Se a Liguria a no sa ciù chi a segge

“Ma a çittæ a no dixe o seu passou, a ô contëgne comme e linie de unna man, scrito inti canti de stradde, inte grixelle di barcoin, inte arrembagge de scae, inte antenne di parafurmini, inte aste de bandee, ògni segmento arrigou pe conto seu de sgranfignæ, seghettatue, intaggi e virgole (Italo Calvino “Le città invisibili”).

Scrivo tanto che Zena a l’é ascidiâ tanto da-o diabòlico preçipitâ in sce lê de l’ambiente ch’o ghe stà d’in gio, da-e frañe, da-i sciummi in piña, da-i viaduti pericolanti de autostradde, euvia de l’òmmo, a-e coe infinie de machine, segno de unn’imponente e matta fuga da “quarcösa” che o vëgne zu, e quello “quarcösa” o l’é Zena mæxima. A-o de là de polemiche politiche, pe unna breve riflescion in scê catastròfiche sòrte da Superba, aggredia da-a crudeltæ do mâ, da-i derui de montagne e da-i rovinoxi deluvi do çê, provemmo à fâ un sato into tempo e arrivâ a-o lontan 1815, anno into quæ co-a sconfitta de Napolion à Waterloo se sançioña a “Restauraçion”, saiva à dî, o retorno a-o passou, primma da Revoluçion Franseise, e o Congresso de Vienna o l’architetta a neuva Euröpa. Inte tutto questo a gloriosa Repubrica de Zena, in declin e allembeia da-i monta e chiña da stöia, a l’arria mestamente a bandea e a vëgne annessa a-o Regno de Sardegna, eterno nemigo di tempi d’accai, incarregou de l’ambiçioso progetto de unificâ a realtæ politica menissâ e turbolenta do stivale italico.

Lonxi da mi o passatismo e o “nostalgismo” in scî “belli tempi de unna vòtta”, con tutto che no son coscì vegio; a constataçion però a l’é che e cöse à quello pe Zena cangian no solo politicamente, ma subentra unn’interpretaçion diversa da çittæ e do territöio. Son contrastanti e vixoin do mondo di Savöia, abbrascæ de spaçio e de terren, bellicoxi, fedeli a-e grendi potense conservatoe, respeto a-a vegia Zena, delongo attiâ da aneliti de indipendensa e de libertæ, vortâ a-i scangi marittimi e a-a conquista de neuve tære de otramar. A rivòlta do 1849 e o conseguente pugno de færo ordinou da-o Vittöio Emanuele II, e misso in atto da-i bersaggê de La Marmora, a no l’à solo o savô de unna severa açion de poliçia militare, ma de unna reisa di conti tra doe realtæ despægie donde a vixon do mondo do vinçitô a l’anava impòsta tanto co-e boñe comme co-e brutte mainee. Succescivamente o conte de Cavour o disegnià o profî e l’identitæ politica e econòmica da çittæ à l’interno do contesto do neuvo Stato ch’o nasce. E boñe relaçioin tra Inghiltæra e Stato sabaudo attian unna neuva impenditoria e dinæ freschi, a çittæ a diventa logisticamente o ponto de partensa verso o neuvo mondo pe milioin de persoñe a-a riçerca de fortuña co-e compagnie de navegaçion. Zena a nasce torna, inevitabilmente a cresce e a va sorviadimenscionandose ascì comme çentro urban, aumentando unna popolaçion ch’a comensa à arrivâ anche da-o çentro e sud Italia, a-a riçerca de travaggia. O 1892, o quattroçentenäio da scoverta de l’America o vëgne çelebrou inte unna çittæ che a veu compete pe fascino e modernitæ co-e grendi metròpoli europee. Ma gh’é un ma. O travaggio, diffiçile e intenso, de reorganizzaçion urbanistica o no tëgne conto de tròppi elementi. Levando spaçio a-o letto de Besagno cresce i rischi de alluvion, dapeu a construçion da neuva direttrice à mâ verso Levante (Corso Italia) a snatua quello tòcco de còsta. E neuve fabriche attian a popolaçion de campagne, impoveindo de maniman tutto o territöio de l’entrotæra. Zena a l’abandoña coscì unn’identitæ secolare ciù commerciale, aristocratica e elitäia pe diventâ unna grande çittæ industriale e operäia, ricca de stabilimenti (de “servitù inquinanti”), inta quæ o pòrto o l’é o scâ primmäio pe-e matëie primme che dovian ëse travaggiæ. Sciben che no scrito inte nisciun cian ediliçio, a çittæ arrëlâ tra e miage seiçentesche, e stradde streite, l’exigensa de trovâ di spaçi de là da-o mâ, a descriveiva un còdice ciutòsto ciæo: e dimenscioin de Zena ean quelle, ciù ni meno. L’espanscion da çittæ a conscisteiva inti spaçi conquistæ feua, inte di territöi lonten, no into crescio do spaçio urban. Mussolini o completa l’òpia con imaginâ e con impoñe a “Grande Zena”, pe de raxoin de contròllo politico ciù che atro, ma inandiando – in sciù de scancellâ letteralmente identitæ, leughi, differense morfològico-ambientali – un proçesso irreverscibile ch’o transforma definitavemente Zena inte un distreito industriale, che o l’impoñe e seu exigense de infrastruttue, stradde, collegamenti à prescinde da-e caratteristiche do territöio. A speculaçion ediliçio do doppoguæra, inta continuitæ co-o disegno sabaudo de un crescio stramesuou da çittæ, a s’afferma sensa tròppi problemi. E parteçipaçion statali fan arrivâ à Zena unna grande ricchessa, ma domandan o pegno de un asservimento totale di seu spaçi. Unna ricchessa che, à miâla ben, inte quelli anni a garantisce (in proporçioin diverse à segonda di diversci ceti) un benstâ trentennâ che quande o finisce, co-o tramonto de l’impegno do Stato inte l’economia pubrica, o coinciddià co-i primmi segni de difficortæ. Quello che o l’é apreuvo à vegnî zu à tòcchi – letteralmente – a l’é a çittæ di urtimi 100 anni, construia in scê premisse precedenti; o surrescadamento climmatico, o crescio inevitabile do volumme di trafeghi de machine e de ferrovie, o contròllo delongo ciù inçerto e desordenou che o Stato o doviæ garantî in sciâ salute de òpie pubriche an caxonou sto “desastro perfetto”. Da chì a neçescitæ de pensâse torna radicalmente, no guæi inta lògica de unna “decrescita feliçe”, che a-o manco a fïse feliçe, stante che à tutti i mòddi de decrescita se tratta, ma into repiggià i còdici de unn’identitæ desconosciua da doî secoli pöcassæ, che a collega individuo e territöio, che a fa de un agglomerou urban un spaçio uman e de bello vivighe, che a l’impoñe pe fòrsa di limiti, e che graçie a-a tecnologia green, a-e connescioin virtuale, à l’intelligensa artifiçiâ, a l’indica de stradde, a propoñe di sviluppi e di scenäi.