e paròlle pe descrive o comportamento de Italia Viva, che a l’è riescia à rompî a coaliçion de çentro-scinistra à 5 stelle, offiçialmente, pe-a costion da Gronda. S’è fæto de questa un scimbolo da poxiçion à favô do sviluppo econòmico: se un o l’è dispòsto à fâla à tutti i costi, veu dî che o ghe tëgne à l’economia, se in cangio o çerca de stabilî unna scâ de prioritæ, o l’è pe-a decrescita. Intanto, da IV no l’è arrivou nisciun’atra idea pe-o sviluppo econòmico da region. Comme partio sviluppista son scarsci fòrte.

Spiaxe donca constatâ che no s’è imparou ninte da-o 2015. À l’epoca mi aiva credduo che suicidâse coscì in pubrico no fïse unna boña idea, e quello che l’è successo o m’à dæto raxon; no se regordià mai à basta o danno che o l’à fæto o Cofferati a-a scinistra ligure, röba da chinòlla infame. Ma a mòssa de Renzi e compagnia a l’è fòscia ancon ciù greive, perché oua e poscibilitæ de portâ avanti unn’idea de Liguria moderna, verde, incluxiva, averta, zoena, vea, son assæ meno de çinque anni fa, e co-a formaçion de sto “terso pölo” in prattica spariscian areo. Spiaxe pe chi o gh’è anæto apreuvo, a-o Renzi e a-a Paita. Magara sensa voei, ma fan o zeugo de Toti e compagnia. L’imprescion a l’è che, stante coscì e cöse, no tocchià rexiste atri çinque anni, e çercâ de construî unn’alternativa, che a l’unisce Zena à Bruxelles. Tocchià travaggiâ ancon in sciâ coltua, pe no perde a conscensa de ëse pòpolo. Ma o l’è un peccou, perché se poeiva fâ megio, e fâlo oua.